bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Mark 7
Mark 7
Sukuma 2019
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 8 →
1
Hūna Bafalisayo na balangi balebe ba shilagīlo, ba kūfuma Yelusalemu, bibilinga biza aho walī ū Yesu.
2
Būbabona bahemba bakwe bamò na bamò bakūlyaga shilīwa na makono masoso, hū kūhaya baalī batakalabile kūlenganīla na shīmīle īsho shalekwa na bataale babo.
3
Nguno a Bafalisayo, na a Bayudaya pye a bose, batalyaga shilīwa ūlū batakalabile chiza a makono gabo. Bīītaga gīko kūlwa kūdima shīmīle sha kūlekwa na bataale babo.
4
Nūūlū benha shikolo shose shose kūfuma kwigūlilū, baalī batashilyaga aho bataalī kūshooja tame. Yalīho na mihayo yīngī mingī īyo baalī bīdimile kūlwa shīmīle shenīsho, gītī mbika ndebe ja koogeje ka shikombe na nungū na mafulīla, būyaga na meza!
5
Hūna lūūlū a Bafalisayo na a balangi ba shilagīlo benabo, būmūja ū Yesu gīkī, “Nibūlī a bahemba bako bakūlyaga shilīwa na makono masoso, batūshimīzīlaga ū mu shīmīle īsho twalekelwa na bataale?”
6
Nang'hwe ūbawīla, “Bing'we bibeeleja, ū Isaya akatūngīlīja ū kūmuhangīla, ūmo yandīkīlilwe gīkī, ‘A banhū aba banikūgije bo ha nomo dūhū, alīyo īng'holò jabo jilī kūle nū nene.
7
Bakanilamyaga dalali, kūnū būlanga malange ga kūlagīlwa na banhū.’
8
A bing'we h'abo mushilekile ī shilagīlo sha ng'wa Mulungu kūlwa kūdima shīmīle sha banhū!”
9
Ongeja kūbawīla hangī gīkī, “Nīyo a bing'we h'ūmo mulī, nguno mutogilwe kūshisundīla ha mhelo ī shilagīlo sha ng'wa Mulungu, gīkī mudimane na shīmīle shing'we.
10
Nguno ū Musa ahayile gīkī, ‘Nkūjage so na noko,’ na gīkī, ‘Ūyo ūndūka ise nūūlū nina shing'wigeleelilwe abūlagwe!’
11
Alīyo a bing'we muhayile gīkī, ūlū ose ose ūlinda ūng'wīla ise nūūlū nina gīkī, ‘ī shikolo shane īshi ni shakūgunanha, gwike shilī Kolibani (makūlū gaho inong'ho kūlī Mulungu),’
12
hūna ng'hana mutūnzunīlīja gete ang'wītīle mhayo gose gose ū ise nūūlū ū nina!
13
Ū mu gīko mukagūkenaagūlaga ū mhayo go ng'wa Mulungu kūlwa kūlondeela shīmīle shing'we, īsho mukilekela lekelaga, nīyo īlīho mingī ī ya mbika jenījo īyo mukayītaga.”
14
Hūna ū Yesu ūlitana hangī ī libita lya banhū, ūbawīla gīkī, “Bing'we nidegelekagi pye a bose ng'witegeleje.
15
Shitīho shose shose īsho shilī hanze ya ng'wa munhū īsho shidūgije kūnsosohaja ūlū shūng'wingīla, alīyo īsho shikamfumaga h'īsho shikansosohajaga. [
16
Ūyo alī na matū gakigwaga ni igwage.]”
17
Aho wabīngīla a banhū wingīla mu kaya, a bahemba bakwe būmūja a makūlū ga lūsumo lwenūlo.
18
Nang'hwe ūbawīla, “Na a bing'we hū gūmò dūhū, mutaalī ū kwitegeleja? Mutamanile gīkī, būlī shikolo īsho shilī hanze ya ng'wa munhū ūlū shūng'wingīla shitūdūla ū kūnsosohaja?
