Luke 9 — Sotho 2000 (BIBELE Taba yea Botse)

1Jesu a bitša barutiwa ba gagwe ba lesome le ba babedi, a ba fa maatla a go leleka bademone bathong, le go ba fodiša malwetši.

2Ke moka a ba roma go yo bega molaetša mabapi le mmušo wa Modimo le go fodiša balwetši,

3a re go bona: “Ge le tloga le se ke la tšea selo, e ka ba lehlotlo, goba mokotlana wa mokgopedi, goba dijo, goba tšhelete, le ge e le seaparo sa bobedi.

4Ge le fihla motseng wo mongwe mme la amogelwa ka lapeng le lengwe, le dule go lona go fihlela le tloga motseng woo.

5Ge le ka re le fihla felo batho ba gona ba se le amogele, le tloge moo le hlohlora marole dinaong tša lena, e be go ba lemoša gore ba tla otlwa ke Modimo.”

6Ba ile ba tloga ba sepela le metse ka moka, ba begela batho Taba ye Botse ya mmušo wa Modimo, ba bile ba fodiša balwetši mo gohle.

7Ge Heroda, mmuši wa Galilea, a ekwa tšeo ka moka tše di bego di direga, a gakanega kudu, gobane batho ba bangwe ba be ba re go tsogile Johanese Mokolobetši bahung.

8Ba bangwe ba be ba re ke Eliya o boile, mola ba bangwe ba re go tsogile yo mongwe wa baprofeta bale ba kgale.

9Heroda yena a re: “Johanese ke mo kgaotše hlogo, bjale yo yena ke mang yo ke kwago ditaba tše tša gagwe?” Gomme a fela a leka go bona Jesu.

10Baapostola ba boela go Jesu, ba mo anegela tšohle tše ba di dirilego. A tloga le bona fela, ba ya motseng wo o bitšwago Betsaida.

11Ge batho ba ekwa gore o fao ba mo latela. Yena a ba gahlanetša, a ba botša tša mmušo wa Modimo, a fodiša ba ba tletšego go fodišwa.

12Ya re ge e šetše e le mathapama, barutiwa bale ba gagwe ba lesome le ba babedi ba tla go yena ba re: “Botša batho ba ba sepele, gore ba yo inyakela dijo le marobalo mo metseng le metsaneng ya kgauswi, gobane mo ke lešokeng.”

13Jesu a ba fetola a re: “Lena ba feng tša go ja.” Bona ba re: “Ga re na selo, ge e se dinkgwa tše tlhano le dihlapi tše pedi. Kgane o ra gore re ye go rekela lešaba le lekaaka dijo?”

14Gape banna ba ba bego ba le moo e be e ka ba ba dikete tše tlhano. Jesu a botša barutiwa ba gagwe a re: “Ba dudišeng ka dihlopha tša ba e ka bago ba masome a mahlano.”

15Ge ba seno ba dudiša bjalo,

16Jesu a tšea dinkgwa tšela tše tlhano le dihlapi tšela tše pedi, a lebelela legodimong, a di šegofatša, a di ngwathaganya, a di neela barutiwa ba gagwe gore ba di abele batho.

17Bohle ba ja ba khora. Barutiwa ba Jesu ba kgoboketša mašaledi, a tlala diroto tše lesome le tše pedi.

18Ka tšatši le lengwe e rile ge Jesu a ile go rapela a nnoši, barutiwa ba gagwe ba tla go yena. A ba botšiša a re: “Na batho ba re ke nna mang?”

19Ba mo fetola ba re: “Ba bangwe ba re ke wena Johanese Mokolobetši, ba bangwe ba re o Eliya, mola bangwe ba re yo mongwe wa baprofeta bale ba kgale o tsogile bahung.”

20Yena a ba botšiša a re: “Lena le re ke nna mang?” Gwa fetola Petrose a re: “Ke wena Mesia wa Modimo.”

21Jesu a ba laya tsebegokwa gore seo ba se ke ba se botša motho.

22A ba a ba botša a re: “Morwamotho o swanetše go tlaišwa kudu le go lahlwa ke bagolo ba setšhaba, le baprista ba bagolo, le boramangwalo. O tla bolawa, eupša ka letšatši la boraro a tsoga bahung.”

23A botša bohle a re: “Ge motho a nyaka go ba molatedi wa ka, a ikone, a ikemišetše go tlo tlaišwa bjalo ka nna, mme a ntatele.

24Gobane yo a ipabalelago o tla lahlega; eupša yo a itatolago ka baka la ka o tla phelela sa ruri.

25Etse motho go tla mo holang go rua lefase lohle, ge yena mong a lahlega goba a otlwa go ya go ile?

26Ge motho a se na sebete sa go bolela gore ke yena morutiwa wa ka, goba a se bege tše ke di rutago batho, gona Morwamotho le yena a ka se be le sebete sa go bolela gore motho yoo ke morutiwa wa gagwe, mohla a etla ka letago la gagwe le la Tatagwe le la barongwa ba bakgethwa.

27Ruri, ke le botša gore go na le ba bangwe mo, ba ba ka se kego ba hwa ba se ba bona Modimo a buša.”

28Ge go fetile matšatši a seswai go ba Jesu a bolela ditaba tše, a tloga le Petrose le Johanese le Jakobose, a rotogela thabeng go yo rapela.

29Ya re ge a rapela sefahlego sa gagwe sa fetoga, le diaparo tša gagwe tša taga bošweu bja go re pšoo!

