Revelation 2

Sotho 2000 (BIBELE Taba yea Botse)

← Chapter 1 Jump to: Chapter 3 →

1“Ngwalela morongwa wa Modimo wa phuthego ya Efeso o re: “Yo a swerego dinaledi tše di šupago ka seatla sa la go ja, yo a sepelago gare ga dihlomamabone tše di šupago tša gauta o re:

2Tše le di dirago ke a di tseba; ke tseba le maitapišo a lena, le kgotlelelo ya lena, le go tenwa ke bokgopo ga lena, le gore bao ba ipitšago barutiwa etšwe e se bona le ba lekotše mme la lemoga gore ke bafeane.

3Le na le kgotlelelo, le tlaišitšwe ka baka la ka, gomme ga se la lapa.

4Eupša se ke le solelago sona ke ge le se sa nthata bjalo ka pele.

5Gopolang gore le be le nthata bjang. Sokologang, gomme le dire tše le bego le di dira pele. Ge le sa sokologe, ke tla tla go lena ka tšea sehlomamabone sa lena madulong a sona.

6Fela se se ka le holago ke gore le hloile tše di dirwago ke Banikolaite, bjalo ka ge le nna ke di hloile.

7“Yo a nago le tsebe a a kwe se Moya o se botšago diphuthego. “Yo a ka fenyago ke tla mo fa dikenywa tša sehlare sa bophelo se se lego ka Paradeising ya Modimo, a ja.”

8“Ngwalela morongwa wa Modimo wa phuthego ya Smirna o re: “Yo e lego Mathomo le Mafelelo a dilo ka moka, yo a ilego a hwa mme a phela gape, o re:

9Ke tseba mathata a lena le bodiidi bja lena, fela nnete ke gore le bahumi. Ke tseba dikgobošo tše bao ba ipitšago Bajuda etšwe e se bona ba le pharago ka tšona; gape bona ke ba phuthego ya Sathane.

10Le se ke la boifa tše le tlilogo hlokofatšwa ka tšona. Theeletšang! Sathane o tlilo lahlela ba bangwe ba lena kgolegong gore Modimo a le leke, gomme matshwenyego a lena a tla tšea matšatši a lesome. Le mpotegele, le ge e le gore seo se ka le iša lehung, gomme ke tla le putsa ka bophelo bjo bo sa felego.

11“Yo a nago le tsebe a a kwe se Moya o se botšago diphuthego. “Yo a ka fenyago, lehu la bobedi le ka se mo dire selo le gatee.”

12“Ngwalela morongwa wa Modimo wa phuthego ya Pergamone o re: “Yo a swerego tšhoša ya magale a mabedi o re:

13Mo le dulago gona ke a go tseba, ke mo go lego setulo sa bogoši sa Sathane. Le mpotegetše, ga se la lahla tumelo ya lena, ešita le nakong yela Antipase yola wa go bega molaetša wa ka ka potego a bolailwe moo ga gabolena mo go dulago Sathane.

14Fela go na le dilwana di se kae tše ke le solelago tšona: Moo go lena go na le ba ba sa kgomaretšego thuto ya Bileamo yola wa go hlohleletša Balaka go diriša setšhaba sa Israele dibe ka go ba leša didimo le go ba febiša.

15Ka wona mokgwa wo mobjalo, moo go lena go na le ba ba latelago dithuto tša Banikolaite.

16Bjale ge, sokologang! Ge le sa sokologe ke tla tla go lena ka pejana ka lwa le batho bao ka tšhoša ye e tšwago ka molomong wa ka.

17“Yo a nago le tsebe a a kwe se Moya o se botšago diphuthego. “Yo a ka fenyago ke tla mo fa manna a a fihlilwego. Ke tla mo fa le leswikana le lešweu leo go lona go ngwadilwego leina le lefsa le le sa tsebjego ke motho ntle le yena yoo a le fiwago.”

18“Ngawalela morongwa wa Modimo wa phuthego ya Tiatira o re: “Morwa wa Modimo yoo mahlo a gagwe a lego bjalo ka kgabo ya mollo, maoto a gagwe a phadimago baibai, o re:

19Tše le di dirago ke a di tseba. Ke tseba le lerato la lena, le tumelo ya lena, le go direla ba bangwe ga lena, le go kgotlelela ga lena. Ke tseba gore tše le di dirago bjale di feta tše le bego le di dira pele.

20Fela se ke le solelago sona ke gore le dumelela mosadi yola ba rego ke Isebele, a ipitšago moprofeta, go ruta le go fora bahlanka ba ka gore ba febe, le gore ba je didimo.

21Ke mo file nako gore a sokologe, eupša ga a nyake go sokologa bofebeng bja gagwe.

22Ka gona ke tla mo otla ka go mo dira molwetši wa kobo, le bao ba bego ba otswa naye ke tla ba hlokofatša kudu, ge ba sa sokologe bokgopong bjo ba bo dirago le yena.

23Le gona ke tla bolaya balatedi ba gagwe ka bolwetši bja leuba. Ke mo diphuthego ka moka di tlago tseba gore ke nna ke tsebago tša ka pelong ya motho gabotse. Yo mongwe le yo mongwe wa lena ke tla mo otla go ya ka tše a di dirilego.

24“Eupša lena ba bangwe ba Tiatira ga se la latela thuto yeo; ga se la ithuta tšeo go thwego ke ‘diphiri tše dikgolo tša Sathane’. Ke le tsebiša gore nka se le rweše morwalo wo mongwe.

25Fela le sware seo le nago le sona le se tiiše go fihlela ke etla.

26Yo a ka fenyago a ba a phetha tše ke di nyakago go fihlela mafelelong a lefase, “ke tla mo fa maatla a go buša ditšhaba.

27O tla di buša ka lepara la tshipi, a ba a di pšhatlaganya bjalo ka pitša.

28“Ke ona maatla a ke a filwego ke Tate. Ke tla ba ka mo fa le naledi ya Mphatlalatšane.

29“Yo a nago le tsebe a a kwe se Moya o se botšago diphuthego.”

← Chapter 1 Jump to: Chapter 3 →