Mark 6 — Sotho 2000 (BIBELE Taba yea Botse)

1Jesu a tloga moo a ya motseng wa gabo, mme barutiwa ba gagwe ba mo latela.

2Ka letšatši la Sabatha a thoma go ruta ka sinagogeng, gomme batho ba bantši ba ba mo kwago ba tlabega, ba botšišana ba re: “Ditaba tše o di tšere kae? Ke bohlale mang bjo a bo filwego bjo? Mehlolo yona o e kgona bjang?

3Kgane ga se mmetli yola e lego morwa wa Maria, ngwanaboJakobose le Josese le Judase le Simone? Ga ke re le dikgaetšedi tša gagwe di dula le rena?” Gomme a ba kgopiša.

4Yena a re go bona: “Moprofeta o hlompšha gohle, ge e se ga gabo le melokong ya gabo le lapeng labo.”

5O ile a se kgone go dira mehlolo felo fao, ge e se go fodiša balwetši ba se ba kae ka go ba bea diatla.

6A tlabja ke go se dumele ga bona. Jesu a šika le metse ya tikologo ya Nasaretha a tšama a ruta batho.

7A bitša barutiwa ba gagwe ba lesome le metšo ye mebedi, a ba roma ka babedi ka babedi, mme a ba fa maatla a go leleka meoya ye mebe bathong.

8A ba laela a re ba se ke ba tloga le selo, ge e se lehlotlo; a re ba se ke ba tšea mefago, goba mokotla wa mokgopedi, goba tšhelete ka dikhwama tša bona.

9A re ba rwale dieta, eupša seaparo sa bobedi ba se ke ba se tšea.

10A ba laya a re: “Ge le fihla motseng wo mongwe mme la amogelwa ka lapeng le lengwe, le dule go lona go fihlela ge le tloga motseng woo.

11Ge le ka re le fihla felo batho ba gona ba se le amogele goba ba se le theeletše, le tloge moo le hlohlora marole dinaong tša lena, e be go ba lemoša gore ba tla otlwa ke Modimo.”

12Ba ile ba tloga ba tšama ba begela batho gore ba sokologe.

13Ba leleka bademone ba bantši bathong, ba tlotša balwetši ba bantši ka makhura a mohlware, ba ba fodiša.

14Kgoši Heroda a kwa ka ga Jesu, ka gobane mo gohle batho ba be ba bolela ka yena. Ba bangwe ba be ba re: “Ke Johanese Mokolobetši o tsogile bahung, ke ka baka leo a nago le maatla a go dira mehlolo.”

15Ba bangwe ba re: “Ke Eliya.” Ba bangwe ba re: “Ke moprofeta go etša baprofeta bale ba kgale.”

16Heroda ge a di kwa a re: “Ke Johanese Mokolobetši yola ke mo kgaotšego hlogo, o tsogile bahung.”

17Gape yo ke Heroda yola wa go laela gore Johanese a swarwe. Ba ile ba mo tlema mme ba mo iša kgolegong ka ge Heroda a be a tšere Herodiase, mosadi wa Filipi, ngwanabo.

18Johanese Mokolobetši o ile a sola Heroda a re: “Ga se wa dumelelwa go tšea mosadi wa ngwaneno.”

19Herodiase o be a swere Johanese ka pelo a bile a rata go mmolaya, eupša a palelwa,

20ka gobane Heroda o be a boifa Johanese ka ge a be a lemogile gore ke monna wa go loka yo mokgethwa, ka gona a mo šireletša. O be a rata go fela a mo theeletša, le ge ka mehla a be a kgopišwa ke dipolelo tša gagwe.

21Ka tšatši le lengwe Herodiase a hwetša sebaka. E be e le ka tšatši la matswalo a Kgoši Heroda, mme yena a diretše bahlankedi ba bagolo ba mmušo, le balaodi ba madira, le bagolo ba naga ya Galilea monyanya.

22Gwa tsena morwedi wa Herodiase, mme a bina, a kgahla Heroda le baeng ba gagwe. Ka gona kgoši a re go yena: “Nkgopele se o se ratago, ke tla go fa sona.”

23A mo enela leboelela a re: “Se o ka nkgopelago sona ke tla go fa, le ge e ka ba go go arolela naga ya ka ka bogare.”

24Ka gona mosetsana a tšwa a yo botšiša mmagwe a re: “Ke kgopele eng?” Mmagwe a re: “Hlogo ya Johanese Mokolobetši.”

25Mosetsana a kitima a boela go kgoši, a fihla a mo kgopela a re: “Ke rata gore o mphe hlogo ya Johanese Mokolobetši ka sebjana gonabjale!”

26Kgoši a nyama kudu, eupša ka baka la ge a be a enne pele ga baeng, a se rate go gana.

27A napa a roma moleti wa gagwe yo mongwe a mo laela gore a yo tšea hlogo ya Johanese. Moleti yola a yo kgaola Johanese hlogo ka kgolegong.

