Mark 9

Shekhawati

1ईसु बाऊँ बोल्यो, “म थानै सची खेऊँ हूँ, अठै खड़्या मिनखा मऊँ कई-कई तो अंय्यां का ह क बे जद ताँई परमेसर का राजनै बिकी सक्‍ति क सागै नइ देखले जद ताँई बानै मोत कोनी आसी।”

2छ दिना क पाछै ईसु आपका चेला मऊँ पतरस, याकूब अर यहून्नानै सागै लेर एकला म बो बानै उचासा डूँगर प लेगो। बठै बाकै सामै ईसु को रूप बदल्यो गयो

3अर ईसु का गाबा चमकबा लाग्या अर अंय्यां का धोळा होया जंय्यां का इ धरती को कोई धोबी कोनी धो सकै।

4ईसु क सागै एलिआ अर मूसा बी परगट होया। अर बे ईसुऊँ बतळार्या हा।

5पतरस बानै बतळातो देखर ईसुनै बोलबा लाग्यो, “ओ गरूजी ओ कतो चोखो ह क, आपा अठै हां। म्हानै अठै तीन पंडाळ बणाबा दे एक तेरो, एक मूसा को अर एक एलिआ को।”

6बे डरग्या हा इ ताँई पतरस आ बात बोली।

7जदई एक बादळ आयो अर बानै ढक लिओ अर बादळा मऊँ हेलो आयो, “ओ मेरो लाडलो बेटो ह। थे इकी सुणो।”

8अर बे तावळासा च्यारूमेर देखबा लाग्या बे आपकै सागै ईसुनै देख्या अर बानै बठै ओर कोईबी कोनी दिख्यो।

9जद बे डूँगरऊँ निचै आर्या हा ईसु बा तीन्यानै चेतार ओडायो क, थे जोक्यु बठै देख्यो हो बिकै बारां म जद ताँई मना खिज्यो जद ताँई मिनख को बेटो मरेड़ा मऊँ ओज्यु नइ जीज्या।

10अर बे इ बातनै आपका हिया क मांयनैई राखी पण बे सोचबा लाग्या क मरबा क पाछै जीबा को काँई मतबल ह?

11इ ताँई पाछै बे ईसुनै बुज्या, “यहूदि धरमसास्तरी क्याले बोलै ह क एलिआ को पेल्या आबो पक्को ह?”

12ईसु बाऊँ बोल्यो, “सगळी बातानै सई करबा ताँई पक्कोई एलिआ पेल्या आसी। पण मिनख का बेटा क बारां म पबितर सास्तर म ओ क्युं मंडर्यो ह क बिनै बोळो दुख भोगणो पड़सी। अर लोग बिनै ठुकरासी?

13म थानै बताऊँ हूँ, एलिआ तो पेल्याई आलिओ अर लोग जखो चावा हा बो बिकै सागै कर करालिओ जंय्यां की बिकै बारां म पबितर सास्तर म मंडर्यो ह।”

14जद बे बाकी का चेला कनै आया जणा बे देख्या क चेला क च्यारूमेर घणीसारी भीड़ भेळी होरी ह अर कई सास्तरानै सीखाबाळा बाकै सागै जिदर्या हीं।

15अर बे ईसुनै बठै देखर ताजूब करताई भागर बिकन गया, अर बिऊँ नमस्कार कर्यो।

16ईसु बाऊँ बोल्यो, “थे आऊँ क्युं जिदर्या हो।”

17भीड़ क मांयनैऊँ एक जणो बोल्यो, “ओ गरूजी म मेरो छोरो जिकै मांयनै गुँगी ओपरी बलाय ह बिनै तेरै कनै ल्यायो हो।

18आ गुँगी बलाय मेरा छोरा क हर कठैई फेट मार दे, अर इको मुंडो झागऊँ भरज्या अर ओ दांत पिसबा लागज्या अर ओ दिन-दिन सूक्यो जार्यो ह। म थाकाळा चेलानै खियो हो क बे इ बलायनै इकै मांयनैऊँ काड दे, पण बे इ बलायनै इमैऊँ कोनी काड सक्या।”

19ईसु बिकी बात सुणर बोल्यो, “अरै भेम करबाळो मिनखो, म कद ताँई थारै सागै रेहस्युं? अर थानै भोगस्युं? बि छोरानै मेरै कनै ल्याओ।”

20अर ओपरी बलाय जद ईसुनै देखी जणा बा छोरा क मरोड़ी देर बिनै जमीन प आडो पटक दिओ अर बिकै मुंडाऊँ झाग आबा लाग्या।

21ईसु बि छोरा का बापऊँ बुज्यो, “इकी आ दसा कदऊँ ह?” बो बोल्यो, “टाबरपुणाऊँई इकी दसा अंय्यां की ह।

22अर आ गुँगी बलाय इको नास करबा ताँई कदै तो इनै पाणी म अर कदै आग म पटकै ह पण म तेरूँ अरदास करूं हूँ क ज तू इको जापतो कर सकै ह तो जापतो करदे अर म्हारै प तरस खार म्हारो भलो कर दे।”

23ईसु बिनै बोल्यो, “तू अंय्यां क्युं खेवै ह कर सकै ह तो, बिस्वास करबाळा ताँई तो सक्यु हो सकै ह।”

24बि छोरा को बाप रोयो अर ईसुऊँ बोल्यो, “ओ परबु म बिस्वास राखूँ हूँ, पण मेरा भेमनै दूर करदे।”

