bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Daniel 7
Daniel 7
Sukuma 2019
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 8 →
1
Mū ng'waka gwa kwandya gwa ntemi Belishaza wa Babuloni, ū Danyeli walī alaalile ūloota shilooti; na shakoolechiwa shūyiza ū mu maganiko gakwe. Ī mihayo mitaale ya mu shilooti shakwe wīyandīka.
2
Ū Danyeli akahaya, “Ū mu shakoolechiwa shane sha mu makanza ga būjikū, aho nalolile nūbona miyaga īnè ya kūfuma ng'wigūlū īkwīyugūūlaga ī nyanza ī nhaale.
3
Hūna mashiinū anè mataale gūfuma ū mu nyanza, būlī lyene līlī heeke ū kū bichalyo.
4
Ī lya kwandya lyalī likolile na shimba, alīyo lyalī na manana ga ng'hoonà. Nakalīkalalīla, kwimanīla a manana galyo gaatīnwa, hūna lyūgūngūmūlwa a hasī lyīmīīla na magūlū abīlī gītī munhū, nīyo linhwa na ng'holò ya shimunhū.
5
Ī līshiinū lya kabīlī nalyo lyalī bbihī henaho, ī lyene lyalī likolile na ndūba. Lyalī lihūūmile, ū lwandī ū lūmò lyūgūngūha, ū mu nomo gwalyo lyalī na mbazu idatū lījilumile na mino galyo. Kwimanīla lya wīlwa, ‘Būūkaga ūlye wigūte!’”
6
Hanuma ya henaho, aho nataalī nalolile, nūbona līshiinū līngī a ha būtongi bone, lya kūbiza gītī sūbī. A ha ngongo gwalyo lyalī na manana gītī ga noni; ī līshiinū lyenīlo lyalī na mitwe īnè, līkinhwa būdūla bo kūsuga.
7
Hanuma ya henaho aho nataalī ū mu shakoolechiwa shane sha makanza ga būjikū, aho naalola nūbona a ha būtongi bone shiinū ya kanè, ya magaka na ya kogohya no, nīyo hangī yalī na nguzu no. A mino gayo gaalī mataale ga chūma, īsho yūshidima yashipaanagūlaga yashilya, a masaagīīlwa yagatoba hasī na magūlū gayo. Ī yoi yalī ītikolile nī shiinū ī jingī pyī ī jose; nīyo yalī na mapembe ikūmi.
8
Aho nataalī nūgideedeng'hanya a mapembe genayo, kwimanīla lyapumūka ipembe līngī nalolile, ī lyene ido, lyūpuluka, lyūbiza hamò na a gangī; adatū ū mu mapembe a ga kwandya gūmogoka kūfuma ng'witina kūlīlekela ng'wanya ī lipembe ī lido lyenīlo. Ī lipembe lyenīlo lyalī na miso gītī ga munhū, na nomo gwa kūyūhaya mihayo ya nyadooshi.
9
Aho nataalī nalolile, masumbī gūhelwa, hūna ū wa shikū ningī wigasha a h'isumbī lyakwe. Ī shizwalo shakwe shaalī shape no, gītī mawe ga mbula, hama ī nzwīlī ja kū ntwe gwakwe jalī jape gītī booya bo ng'holo yape. Ī lisumbī lyakwe lya būtemi lyalī līpīndiwe ndali ja moto, na a madandali galyo gaabakaga moto pye a gose.
10
Mongo gwa moto gwahūūmaga, gūkūselaga kūfuma kū būtongi bokwe. Shihūmbī na mashihūmbī bantūmamīlaga; makūmi ga mashihūmbī ng'hangala makūmi ga mashihūmbī baalī bīmīīla ū kū būtongi bokwe. Ī libanza ligasha, na a mashitabo gūkundūlwa.
11
Nakakalalīla no kūlwa nguno ya mihayo ya nyadooshi īyo lyīhaya ī lipembe; līkabīta ikanza ilīhu nataalī nakalalīlile, kūshisha ī shiinū yenīyo yūbūlagwa, ū mīlī gwayo gūbipiwa no hūna gūponyiwa mu moto gūkūligimaga.
12
(Ī shiinū ī jingī najo jikīngījiwa ū būdūla wajo, gwike jūzunīlījiwa kwikala ho ikanza ilebe.)