30Gateetee ba bona banna ba babedi ba bolela le yena. E be e le Moshe le Eliya,

31ba be ba tšweletše ka letago mme ba bolela le Jesu ka mokgwa wo a bego a swanetše go hwa ka wona Jerusalema.

32Petrose le ba ba bego ba na le yena ke ge ba ile ka boroko, eupša ba re go phaphama ba bona Jesu a taga, ba bona le banna bao ba babedi ba bego ba eme le yena.

33Ge banna bao ba tloga, Petrose a re go yena: “Mong wa ka, ke mo gobotse bjang ge re le fa! A re hlomeng mešaša ye meraro, wo mongwe e be wa gago, mongwe e be wa Moshe, mongwe e be wa Eliya.” Gape o be a sa tsebe se a se bolelago.

34Ya re a sa bolela gwa tšwelela leru la ba pipetša, gomme ba boifa.

35Gwa kwagala lentšu le etšwa lerung leo le re: “Yo ke yena Morwa wa ka yo ke mo ratago; le mo theeletše!”

36Ge lentšu leo le homola ba bona go šetše Jesu fela. Barutiwa bao ba Jesu ditaba tše ba di homolela; tše ba di bonego mohlang woo ba se di botše motho.

37Ka tšatši le le latelago ge Jesu le barutiwa bale ba gagwe ba bararo ba theoga thabeng, a gahlanetšwa ke lešaba le legolo.

38Monna yo mongwe a goeletša a le gare ga lešaba a re: “Moruti, ke a go rapela, nke o šetše ngwanaka, gobane ke yena morwa wa ka a nnoši!

39Moya wo mobe o fela o mo utlautla, a goeletše, a akgege, a ntšhe maphilo ka molomo; o dula o mo kweša bohloko, gomme o mo tlogela ka sewelo.

40Ke ile ka kgopela barutiwa ba gago gore ba o leleke, eupša ba palelwa.”

41Jesu a mo fetola a re: “Aowii, lena moloko wa go hloka tumelo, wo mokgopo! Ke dule le lena go fihlela neng ke le kgotleletše?” Ke moka a re go monna yola: “Tliša morwago yoo mo.”

42Ya re ge mošemane yoo a etla, modemone yola wa mo utlautla a ba a akgega. Jesu a kgalema moya wo mobe woo a fodiša mošemane, a mmušetša go tatagwe.

43Batho ka moka ba kgotsa maatla a Modimo. E rile ge batho ba sa kgotsa tšohle tše Jesu a bego a di dira, yena a re go barutiwa ba gagwe:

44“Se ke tlilogo le botša sona le se ke la se lebala: Morwamotho o tlilo gafelwa diatleng tša batho.”

45Fela barutiwa ba gagwe ba se kwešiše se a se bolelago. Se be se ba utagetše ba sa se kwešiše, eupša ba šia go mmotšiša taba yeo.

46Barutiwa ba Jesu ba kile ba tšea kgang ka go re yo mogolo gare ga bona ke mang.

47Jesu a lemoga se ba se naganago, gomme a tšea ngwana a mo emiša ka thoko ga gagwe,

48gomme a re go bona: “Mang le mang yo a amogelago ngwana wa go etša yo ka ge e le se ke le laetšego sona, o amogela nna, le yo a amogelago nna o amogela le yo a nthomilego. Gobane yo e lego yo monyenyane go lena ka moka ke yena yo mogolo.”

49Johanese a re go Jesu: “Mong wa ka, re bone motho yo mongwe a leleka bademone ka go bolela leina la gago, mme ra mo iletša, ka ge e se wa rena.”

50Jesu a re go yena le barutiwa bale ba bangwe: “Le se ke la mo iletša, ka gobane mang le mang yo a sa lwego le lena o ema le lena.”

51E rile ge nako ya gore Jesu a rotogele legodimong e batametše, a ikemišetša go ya Jerusalema gomme a wela tsela a ya gona.

52A roma batseta ba mo eta pele, ba fihla ba tsena motseng wo mongwe ka nageng ya Samaria go mo kgopelela marobalo gona.

53Eupša batho ba gona ba se ke ba mo amogela, ka ge ba be ba bona gore o fetela Jerusalema.

54Ge barutiwa ba gagwe, Jakobose le Johanese, ba di bona, ba re: “Morena, na ga o rate ge re ka ba biletša mollo wa go tšwa legodimong gore o ba fediše?”

55Jesu a retologa a ba kgala.

56Ke moka yena le barutiwa ba gagwe ba fetela go wo mongwe motse.

57Ge ba ntše ba sepela, monna yo mongwe a re go Jesu: “Nna ke tla go latela gohle mo o yago gona.”

58Jesu a re go yena: “Diphukubje di na le ditšaba, le dinonyana di na le dihlaga; Morwamotho yena ga a na mo a fihlago hlogo gona.”

59A napa a re go monna yo mongwe: “Ntatele.” Eupša yena a mo araba ka go re: “Morena, ntumelele ke yo boloka tate pele.”

60Jesu ge a mo fetola a re: “Lesa bahu ba boloke bahu ba bobona. Wena eya o bege molaetša mabapi le mmušo wa Modimo.”

61Yo mongwe monna a re: “Nna ke tla go latela, Morena, fela ntumelele gore ke yo laela bešo pele.”

62Jesu a re go yena: “Yo a lebelelago morago a swere mogoma a lema, ga se a swanela mmušo wa Modimo.”