25अर ईसु देखबा लाग्यो क बठै मिनखा की भीड़ लागबा लागी ह बो बि गुँगी-बेरी सूगली ओपरी बलायनै दकालर बोल्यो, “ए गुँगी-बेरी बलाय म तनै हुकम द्‍युँ हूँ इकै मांयनैऊँ निकळज्या अर इकै मांयनै कदैई मना आजे।”

26अर बा गुँगी बलाय बार घालर बि छोरा क मरोड़ी देर बिकै मांयनैऊँ निकळगी अर बो छोरो मरबाळोसो होगो कई मिनख तो खेबा लाग्या क ओ छोरो तो मरग्यो।

27पण ईसु बि छोरा को बावळ्यो पकड़र बिनै खड़्यो कर्यो अर बो छोरो खड़्यो होगो।

28अर जद ईसु घरा आयो जणा बिकाळा चेला एकला म बिनै बुज्या, “म्हें बि बलायनै क्युं कोनी काड सक्या?”

29ईसु बाऊँ बोल्यो, “अरदासनै छोडर अंय्यां की कुजातनै काडबा को कोई उपाय कोनी।”

30इकै पाछै बे बठैऊँ चलेग्या अर बे गलिल क मांयनैऊँ होर जार्या हा अर ईसु कोनी चावै हो क बिनै कोई पिछाणै,

31क्युं क ईसु आपका चेलानै सीखार्यो हो क, “मिनख को बेटो मिनखा क हाता धोकाऊँ पकड़ायो ज्यासी अर बे बिनै मार देसी पण बो तीन दिना क पाछै मोतऊँ जी उठ खड़्यो होसी।”

32पण आ बात बाकै पलै कोनी पड़ी अर बे बिऊँ ओज्यु बुजबा ताँई डरै हा।

33बे कफरनूम म आया अर ईसु आपहाळा चेलानै बुज्यो, “थे गेला क मांयनै काँई बतळार्या हा?”

34बे चुपचाला होगा क्युं क बे गेला क मांयनै आपसरी म बतळार्या हा क आपणा मऊँ कूणसो बडो ह।

35ईसु बेठ्यो होर बा बारानै आपकै कनै बुलायो अर बाऊँ बोल्यो, “थारै मऊँ ज कोई बडो बणबो चावै ह जणा बिनै सगळाऊँ छोटो अर सगळा को दास बणबो चाए।”

36अर ईसु बाकै सामै एक टाबरियानै खड़्यो कर्यो अर बिकै कांधा प हात धर बाऊँ बोल्यो,

37“जखो बी मेरा नामऊँ टाबरा को मान करै ह बो मेरो बी मान करै ह अर मनै भेजबाळा को बी मान करै ह।”

38यहून्ना ईसुनै बोल्यो, “ओ गरूजी म्हें एक मिनखनै तेरै नामऊँ ओपरी बलाय निकाळता देख्या अर म्हें बिनै इ बजेऊँ रोक्या क बो मिनख आपणा मऊँ कोनी हो।”

39पण ईसु बानै ओडायो, “थे बिनै रोको मना जखो बी मेरै नामऊँ चमत्कार करै ह बो मेरै बारां म तावळोसो बुरी बाता कोनी करै।

40अर जखो आपणै सामै कोनी बो आपणोई ह।

41अर सचमई जखा बी मिनख थानै मसी को जा'णर एक गिलास पाणी प्यावै ह जणा आ कोनी हो सकै क इको फळ कोनी मिलै।

42“मेर प बिस्वास करबाळा आ नान्या मऊँ कोई एकनै बी पाप म गेरबा ताँई आखळी बणै ह बि ताँई ओई चोखो ह क बिकै नाड़ म घरट घालर बिनै समदर क मांय फेक दिओ जावै।

43ज तेरो हात तनै ठोकर खुवावै बिनै काट फेक। क्युं क तेरै दो हात होतो सोता बी तू नरक का दरिआव म गेर्यो जावै जिकी आग कदैई कोनी बुजै इऊँ तो तेरो टुंडोई ईस्बर नगरी म बड़बो चोखो ह।

44[अर बठै को किड़ो मरै कोनी अर बठै की आग बूझै कोनी।]

45अर तेरो पग तनै ठोकर खुवावै जणा बिनै काट दे अर लंगड़ोई ईस्बर नगरी म बड़बो चोखो ह, इऊँ ओ भलो ह क दो पग होतासोता बी नरक का दरिआव क मांयनै गेर्यो जावै।

46[बठै को किड़ो ना तो मरै अर ना बठै की आग बूझै]

47ज तेरी आँख तनै पाप म गेरै जणा बिनै फोड़ दे। काणो होर परमेसर का राज म बड़बो तेरै ताँई चोखो ह। इऊँ क तेरै दो आँख होतासोता तू नरक म गेर्यो जावै।

48बठै मिनखानै खाबाळो किड़ो कोनी मरै अर मिनखनै जळाबाळी आग कोनी बूझै।

49जंय्यां लुण बलिनै पबितर करै ह बंय्यांई सगळा मिनखानै आगऊँ सुद कर्यो ज्यासी।

50लुण चोखो ह पण लुण मऊँ सुवाद चल्योजा जणा बिनै कंय्यां चरचरो कर सकां हां? थे थारै म लुण जंय्यां को सुवाद राखो अर आपसरी म स्यांतीऊँ रिह्यो।”

← Chapter 8 Jump to: Chapter 10 →