28A e tliša ka sebjana a e fa mosetsana, mme mosetsana a e fa mmagwe.

29E rile ge barutiwa ba Johanese ba di kwa, ba tla ba rwala setopo sa gagwe, ba yo se boloka ka lebitleng.

30Baapostola ba boela go Jesu, ba mo anegela tšohle tše ba di dirilego le tše ba di rutilego batho.

31Ka ge batho ka bontši ba be ba etla go yena ba bangwe ba tloga, yena le barutiwa ba gagwe ba ile ba hloka le nako ya go ja. Ka gona a re go bona: “A re yeng mo gongwe mo re ka bago noši, gore le kgone go khutša gannyane.”

32Ke moka ba tloga ka leselawatle, ba ya felo mo gongwe mo go se nago motho.

33Fela batho ba ba bona ge ba tloga, le gona ba bantši ba tseba gore ba ya kae; ka gona ba tloga metseng ka moka ba sepela ka go itlhaganela, mme ba fihla lefelong leo pele ga ge Jesu le barutiwa ba gagwe ba fihla.

34Jesu ge a etšwa ka leselawatleng a bona lešaba leo le legolo, mme a le šokela gobane le be le le bjalo ka dinku tše di se nago modiša; mme a thoma go ba begela ditaba tše dintši tša mmušo wa Modimo.

35E rile ge letšatši le šetše le thapame, barutiwa ba gagwe ba tla go yena ba re: “Letšatši le šetše le thapame, le gona felo fa ke lešokeng.

36Botša batho ba gore ba ye metsaneng le metseng ya kgauswi go ithekela tša go ja.”

37Jesu a ba fetola a re: “Lena ba feng tša go ja.” Bona ba mmotšiša ba re: “A o ra gore re ye re reke dinkgwa tša dipapetlana tše makgolo a mabedi tša silibera gore re tle re ba fe ba je?”

38Jesu a ba botšiša a re: “Le na le dinkgwa tše kae? Sepelang le yo lebelela gore le na le tše kae.” Ge ba seno lebelela, ba tla go yena ba re: “Dinkgwa ke tše tlhano, dihlapi ke tše pedi.”

39Jesu a laela barutiwa ba gagwe gore ba dudiše batho ka moka ka dihlopha bjanyeng bjo botala.

40Batho ba dula fase ka dihlopha tša ba lekgolo le tša ba masome a mahlano.

41Jesu a tšea dinkgwa tšela tše tlhano le dihlapi tšela tše pedi, a lebelela legodimong, a tumiša Modimo, a mo leboga. A ngwathaganya dinkgwa tšela, a di nea barutiwa ba gagwe gore ba di abele batho. Dihlapi tšela tše pedi le tšona a di arolela bohle.

42Ka moka ba ja ba khora.

43Barutiwa ba topa marathana a dinkgwa tšela le a dihlapi tšela; gwa tlala diroto tše lesome le metšo ye mebedi.

44Banna ba ba ilego ba ja e be e le ba dikete tše tlhano.

45Jesu a kgareetša barutiwa ba gagwe gore ba tsene ka leselawatleng ba mo ete pele, ba ye motseng wa Betsaida, ka mošola wa letsha, ge yena a sa botša lešaba gore le boele magae.

46E rile ge a seno laelana le bona a rotogela thabeng go yo rapela.

47Mantšiboa ke ge leselawatle le šetše le le gare ga letsha, mme yena a le lebopong a nnoši.

48A bona barutiwa ba gagwe ba le mathateng a go sepediša leselawatle, gobane ba be ba sepela ba lebane le phefo. Ge go esa a tla go bona a sepela godimo ga meetse. O be a nyaka go ba feta,

49eupša bona ba mmona a sepela godimo ga meetse, gomme ba nagana gore ke seriti, ba hlaba mokgoši.

50Bohle ba tšhoga kudu ge ba mmona. Yena, ntle le go senya sebaka, a re go bona: “Betang dipelo, ke nna! Se boifeng!”

51A tsena ka leselawatleng go bona, mme phefo ya napa ya homola. Barutiwa ba gagwe ba tlabega kudukudu,

52ka ge ba be ba se ba kwešiša gabotse mohlolo wola wa go khoriša banna ba dikete tše tlhano; ba be ba sa kwešiše.

53E rile ge ba tshelela ka mošola wa letsha ya ba ba fihla nageng ya Genesarete, moo ba ilego ba bofa leselawatle la bona lebopong.

54Ge ba etšwa ka leselawatleng batho ba mo tseba ka pela.

55Ba itlhaganela ba ya mo gohle nageng yeo, ba thoma go rwala balwetši ba robetše magogweng a bona, ba ba iša mo ba kwago gore o gona.

56Mo gohle mo a tsenago gona, metsaneng le metseng le merakeng, batho ba be ba bea balwetši mapatlelong a motse mme ba mo rapela gore a ba dumelele go kgwatha le ge e ka ba morumo wa kobo ya gagwe; gomme bohle ba ba o kgwathilego ba be ba fola.