19
Mutamanile gīkī shikingīlaga mu nda, ītī mu moyo gokwe? Nī gīkī ī ng'halīlo yaho īkabizaga kūfuma hanze kwitogolo?” (Ū mu kūhaya gīko akasheeja pyī ī shilīwa.)
20
Ongeja kūhaya hangī gīkī, “Īsho shikamfumaga ū munhū, hū shene īsho shikansosohajaga.
21
Nguno ū mung'holò ya ng'wa munhū, gakafumaga mo maganiko mabi, būjingi, wibi, būbūlagi, būshihani,
22
kwikūmva kwabūbi, būbi, būlomolomo, kalolele ka malofu, wilu, būsondagūji, wikumīlīja, būchilū chilū.
23
Ī yose ī yabūbi yenīyī īkafumaga mu gatī ya ng'wa munhū yansosohaja.”
24
Hūna ūbūūka wīnga a henaho, ūja mhandī ja Tulo. Wingīla mu numba, nguno walī atatogilwe munhū ose ose amane; gwike yalī shilambu ū kūjimīlīka ūko walī.
25
Lītabītile ikanza, nkīma nebe walī na nshīke wakwe wakoyiagwa isamva; ūjiigwa ī mhola jakwe, wiza ūshikīla kūngwīla mu magūlū ū Yesu.
26
Ū nkīma ng'wenūyo walī Nyunani, w'ihanga lya Basulofonisa. Wandya kūng'wikūmbīlīja ang'wīngīje ū nshīke wakwe ī lisamva.
27
Ū Yesu ūnshokeja alīng'wīla gīkī, “Lekaga balye tame a baana ba mu kaya bigeje, nguno ītī chiza ū kūshisola ī shilīwa shabo ūshiponegeja tūwa.”
28
Nang'hwe ū nkīma ūnshokeja ūng'wīla, “Na ng'hana gūlī chene baba, alīyo nahene nū tūwa nato tūkasolelejaga a malagalīkwa ayo gakagwaga kwīngīīla aho balīlīīla a baana.”
29
Ū Yesu ūng'wīla gīkī, “Kūlwa nguno ya mhayo gwenūyo, jaga; lyamfumaga ī lisamva ū nshīke wako.”
30
Aho washoka ū kū kaya ūnsanga ū ng'wanikī olaalaga ha būlīīlī, lyamalaga kūmfuma ī lisamva.
31
Hūna ū Yesu wīnga hangī ī mhandī ja Tulo, ūbītīla Sidoni, ūshika kū nyanza ya Galilaya, mu sī ya Dekapoli.
32
Būng'wenhela munhū wa katà, hangī gulu. Būng'wikūmbīlīja antūūlīle makono.
33
Nang'hwe ūng'wīnja a ha banhū, ūja nawe ha mhūjo iyene. Ūnkuumya na nzwala ū mu matū gakwe, ha numa ūswa mate ūlūkuumya nū lūlīmi lokwe.
34
Ūlangamīla ng'wigūlū, ūkuuma n'ilaka lya koolecha kūsaatwa, hūna ūng'wīla ū munhū ng'wenūyo gīkī, “Efata makūlū gaho, lugūkaga!”
35
Haho na haho a matū gakwe gūlugūka, na a katà kīnga, wandya kūyomba chiza.
36
Hūna ū Yesu ūbakomeleja batizūng'wīla ose ose. Alīyo nahene a boi bakagūkumūcha, nūūlū īkī akabakomeleja batizīīta gīko.
37
Banhū bakakumya no; būyūhaya gīkī, “Akūbeejaga chiza būlī mhayo, a bagulu akūbinhaga kwigwa, na a bashimuumu akūbinhaga kūyomba!”
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 8 →
All chapters:
1
2
3
4
5
6
7
8
9
10
11
12
13
14
15
16