Mark 12

Sotho 2000 (BIBELE Taba yea Botse)

← Chapter 11 Jump to: Chapter 13 →

1Jesu a ba anegela ka go swantšha a re: “Go be go na le monna yo mongwe yo a bego a bjetše merara. A e ageletša ka legora, a epa molete moo wa go pitla diterebe ka maoto, a aga le tora ya tlhapetšo, a hirišetša balemi merara, ke moka a tšea leeto.

2Ge nako ya go fula diterebe e fihla, a roma mohlanka go balemi bale gore a yo mo tšeela diterebe tše e swanetšego go ba tša gagwe.

3Bona ba mo swara, ba mo itia, mme ba mo gomiša a se na selo.

4Mong wa serapa a buša a roma mohlanka yo mongwe go balemi bale; yena ba mo itia hlogo ba ba ba mo roga.

5Mong wa serapa a buša a roma mohlanka yo mongwe, mme yena ba mmolaya. Le ba bangwe ba bantši ba ile ba ba dira ka wona mokgwa woo wa go ba itia goba go ba bolaya.

6O tee yo a bego a sa šetše gore a ka rongwa, ke morwagwe, yo a bego a mo rata. Ka gona ya ba yena wa mafelelo yo a mo romago go balemi a re: ‘Morwa wa ka yena ba tla mo hlompha.’

7Eupša balemi bale ba lakana ba re: ‘Mojalefa šo; etlang re mmolayeng, gomme lefa la gagwe e tla ba la rena!’

8Ba mo swara, ba mmolaya, mme ba mo kgoromeletša ka ntle ga serapa sa merara.

9“Na mong wa serapa seo o tla dirang? Ga ke re o tla tla a bolaya balemi bao, mme serapa seo a se hirišetša ba bangwe?

10Kgane ga se la ka la bala ka Mangwalong a Makgethwa mo go thwego: “ ‘Leswika le baagi ba le nyaditšego e bile lona la sekhutlo.

11Se ke se se dirilwego ke Morena, se a re tlaba ge re se bona’?”

12Baetapele ba setšhaba ba rata go swara Jesu, ka ge ba be ba lemogile gore o ra bona ka seswantšho seo, fela ba be ba boifa lešaba. Ka gona ba mo lesa, mme ba tloga.

13Ba roma Bafarisei ba bangwe le Baheroda ba bangwe go yena gore ba yo mo rea ka potšišo.

14Ba fihla ba re go yena: “Moruti, re a tseba gore o motho wa go rereša, ga o na taba le gore batho ba gopolang, ka gobane ga o lebelele maemo a motho, eupša o rata therešo mabapi le tšeo Modimo a nyakago gore motho a di dire. Na go lebane ge re ntšhetša Kesare metšhelo, goba ga se gwa lebana? Re ntšhe metšhelo goba re se ke ra e ntšha?”

15Jesu a lemoga gore ba a ikgakantšha, gomme a ba botšiša a re: “Le ntheelang? Ntlišetšeng papetlana ya tšhelete gore ke e bone.”

16Ba mo tlišetša yona, mme a ba botšiša a re: “Seswantšho se ke sa mang le leina le?” Ba mo fetola ba re: “Ke tša Kesare.”

17Jesu a re go bona: “Gona ntšhetšang Kesare tše e lego tša Kesare, le Modimo le mo ntšhetše tše e lego tša Modimo.” Gomme ba tlabega.

18Basadusei ba bangwe ba tla go Jesu. Gape ke bona bale ba go se dumele gore bahu ba tla tsoga, gomme ba re go yena:

19“Moruti, Moshe o re ngwaletše molao wo o rego: ‘Ge monna a ka hwa a se na ngwana a tlogela mosadi, morathoagwe a tsenele mosadi yoo wa mohu, a tsošetše mogolwagwe lapa.’

20Go kile gwa ba le barwa ba motho ba ba šupago. Wa mathomo a tšea mosadi, eupša a hwa a se na bana.

21Wa bobedi a tsenela mosadi yoo wa mohu, eupša le yena a hwa a se na bana. Gwa ba bjalo le go wa boraro.

22Ka bošupa ga bona ba mo tsenela, eupša bohle ba hwa ba se na bana. Mafelelong mosadi yola le yena a hwa.

23Bjale mohla bahu ba tsoga, ka lona letšatši la tsogo ya bahu, mosadi yoo e tla ba wa ofe, ka ge ka bošupa ba be ba mo tsenetše?”

