Luke 8 — Sotho 2000 (BIBELE Taba yea Botse)

1Go tloga moo Jesu a sepela le metse le metsana a begela batho Taba ye Botse ya mmušo wa Modimo a bile a ba ruta yona, a na le barutiwa bale ba gagwe ba lesome le metšo ye mebedi.

2Basadi ba bangwe ba a bego a ba ntšhitše meoya ye mebe a bile a ba fodišitše malwetši le bona ba be ba na le yena. Bona e be e le Maria, yo a bego a tsebja ka la Magadalena, yola wa go ka a ntšhwa bademone ba ba šupago,

3le Johana, yola monna wa gagwe e bego e le Gusa, mohlankedi wa Heroda, le Susana, le ba bangwe basadi ba bantši ba ba bego ba thuša Jesu le barutiwa ba gagwe ka tše ba bego ba na le tšona.

4Batho ba ile ba fela ba etla go Jesu ba etšwa metseng ye e fapanego; ya re ge ba kgobokane e le lešaba le legolo, a ba botša seswantšho a re:

5“Monna yo mongwe o kile a tšwa a yo bjala peu. Ge a dutše a e gaša, ye nngwe ya wela tseleng, gomme ya gatwa, le dinonyana tša e ja.

6Ye nngwe ya wela lekgwareng, gomme ge e seno mela, dimelana tšeo tša pona, ka ge mobu woo o be o se na monola.

7Ye nngwe ya wela ka mehlašaneng ya meetlwa, gomme mehlašana yeo ya gola le dimelana tšela, ya di pipetša.

8Ye nngwe yona ya wela mobung wo mobotse; mabele a gona a gola a tswala. Lebele le lengwe le le lengwe la tšwa dithoro tše lekgolo.” Jesu a goeletša a re: “Yo a nago le tsebe a a kwe!”

9Barutiwa ba Jesu ba mmotšiša gore na seswantšho se se šupang,

10gomme a ba fetola a re: “Lena le utolletšwe diphiri tša mmušo wa Modimo, fela ba bangwe ba di kwa ka diswantšho gore ba lebelele, eupša ba se ke ba bona selo; ba kwe, eupša ba se ke ba kwešiša selo.”

11“Seswantšho sa mobjadi se hlalošwa ka mokgwa wo: Peu ke lentšu la Modimo.

12Peu ya go wela tseleng e šupa bao ba rego go kwa lentšu la Modimo, Sathane a tle a tloše molaetša wo ka dipelong tša bona gore ba se ke ba dumela, ba phološwa.

13Peu ya go wela lekgwareng e šupa bao ba rego go kwa molaetša ba o amogela ka thabo. Eupša wa se dule sebaka ka dipelong tša bona; ba dumela lebakanyana fela, gomme ya re ge ba lekwa, ba kgeloga.

14Peu ya go wela mehlašaneng ya meetlwa e šupa bao ba rego go kwa molaetša wa Modimo, go balabala le mahumo le maipshino a bophelo tša ba šitiša go bontšha tumelo ya bona ka mediro.

15Peu ya go wela mobung o mobotse e šupa bao e rego ge ba ekwa molaetša wa Modimo, ba ikemišetša go o phetha, mme ba o phetha, ba bontšha tumelo ya bona ka go kgotlelela melekong.”

16“Ga go motho yo a rego go thumaša lebone a le khurumela ka seroto, goba a le bea ka fase ga malao. O le hloma sehlomong sa lona gore ba ba tsenago ba bonegelwe.

17“Ga go sephiri se se ka se kego sa tsebja, le gona ga go selo se se utilwego se se ka se kego sa utollwa sa tsebja.

18“Ka gona le hlokomele gore na le kwa lentšu la Modimo bjang; gobane yo a nago le sa gagwe o tla okeletšwa, mme yo a se nago le sa gagwe, le se a gopolago gore ke sa gagwe o tla se amogwa.”

19MmagoJesu le bana ba boJesu ba kile ba re ba tlile go yena, ba palelwa ke go mmatamela ka baka la lešaba.

20Motho yo mongwe a re go yena: “Mmago le banabeno šebale ka kua ntle ba a go nyaka.”

21Jesu a botša lešaba a re: “Mma le banabešo ke ba ba rego go kwa tše Modimo a di laelago ba di phetha.”

22Ka tšatši le lengwe Jesu a namela leselawatle le barutiwa ba gagwe, a re go bona: “A re seleleng ka mošola wa letsha.” Ba napa ba tloga.

23Ge ba le gare ba sesa ka leselawatle, Jesu a swarwa ke boroko. Gateetee gwa tsoga ledimo ka letsheng, leselawatle leo la thoma go tlala meetse, mme ba ba kotsing.

24Barutiwa ba Jesu ba ya go yena, ba mo tsoša ba re: “Mong wa rena, Mong wa rena! Re a hwa!” Jesu a tsoga, a kgalema ledimo le maphoto a re di homole; gwa homola gwa re tuu.

25Ke moka a re go barutiwa bale ba gagwe: “Le reng le hloka tumelo?” Bona ba be ba tšhogile, ba tlabegile, gomme ba botšišana ba re: “Etse motho yo wa go laela le diphefo le maphoto, mme tša mo theeletša, ke mang?”

26Jesu le barutiwa ba gagwe ba selela ka seleteng sa Bagerasa ka mošola wa letsha la Galilea ka leselawatle.

