Esther 2

Sukuma 2019

← Chapter 1 Jump to: Chapter 3 →

1Aho yabīta ī yenīyī, ū moyo gwakwe ū ntemi Ahasuelo gwika, ūng'wizūkwa ū Vashiti, nī yīyo walī wīyīta, nī yīyo yalī yamala kūtūūlwa mu shilagīlo kūlwa nguno yakwe.

2A batūmami ba ntemi būng'wīla, “Baba ntemi, Īkūbelela ū ntemi akoobelwe banhya basoga.

3Ū ntemi ni watūūla banhū ū mu sī pyī ījo ajisugile, babasoleleje pye a banhya a basoga babenhe mu nzengo gwa Susa a h'ikūlū aha. Ū Hegai ū nsoloolwa wa ntemi, ū nang'hani wa bakīma, akūbalang'hana; binhwe na shikolo sha kūbagunanha kwigaliila, babize basoga jigi.

4Hūna ū munhya ūyo alantoge ū ntemi, abize ngole a ha ng'wanya go ng'wa Vashiti.” Ū mhayo gwenūyū gūnyeja ū ntemi, wīta chene ng'hana.

5Ū mu nzengo gwa Susa walīho ngosha Nyudaya, lina lyakwe Modekai, ng'witūnja o ng'wa Yaili, ng'witūnja o ng'wa Shimei, ng'wana Kishi; wa mu lūganda lwa ng'wa Benjamini.

6Ū wei walī ūmò wa banhū abo baalī basaamiwa na ntemi Nebukadineza wa Babuloni, kūfuma Yelusalemu; walī ūmò wa banhū abo bakasaamiwa hamò na ntemi Yekonia wa Yuda.

7Walī n'ilūmbūye witanagwa Hadasa, ūyo olī anelile; a ba ise nū nina baalī bazumalīka, h'ī chene ū Modekai akansola ūnela, ūbiza gītī nshīke okwe. Ū ng'wanikī ng'wenūyo lina līngī witanagwa Esta; nīyo olī n'ihanga isoga no ū kūlola.

8Hūna lūūlū aho shafunyiwa ī shilagīlo sha ntemi, banhya bingī būbilingwa; benhwa ū mu nzengo gwa Susa, biza būtūūlwa mu makono ga ng'wa Hegai. Nū Esita ūtwalwa ū kwikūlū lya ntemi, nang'hwe ūbiza ūmò wabo abo balang'hanagwa na Hegai, ūyo walī nang'hani wa bakīma.

9Ū Hegai ūnyegela ū ng'wanikī ng'wenūyo, ūmona gīkī igeleelilwe; hūna ūng'winha ī shikolo ī sha kwigaliila ongeje ū kūbeela, nī sha kūlya ī sha kūbeeja mīlī. Ūng'winha na banikī mpungatī, būsolanyiwa kūfuma mu banikī ba ng'wikūlū; babize ba kūyūntūmamīla, hūna ūntūūla hamò na a bagunanhi bakwe, h'ipandī lyawiza ū ng'wikūlū ng'wenūmo.

10Ū Esita walī ataalī ū kūlīhaya ī lihanga lyakwe, nūūlū ī fumo ya banhū ba shibyalīlwe shakwe, nguno ū Modekai walī wanemeja ū kwimanīcha.

11Būlī lūshikū ū Modekai wayela yelaga a ha būtongi w'ibīndo lya numba ya bakīma yenīyo, amane ūmo walī ū Esita, nū mumo yajīlaga ī mihayo yakwe.

12Ng'wanikī ose ose aho ataalī kūja ū kwibona nū ntemi Ahasuelo, yalī īng'wigeleelilwe kūmala myeji ikūmi n'ībīlī akwigaliilaga abeele jigi, h'ūmo baalī bahelelilwe a bakīma; myeji ītandatū bakwībilaga maguta ga būlenji, na myeji ītandatū bakūtūmamīlaga būgota bo kūbeeja ikoba lya mīlī, na malashi ga mbika na mbika.

