Esther 5

Sukuma 2019

← Chapter 4 Jump to: Chapter 6 →

1Aho lwashika ū lūshikū lwa kadatū, ū Esita ūzwalīla ī shizwalo shakwe ī sh'ikūjo lya nyagole, hūna ūkīmīīla a ha būtongi bo nyango ū gwa kwingīlīla ng'wibīndo lya mu gatī lya numba y'ikūlū, kū būtongi bo chumba sha ntemi. Ū ntemi nang'hwe ūsangwa igashije h'isumbī lyakwe lya būtemi, alolelile ū kū nyango.

2Aho wamona ū ngole Esita wīmīīlaga ū ng'wibīndo, ūyega ūng'olota na nang'ha gwa zahabu ūyo walī nago mu nkono gwakwe. A henaho ū Esita wegeela ūshika ūgūkuumya ū nang'ha ū kū neno.

3Ū ntemi ūmūja, “Ngole Esita, ūlī na mhayo kī? Ūlīlomba shikolo kī? Ūkūpandīka dūhū nūūlū īkabiza nusu ya būtemi!”

4Esita ūshosha, “Ūlū gūlīnyeja ū ntemi nalīlomba ize ī lelo, nū Hamani, kū shigukulu īsho nameegejaga.”

5Haho na haho ū ntemi ūlagīja alīhaya, “Ng'wīlagi ko ize wangū ū Hamani, twīte īyo yahayiwa na Esita.” Na ng'hana ū ntemi nū Hamani būja ū kū shigukulu īsho walī washibeeja ū Esita.

6Aho balīng'wa divai, ū ntemi ūmūja hangī ū Esita, “Ī ng'hūmbū jako jilī ha mhayo kī? Ūkwinhwa dūhū. Ūlīlomba mhayo kī? Nūūlū īkabiza nusu ya būtemi ūkūshikīlīgījiwa!”

7Ū Esita ūshosha ūhaya, “Ī ng'hūmbū jane nū kūlomba kwane kūlī gīkī,

8Ūlū nanukūlagwa ū mu miso ga ntemi, na gūbize gūlīnyeja ū ntemi ū kūnīītīla gīt'ūmo jilī ī ng'hūmbū jane nū kūlomba kwane, nalīlomba nī ntondo ize hangī ū ntemi nū Hamani, kū shigukulu īsho nalababeegeje. A henaho hū nakwīta ūmo alīnilombela ū ntemi.”

9Ū lūshikū lwenūlo ū Hamani aho alīfuma ī hanze gwalī gwayega no ū moyo gwakwe, alīyo aho wamona ū Modekai a ha mita gwa ha ng'wa ntemi, ūbona waleka ū kūbūka, nūūlū atadetemile ū kū būtongi bokwe, akampelanīla no ū Modekai.

10Gwike a hene akihaamalaja, ūja kū ng'wakwe. Aho washika witana banwani biye, nū Zeelà ū nke wakwe.

11Hūna ū Hamani wandya kūbasomboolela, akwikumīlījaga kūlwa būsabi bokwe, nū wingī wa bitūnja bakwe, nī gīkī ū ntemi wang'winhile ikūjo, ūnsunang'hīja h'isumbī lyawiza kūbaheeba pye a bana ng'oma biye, na a batūmami a bangī.

12Ū Hamani ongeja kūhaya, “Nīyo ītagelelile henaho dūhū, nū ngole Esita atitanile munhū ūngī wa kūja nū ntemi ū kūlya ī shigukulu īsho walī washibeejaga, ūlū ītī nene iyene. Hama wanegelejaga hangī, nī ntondo nalīja nū ntemi.

13Alīyo ūlū nataalī nakūmonaga ū Nyudaya ng'wenūyo, ū Modekai, igashije a ha mita gwa ha ng'wa ntemi, pyī ī yenīyī ītī na solobo nūūlū hado ū kūlī nene!”

14Ū nke wakwe ū Zeelà na a banwani biye būng'wīla, “Lagījaga gūsīmbīlwe ngamba gwa būlīhu wa fuuti makūmi mpungatī n'itanò kūja ng'wigūlya; hūna ī ntondo ī dilū ūng'wīle ū ntemi anungelejiwe henaho ū Modekai, gūkwika ū moyo gwako. Hūna lūūlū ūlū ūja nū ntemi ū kū shigukulu, ūkūja ūkashilūmbe.” Ū mhayo gwenūyū gūbeela ū kūlī Hamani, ūlagīja ng'hana lyūbeejiwa ī līntī.

← Chapter 4 Jump to: Chapter 6 →