John 18

Shekhawati

1आ अरदास कर ईसु आपका चेला क सागै कीद्रोन घाटी क परली पार एक बाग म गयो।

2अर बि झघा क बारां म बिनै धोकाऊँ पकड़ाबाळो यहूदा बी जाणतो हो क्युंक घणकरी बार ईसु आपका चेलाऊँ बठैई मिल्या करतो हो।

3जणा यहूदा रोमी सिपाईड़ा की एक टुकड़ी अर परधान याजक अर फरिसीया का भेजेड़ा मनदर का पेरेदारा क सागै बठै आयो। बाकै हाता म मसाल, लालटेन अर राछ हा।

4जणा पाछै ईसु जखो सक्यु जाणता हो आगै आर बाऊँ बोल्यो, “थे किनै ढुंढो हो?”

5बे बोल्या, “ईसु नासरीनै।” जणा बो बाऊँ बोल्यो, “बो म हूँ।” बिनै पकड़ाबाळो यहूदा बी बाकै सागै हो।

6ईसु क अंय्यां बोलताई, “बो म हूँ,” बे चिमकर जमीन प पड़गा।

7जणा एक बार ओज्यु ईसु बाऊँ बुज्यो, “थे किनै ढुंढो हो?” बे बोल्या, “ईसु नासरीनै।”

8ईसु बोल्यो, “म बोल्यो तो हो, बो मई हूँ। ज थे मनै ढुंढो हो जणा आ मिनखानै जाबा द्‍यो।”

9अंय्यां बो इ ताँई बोल्यो जिऊँ जोक्यु बो बोल्यो हो बो सच होवै, “म बामैऊँ एकनैई कोनी खोयो जखा थे मनै सूप्या हा।”

10इकै पाछै समोन पतरस, जिकै कनै तलवार ही, बो तलवार काडी अर म्हायाजक का दास को दाइणो कान काट गेर्यो। बिको नाम मलखुस हो।

11जणा ईसु पतरसऊँ बोल्यो, “तेरी तलवारनै म्यान म घाल ले! के म पिड़ा को बो प्यालो कोनी पीऊँ जखो मेरो परम-पिता मनै दिओ ह?”

12इकै पाछै रोमी टुकड़ी का सिपाईड़ा, सुबेदार, यहूदि अर मनदर का पेरेदार मिलर ईसुनै गिरफदार कर लिआ अर बिनै बां'दर,

13पेली अनास क कनै लेग्या, जखो बि बरस का म्हायाजक केफा को सुसरो हो।

14ओ केफा बोई मिनख हो जखो यहूदि नेतानै राय दि ही क, “सगळा क बदला म एक को मरबो चोखो ह।”

15समोन पतरस अर एक ओर चेलो ईसु क गेल होलिओ। म्हायाजक इ चेलानै सूल्या जाणतो हो, इ ताँई बो ईसु क गेल म्हायाजक क आँगणा म बड़गो।

16पण पतरस बारनै बारना क कनैई डटगो जणा पाछै म्हायाजक की जाण-पिछाण हाळो दुसरो चेलो बारनै आयो अर बारना प खड़ी पेरेदारनीनै बोलर पतरसनै मांयनै लेगो।

17इपै बा पेरेदारनी बोली, “मनै तू ईसु को चेलो लागै ह। के ओ सच ह?” पतरस जुबाब दिओ, “नइ, म कोनी।”

18जाडा की बजेऊँ दास अर मनदर का पेरेदार बास्ते बाळर बठै खड़्या-खड़्या तपै हा, अर पतरस बी बाकै सागै खड़्यो होर तपै हो।

19जणा पाछै म्हायाजक ईसुऊँ बिका चेला-चपाटी अर बिकी सीख क बारां म बुज्यो।

20ईसु बिऊँ बोल्यो, “म हर बार दुनिया का मिनखा म खुलर बोल्यो हूँ। म अरदास करबाळी झघा अर मनदर म जठै सगळा मिनख भेळा होवीं हीं सीखायो हूँ। म कदैई ओला म कोनी बोल्यो।

21जणा पाछै तू मेरूँ क्याले बुजै ह? म काँई बोल्यो ज ओ जाणबो चावै ह जणा बाऊँ बुज जखा मनै सुण्या हीं। म काँई बोल्यो बे जाणी हीं।”

22आ सुणर बठै खड़्यो मनदर को एक पेरेदार ईसु क रेपटो मारतोई बोल्यो, “म्हायाजक क सागै जबान लड़ाबा की तेरी हिमत कंय्यां होई?”