13
Ū mu shakoolechiwa shane sha makanza ga būjikū, aho nalolile nūmona ū kū būtongi wane ūmò wa kūbiza gītī Ng'wana wa Munhū, aliza mu malunde ga ng'wigūlū. Akang'wegeela ū wa shikū ningī, wenhwa kū būtongi bokwe.
14
Winhwa būdūla, ikūjo na būtaale bo nyasugi; banhū bose, mahanga ga banhū ba būlī lūlīmi būnamya. Ū būsugi bokwe būlī būsugi bo welelo na wlelo, na būtūbīta, ū būtemi bokwe būtūkenaagūlwa.
15
Hūna lūūlū ū nene Danyeli nakakoya no ū mu moyo, ī shakoolechiwa īsho shikayiza ū mu maganiko gane shikanizwanja.
16
Nūng'wegeela ūmò wa babo baalī bīmīīla henaho, nūmūja a makūlū gayo gete ī mihayo yenīyī. Ūniwīla na kūnishomelegeja a makūlū gayo.
17
A mashiinū a mataale ay'anè gene mabūsugi ayo gakwilonga ū mu sī.
18
Alīyo a beela bakwe ūyo Alī Higūlya no bakwanukūla būtemi ūbo būkūbiza wabo ilalī; alichene, welelo na welelo.
19
Hūna nūkooba kūmana a makūlū ga ng'hana a ga shiinū ya kanè īyo yalī ītikolile nī jingī pyī ī jose, īyo yalī ya kogohya kūheeba, ya mino ga chūma na maala ga shaba; ī shiinū īyo yashipaanagūlaga na kūshilya īsho yūshidima, a masaagīīlwa yagatoba hasī na magūlū gayo.
20
Nūbūūja nī mihayo ya mapembe ay'ikūmi, ayo gaalī ha ntwe gwayo ī shiinū yenīyo, nī lipembe ī līngī īlo līkapumūka, īlo līkenheleja mapemb'adatū gamogoke, īlo lyalī itale kūgaheeba a gangī, na lyalī na miso na nomo gwa kūyūhaya mihayo ya nyadooshi.
21
Aho nataalī nalolile nūbona ī lipembe lyīnīlo lyandya kwilwisha būlūgū na a beela, nīyo lyūbaheeba,
22
kūshisha ū wa Shikū Ningī wiza kūfunya būlamuji; ū būpyeni ūbinha a beela bakwe ūyo Alī Higūlya no, nī likanza lya beela kūbūdima ū būtemi.
23
Ūyo nakamūja akanisomboolela alīhaya: Ī shiinū ya kanè būlī būtemi bo kanè ūbo būkwilonga ū mu sī. Būkūbiza būtikolile nū būtemi ū būngī pyī ū bose, na būkūshilya pyī ī sha mu sī na kūshitoba hasī na kūshipaanagūla.
24
A mapembe ikūmi wene batemi ikūmi ūbo būkwilonga kūfuma ū mu būtemi wenūbū. Hanuma ya būtemi ikūmi wenūbo, akwilonga ntemi ūngī ūyo akūbiza atikolile nabo abo baalī baatonga; akūbaheeba batemi badatū ū mubo.
25
Akūyūhaya mihayo ya kūnsondagūla ūyo Alī Higūlya no, na a beela bakwe akūbaluhya, na kūgema kūgagalūcha a makanza ayo gatūūlilwe ho, nī shilagīlo. A beela bakwinhwa kūlī we ng'wikanza, makanza, na nusu ikanza.
26
Alīyo ī libanza līkwigasha, hūna ū būdūla bokwe akwīngījiwa, hanuma būkenaagūlwe būshile ho welelo bose.
27
Hūna ū būsugi nū būdūla, nū būtaale wa mabūtemi pye a gose a ha sīlīlī y'igūlū būkūtūūlwa mu makono ga beela, a banhū bakwe ūyo Alī Higūlya no. Ū būtemi bokwe būkūbiza būtemi bo welelo na welelo, hūna pye a basugi bakūnamya na kūng'wigwa we.
28
Ū wenūbū hū būgelelo wa mhayo. Ū nene Danyeli gakanikoya no a maganiko gane, nū būshū wane būjilūka; gwike ū mhayo nakagūbisa gwikala gwane dūhū iyene.
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 8 →
All chapters:
1
2
3
4
5
6
7
8
9
10
11
12