Revelation 14

Sotho 2000 (BIBELE Taba yea Botse)

← Chapter 13 Jump to: Chapter 15 →

1Ge ke lebelela ka bona Kwana e eme godimo ga thaba ya Sione. E be e na le batho ba dikete tše lekgolo le tše masome a mane le tše nne ba ba ngwadilwego leina la yona le la Tatago yona diphatleng tša bona.

2Ka kwa modumo o etšwa legodimong o swana le wa meetse a mantši, o etša wa tladi. O kwagala nke ke sefela se se letšwago ke baletši ka dikgapa.

3Batho bao ba be ba opela sefela se sefsa pele ga setulo sa bogoši, le pele ga diphedi tšela tše nne, le pele ga bagolo bale ba masome a mabedi le ba bane. Sefela seo se be se kgonwa fela ke bona bao ba dikete tše lekgolo le tše masome a mane le tše nne ba ba bego ba rekolotšwe gare ga batho ba lefase.

4Ke ba ba se ba kago ba itšhilafatša ka go robala le basadi; ba hlwekile. Ba latela Kwana gohle mo e yago gona. Ba rekolotšwe gare ga batho ba lefase, gomme ya ba bona ba mathomo ba go neelwa Modimo le Kwana.

5Ga se ba ka ba bolela maaka; ga ba na bosodi.

6Ka bona morongwa yo mongwe a fofa kua godimo moyeng, a ilo phatlalatša Taba ye Botse go badudi ba lefase: go merafe yohle, le dikgoro tšohle, le maleme ohle, le ditšhaba tšohle.

7A goelela a re: “Boifang Modimo le mo reteng! Gobane nako ya gore a ahlole batho e fihlile. Mo khunameleng, yena yo a hlodilego legodimo le lefase le lewatle le methopo ya meetse!”

8Morongwa wa bobedi a latela yola wa pele a re: “Owaa, o wele! O wele motsesaratlatla wa Babilone! Etse o be o tšhilafatša ditšhaba tšohle ka mediro ya wona ya bohlola. E be nke ke beine ye bogale ye o di nwešago yona.”

9Morongwa wa boraro a latela bale ba babedi ba pele, a goelela a re: “Yo a khunamelago sebata se le seswantšhobopša sa sona a ba a swaiwa phatleng goba seatleng

10o tla nwa beine ye e sego ya talošwa ye e lego kotlo ya Modimo, ye a e tšhetšego ka senwelong se e lego kgalefo ya gagwe. O tla hlokofatšwa ka mollo le tshebela pele ga barongwa ba bakgethwa le yona Kwana.

11Muši wa mollo wo ba hlokofatšwago ka wona o tla kuelela go ya go ile. Bao ba khunamelago sebata seo le seswantšhobopša sa sona, bao ba swailwego leina la sona, ga ba ehuge bošego goba mosegare.”

12Seo se ra gore badumedi, bona ba ba phethago melao ya Modimo mme ba botegelago Jesu, ba swanetše go ba le kgotlelelo.

13Ke ge ke ekwa lentšu le etšwa legodimong le re: “Ngwala o re: Ba lehlogonolo ke bao go tloga bjale ba tlago hwa e le ba Morena!” Moya wa fetola wa re: “Ee. Ba tla ikhutša mekatano ya bona, gobane tše ba di dirilego di sepela nabo.”

14Ge ke lebelela ka bona leru le lešweu leo godimo ga lona go bego go dutše selo se nkego ke motho a rwele mphapahlogo wa gauta, a swere sekele ye bogale ka seatla.

15Ke moka gwa tšwa morongwa yo mongwe ka tempeleng a goelela yola a dutšego lerung a re: “Tšea sekele ya gago o bune, gobane nako ya go buna e fihlile; bjale mabele lefaseng a budule.”

16Ke ge yola wa go dula godimo ga leru a tšea sekele ya gagwe, a buna mabele a lefase.

17Ka bona yo mongwe morongwa a etšwa ka tempeleng ya legodimong, le yena a swere sekele ye bogale.

18Yo mongwe morongwa a tšwa aletareng, yena e le yo a hlokometšego mollo. A goelela morongwa yola wa go swara sekele ye bogale a re: “Tšea sekele ya gago ye bogale o kgothe dintšhuhla tša diterebe tša lefaseng, gobane di budule!”

19Morongwa yola a tšea sekele ya gagwe, a kgotha diterebe tša lefaseng, a di lahlela ka bopitlelong bja diterebe bja kgalefo ye kgolo ya Modimo.

20Diterebe tšela tša pitlwa ka maoto ka bopitlelong bja diterebe ka ntle ga motse, gomme ka moo bopitlelong gwa tšwa madi, a ela monabo wo e ka bago dikilometara tše makgolo a mararo le metara o tee le seripa go iša fase.

← Chapter 13 Jump to: Chapter 15 →