23ईसु बिऊँ बोल्यो, “ज म क्युं गळत बोल्यो हूँ, जणा साबित कर। अर ज म सई बोल्यो हूँ, जणा तू मनै क्याले मारै ह?”

24इकै पाछै अनास बिनै भंदेड़ानैई म्हायाजक केफा क कनै भेज दिओ।

25जद पतरस ताव क आगै तपै हो, बि टेम बिऊँ बुज्यो गयो, “तू बी तो बिका चेला मऊँ एक ह, के आ बात सई कोनी?” पण पतरस नटगो अर बोल्यो, “म बामैऊँ कोनी।”

26म्हायाजक को एक दास जखो बि मिनख को रिस्तेदार हो जिको पतरस कान काट्यो हो। बिऊँ बोल्यो, “के म तनै बिकै सागै बाग म कोनी देख्यो?”

27जणा पतरस ओज्यु नट्यो अर नटता क सागैई मुरगो बांग दिनी।

28इकै पाछै बे सुआरै ईसुनै केफा क घराऊँ रोमी राजपाल का दरबार म लेग्या पण यहूदि अधिकारी मांयनै कोनी गया, क्युं क बे खुदनै असुद कोनी करबो चावै हा, जिऊँ क बे फसै की रोटी खा सकै।

29जणा पीळातुस बारनै आर बाऊँ बोल्यो, “ओ काँई अपराद कर्यो ह?”

30जणा बे जुबाब दिआ, “ज ओ क्युंई अपराद नइ कर्यो होतो जणा म्हें इनै अठै कोनी ल्याता।”

31जणा पीळातुस बाऊँ बोल्यो, “थे इनै अठैऊँ लेज्याओ अर थारा नेम-कायदा गेल इको न्याय करो।” यहूदि बोल्या, “म्हानै ओ अधिकार कोनी क म्हें कोईनै मोत की सजा सुणावां।”

32अंय्यां इ ताँई होयो क ईसु की आपकी मोत क बारां म बोलेड़ी बात पूरी हो।

33जणा पीळातुस दरबार म पाछो गयो अर ईसुनै बुलार बुज्यो, “तू यहूदि मिनखा को राजा ह के?”

34ईसु बोल्यो, “आ बात तू मनै जाणबा ताँई बुजी ह नहिस कोई आ बुजबा ताँई तनै बोल्यो ह?”

35पीळातुस बोल्यो, “के म यहूदि हूँ? तेराई यहूदि मिनख अर परधान याजक तनै मेरै हाता म सूप्या हीं। तू अंय्यां को काँई कर्यो ह?”

36ईसु बोल्यो, “मेरो राज इ दुनिया को कोनी। ज मरो राज अठै को होतो जणा मेरै गेल चालबाळा मनै यहूदि मिनखा क हाता म पड़बाऊँ बचाबा ताँई लोय भवाता। पण मेरो राज अठै को कोनी।”

37इपै पीळातुस बिऊँ बोल्यो, “इको मतबल तू राजा ह के?” ईसु बोल्यो, “तू बोलै ह क म राजा हूँ। म सच की गुवाई देबा ताँई इ धरती प जलम्यो अर आयो हूँ। जखा बी सचा ह बे मेरा बचन सुणै ह।”

38पीळातुस बिऊँ बुज्यो, “सच काँई ह?” आ खेर बो ओज्यु यहूदि मिनखा क कनै बारनै गयो अर बाऊँ बोल्यो, “मनै इ मिनख म कोई खोट कोनी लाधी।

39पण थारी आ रीत ह क, फसै का त्युंहार प म थारै ताँई कोई एक केदिनै अजाद करूं, ज थे चाओ तो, के म इ यहूदि मिनखा का राजानै थारै ताँई छोड द्‍युँ?”

40ओज्यु बे एक सागै चिलाया, “इनै नइ पण बरअबानै छोड दे।” बरअबा एक बागी हो।

← Chapter 17 Jump to: Chapter 19 →