24Jesu a ba fetola a re: “Le a phoša! Ke ka baka la gore le sa tsebe Mangwalo a Makgethwa le maatla a Modimo.

25Gobane mohla bahu ba tsoga ba ka se nyale, ba ka se nyalwe – ba tla swana le barongwa ba legodimong.

26Gomme mabapi le go tsoga ga bahu, na ga se la ka la bala pukung ya Moshe mabapi le mošwana wola wa go tuka mollo, ka mo Modimo a boditšego Moshe a re: ‘Ke nna Modimo wa Abrahama, Modimo wa Isaka, Modimo wa Jakobo’?

27Ke Modimo wa ba ba phelago, e sego wa ba ba hwilego. Ruri, le phamogile kudu!”

28Yo mongwe wa boramangwalo yo a bego a theeleditše kgang yeo a bile a kwele ka mo Jesu a kgonnego go fetola Basadusei ka gona, a batamela, a botšiša Jesu a re: “Molao wo mogologolo gare ga melao yohle ya Moshe ke ofe?”

29Jesu a mo fetola a re: “Molao wo mogologolo gare ga melao yohle ya Moshe šo: ‘Theeletšang, lena setšhaba sa Israele! Morena Modimo wa rena ke yena Morena a nnoši.

30O rate Morena Modimo wa gago ka pelo ya gago ka moka, le ka moya wa gago ka moka, le ka tlhaologanyo ya gago ka moka, le ka maatla a gago ka moka.’

31Wa bobedi wo o lekanago le wona o re: ‘O rate bangwekawena bjalo ka ge o ithata.’ Ga go na molao wo mongwe wo o fetago yeo.”

32Ramangwalo yola a re go Jesu: “O boletše gabotse, Moruti! O rerešitše ge o re Morena ke yena Modimo a nnoši, ga go na yo mongwe ka ntle le yena.

33Gomme go mo rata ka pelo ka moka, le ka tlhaologanyo ka moka, le ka maatla ka moka, le go rata bangwekawena bjalo ka ge o ithata go phala go direla Modimo dihlabelo tša go tšhungwa ka moka le dihlabelo tše dingwe.”

34Ge Jesu a bona gore o fetotše ka bohlale, a re go yena: “Ga o kgole le mmušo wa Modimo.” Gwa se sa ba le yo mongwe yo a betago pelo a mmotšiša ditaba tše dingwe.

35Ya re ge Jesu a dutše a ruta batho ka Tempeleng, a ba botšiša a re: “Go tla bjang gore boramangwalo ba re Mesia ke setlogolo sa Dafida?

36Gobane Dafida ka boyena o boletše a tutuetšwa ke Moya wo Mokgethwa a re: “ ‘Morena o rile go Morena wa ka: Dula ka mo letsogong la ka la go ja ke be ke tle ke go fenyetše manaba a gago.’

37“Bjale ge Dafida a bitša Mesia ‘Morena’, Mesia e ka ba setlogolo sa gagwe bjang?” Batho ba bantši ba rata go mo kwa.

38Ge a ba ruta a re: “Le hlokomeleng boramangwalo ba ba ratago go hlwa ba sepela ba apere diaparo tše ditelele, le go dumedišwa ka tlhompho mapatlelong a motse,

39le go rata madulo a ka pele ka disinagogeng le menyanyeng.

40Ba tšeela bahlologadi dintlo tša bona, mme ba ikaketše ka go rapela dithapelo tše ditelele. Ba ikobela molato le go feta.”

41Ya re ge Jesu a dutše a lebane le polokelo ya Tempele, a bona ka mo lešaba le lokelago ditšhelete tša bona ka polokelong. Bahumi ba bantši ba be ba tšhela tšhelete ye ntši.

42Gwa tla mohlologadi yo mongwe wa modiitšana; yena a lokela dipapetlana tše pedi tša mphiri tša theko ye nyenyane kudu.

43Jesu a bitša barutiwa ba gagwe a re go bona: “Ruri, ke le botša gore mohlologadi yo wa modiitšana o tšhetše tšhelete ye ntši go feta bohle ba ba tšhetšego ka mo polokelong.

44Gobane ba bangwe ka moka ba tsopotše fela mahumong a bona, eupša mosadi yo wa modiidi yena o tšhetše tšohle tše a bego a na le tšona, tšohle tše a bego a tla phela ka tšona.”

← Chapter 11 Jump to: Chapter 13 →