13Ūlū lyūshika ī likanza lya kūja ū kūlī ntemi, ū ng'wanikī walī azunīlījiwe kūlomba shose shose īsho ūtogwa kūjana ū kwikūlū lya ntemi, ūsola kūfuma ū mu numba ya bakīma.

14Wa kūja mhīndī, wīnga koi dilū, washikīla kū numba yīngī, nayo ya kūlang'hanīlwa bakīma; ī yene yalī ha sīlīlī ya ng'wa Shashigazi, nang'hwe nsoloolwa wa ntemi, ūyo wabalang'hanaga a bake ba ntemi. Ū ng'wanikī ng'wene walī atazunīlījiwe kūja hangī ū kūlī ntemi, numho ū ntemi antogwe, ang'witane na lina lyakwe.

15Hūna lūūlū, ū Esita ū nshīke o ng'wa Abihaili lūshika nang'hwe ū lūdīīma lwakwe lwa kūja ū kūlī ntemi. Ū ise ū Abihaili, walī ise ndo o ng'wa Modekai; ū Modekai h'ūyo walī wansola ū Esita ūnela, ūng'wisaaba kūbiza nshīke wakwe. Ū ng'wanikī ng'wenūyo atalombile shose shose, ūja dūhū nī shisho shikahayiwa na Hegai, ū nsoloolwa wa ntemi, ūyo walī nang'hani wa bakīma. Gwike pye a banhū abo bamonaga ū Esita wabayejaga.

16Aho alītwalwa ū mu numba y'ikūlū ūmo wikalaga ū ntemi Ahasuelo, gwalī ng'weji gw'ikūmi, mu ng'weji gwa Tebesi, ng'waka gwa mpungatī gwa būsugi bokwe.

17Ū ntemi ūntogwa no ū Esita, kūtinda pye a bakīma a bangī, ūdutwa no ūnyegela kūbaheeba pye a banhya a bangī. Ūntūūlīla ī ngikili ya nyagole, ūng'wīta kūbiza ngole, a ha ng'wanya go ng'wa Vashiti.

18Hūna ū ntemi ūbeeja shigukulu kūlwa ng'wa Esita, būlaalīkwa pye a bana ng'oma, na a batūmami bakwe. Ūlagīja pye a banhū ba mu sī ījo walī ajisugile bifuule ī milīmo ū lūshikū lwenūlo, ūbagabanhya na manong'ho kūlwa wiza ng'holò wakwe wa nyatemi.

19A banhya bibilinga hangī lūkangala lwa kabīlī, ī likanza lyenīlo ū Modekai ūkigasha ha mita gwa ha ng'wa ntemi.

20Ū Esita wasangwa ataalī ū kūbawīla ī fumo ya shibyalīlwe shakwe, nūūlū ī lihanga lyakwe, ūmo Modekai walī wanangīīlīla, nguno ū Esita walī ataalī ang'wigwile ū Modekai, gīt'ūmo wītīlaga dūhū aho ataalī anelile.

21Ū ng'wikanza īlo walī igashije ha mita gwa ha ng'wa ntemi ū Modekai, batūmami babīlī ba ntemi, balang'hani ba ha mita: Bigisana na Teleshi, bandya kūnsīīga ū ntemi Ahasuelo. Bakoobaga nzīla ya kūmūlaga, nguno baalī bampelanīla.

22Ū Modekai ūgwigwa ū mhayo gwenūyo, ūng'wīla ū ngole Esita, ū Esita nang'hwe ūng'wīla ū ntemi, mu koolecha gīkī ū ng'wenhi wayo ī yenīyo walī Modekai.

23Ū mhayo gwenūyo aho gwagīsīlījiwa chiza gūbonwa gīkī gūlī chene ng'hana, a banhū benabo būbūlagwa bo kūnungelejiwa ha līntī. Hūna gwandīkwa mu shitabo sha mihayo ya kajīle ka shikū, nū ntemi alīho alolile.

← Chapter 1 Jump to: Chapter 3 →