27Ya re ge Jesu a fologa a gahlanetšwa ke monna yo mongwe yo a tsenwego ke bademone a etšwa motseng. E be e šetše e le go tloga kgale a sepela a itlhobotše, a sa dule ka gae, a dula mabitleng.

28A re go bona Jesu a hlaba mokgoši, a itahlela fase pele ga gagwe, a goeletša a re: “Na o nyakang mo go nna, wena Jesu, Morwa wa Modimo Yogodimodimo? Hle, o se ke wa nkotla!”

29Ge a realo e be e le ka gobane Jesu o be a laetše moya wo mobe a re o tšwe mo go yena. E be e šetše e bile gantši o mo utlautla, gomme le ge a be a kgokwa maoto le matsogo ka diketane bjalo ka sebofša, o be a di kgaola mme a išwe ke modemone yoo lešokeng.

30Jesu a mmotšiša a re: “Ke wena mang?” Yena a mo fetola a re: “Ke nna ‘Lekoko’,” gobane o be a tsenwe ke bademone ba bantši.

31Bademone bao ba kgopela Jesu gore a se ke a ba rakela ka moleteng wa go iša fasefase.

32Mola kgauswinyana go be go na le mohlape wo mogolo wa dikolobe o fula motheogeng wa thaba. Bademone ba kgopela Jesu gore a ba dumelele go tsena dikolobe tšeo, gomme a ba dumelela.

33Ba tšwa go monna yoo ba yo tsena dikolobe tšela. Mohlape ka moka wa thetheoga motheogeng wa wela ka letsheng, wa betwa.

34Badiša ba tšona ge ba bona tše di diregilego ba tšhaba ba yo tsebiša batho ba ba lego motseng le ba ba lego mašemong.

35Batho ba ya go bona se se diregilego. Ge ba fihla go Jesu ba bona monna yola bademone ba bego ba lelekilwe go yena a dutše pele ga Jesu, a apere, le tlhaologanyo ya gagwe e boetše sekeng, gomme ba šia.

36Ba ba di bonego ba anegela batho ka moo monna yola wa bademone a fodišitšwego ka gona.

37Ke moka batho ba selete seo sa Bagerasa ba kgopela Jesu gore a tšwe ka nageng ya bona, gobane ba be ba boifa kudu. Ka gona Jesu a namela leselawatle a tloga.

38Monna yola bademone ba bego ba lelekilwe go yena a mo kgopela gore a sepele le yena. Eupša Jesu a mo gomiša a re:

39“Boela gae o fihle o anege tše dikgolo tše Modimo a go diretšego tšona.” A fihla a sepela le motse, a tšama a bega tše Jesu a mo diretšego tšona.

40E rile ge Jesu a boela ka mošola wa letsha, a gahlanetšwa ke lešaba la batho, ka gobane ba be ba ntše ba mo letetše.

41Gwa tla le monna yo mongwe yo leina la gagwe e bego e le Jairose. Yena e be e le mookamedi wa sinagoge ya moo. A itahlela fase pele ga Jesu, a mo kgopela gore a ye ga gagwe,

42ka gobane morwedi wa gagwe yo e bego e le motswalwanoši wa mengwaga ye lesome le ye mebedi o be a le makgatheng. Ya re ge Jesu a eya naye, a tšama a pitlaganywa ke lešaba.

43Mo go bona go be go na le mosadi yo mongwe yo a bego a feditše mengwaga ye lesome le ye mebedi a bolawa ke bolwetši bja ngope. O be a lobile tšohle ka go ikalafiša dingakeng, eupša bohle ba be ba paletšwe.

44A tla ka morago ga Jesu gare ga lešaba, a kgwatha morumo wa seaparo sa gagwe, gomme gateetee a fola bolwetši bjola bja go tšwa madi.

45Jesu a botšiša a re: “Ke mang yo a nkgwathilego?” Bohle ba itatola, gomme Petrose a re: “Mong wa ka, ga ke re batho ba ikgohla ka wena ebile ba a go pitlaganya?”

46Jesu a re: “O gona yo a nkgwathilego, gobane ke kwele go etšwa maatla mo go nna.”

47Mosadi yola ge a bona gore o lemogilwe, a tla a thothomela, a itahlela fase pele ga Jesu. A mmotša a kwewa ke bohle gore ke ka baka la eng a mo kgwathile, le ka mo a fodilego ka gona le semeetseng.

48Jesu a re go yena: “Morwedi wa ka, tumelo ya gago e go fodišitše. Sepela gabotse.”

49Ya re a sa bolela, gwa fihla moromiwa wa go tšwa ga Jairose, a re go Jairose: “Morwedi wa gago ga a sa phela, o se sa tshwenya Moruti.”

50Jesu a kwa se ba se bolelago, gomme a re go Jairose: “Se tšhoge, sa gago a e be go dumela, gomme ngwana o tla tsoga.”

51Ge a fihla ga Jairose, a se dumelele motho yo mongwe go tsena naye, ge e se Petrose le Johanese le Jakobose le tatagongwana le mmagongwana.

52Ka moka ba be ba lla ba iletše ngwana. Jesu a re: “Le se ke la lla; ngwana yo ga se a hwa, o ithobaletše.”

53Bona ba mo sega, ka gobane ba be ba tseba gore ngwana o hwile.

54Jesu a mo swara ka seatla, a mmitša a re: “Ngwanaka, tsoga!”

55Moya wa gagwe wa boa, gomme a tsoga ka bjako. Jesu a laela gore a fiwe tša go ja.

56Batswadi ba ngwana ba tlabega, gomme Jesu a ba laya gore ba se ke ba di botša motho.