Romans 9

Shekhawati

← Chapter 8 Jump to: Chapter 10 →

1म मसी म सच बोलर्यो हूँ। म झूठ कोनी बोलुँ अर मेरी अन्तर-आत्मा पबितर आत्मा म मेरी गुवाई देवै ह,

2क मनै बोळो बडो दुख ह, अर मेरा मन म पिड़ा ह।

3ज मेरा बस म होतो क, म मेरा यहूदि भाई-भाणा अर मेरा देस का मिनखा ताँई सराप खुद प ले लेतो, अर मसीऊँ न्यारो होज्यातो।

4जखा इजरायल का हीं अर जानै परमेसर की ओलाद होबा को अधिकार ह। जखा परमेसर की मेमा को दरसण कर लिआ हीं। जखा परमेसर का करारा का भागी हीं। जानै नेम-कायदो, सची भगती अर बचन दियड़ा हीं।

5बडका बाऊँई नातो राखी हीं, अर मिनख क जाया क रूप म मसी बामैऊँई जलम्यो जखो सगळा को परमेसर ह अर सदाई धने ह! आमीन।

6अंय्यां कोनी क परमेसर आपका बचनानै पूरो कोनी कर्यो क्युं क जखा इजरायल का वंसज ह बे सगळा परमेसर का कोनी।

7अर नइ अब्राहम की पिडी होबा की बजेऊँ बे अब्राहम की ओलाद हीं। पण जंय्यां परमेसर अब्राहमऊँ बोल्यो हो, “इसाकऊँई तेरो वंस चालसी।”

8इको मतबल ओ ह क, परमेसर काया रूप म अब्राहम की पिडीऊँ जलमेड़ानै आपकी ओलाद कर कोनी गिणै पण बानैई गिणै जखा बिकै करार गेल जलम लिआ जानै अब्राहम की ओलाद मान्यो जावै ह।

9करार अंय्यां खेवै ह, “आगलै बरस इ टेम काई म पाछो आस्युं अर सारा छोरो जणसी।”

10ओई नइ, जद रिबका क बी आपणा बडका इसाकऊँ फळ पड़्यो,

11अर जोड़ला टाबरा क जलमऊँ पेल्या अर बाकै क्युं बी भलो-बुरो करबाऊँ पेल्या परमेसर रिबकाऊँ बोल्यो, “बडोड़ो छोटक्या की सेवा करसी।” परमेसर अंय्यां इ ताँई बोल्यो जिऊँ परमेसर क टाळबा को मकसद पूरो होवै जखो बा दोन्या क करमा गेल कोनी हो, पण इ बात प हो क परमेसर किनै बुलाबा की ध्यारमाली हीं।

13जंय्यां की पबितर सास्तर म मंडेड़ो ह क, “म याकूबऊँ परेम कर्यो अर एसावऊँ नफरत कर्यो।”

14जणा आपा काँई बोलां? के परमेसर अन्यायी ह? नइ, अंय्यां कोनी!

15क्युं क बो मूसाऊँ बोल्यो हो, “म जिपै दया करबा की मन म करस्युं बिपै दया करस्युं। अर जिपै बी तरस खाबा की मन म करस्युं बिपै तरस खास्युं।”

16जणा आ बात नइ तो कोईकी इंछ्याऊँ होवै अर नइ कोई क भाग-दोड़ करबाऊँ पण आ तो दयालु परमेसर की बात ह।

17क्युं क सास्तर म परमेसर फिरोनऊँ बोल्यो हो, “म तनै इ ताँई खड़्यो कर्यो क, म मेरी सक्‍ति तेरै प दिखा सकूँ अर मेरा नाम को हेलो सगळी धरती प पाड़्यो जावै।”

18खेबा को मतबल ओ ह क परमेसर जिपै दया दिखाबो चावै बिपै दया दिखावै ह अर जिको मन काठो करबो चावै बिका मननै काठो कर देवै ह।

19जणा थारै मऊँ कोई बोल सकै ह, “ज आई बात ह जणा बो म्हारै प दोस क्युं लगावै ह? अंय्यां को कूण ह जखो बिकी इंछ्यानै टाळज्यावै?”

20मिनख कूण होवै ह जखो परमेसरनै ओटो जुबाब देवै? के कोई हात की बणाएड़ी चिज बिका बणाबाळानै बुज सकै ह क, “तू मनै अंय्यां क्युं बणायो?”

21के खुमारनै इ बात की छुट कोनी क बो माटी की एक लुगदीऊँ एक बरतननै खास मकसद ताँई अर दुसरानै छोटा मोटा काम म आबा ताँई बणावै?

22अंय्यांई परमेसर बी आपकी झाळ अर नफरतनै नास होबाळा प परगट करबो चावै हो। इकै बावजुद बी बो बा झाळ अर नफरत जोगा नास होबाळा ताँई बोळी सबर करी।

23जिऊँ जानै बो पेल्याऊँई मेमा ताँई त्यार करमाल्यो हो अर बिकी दया क जोगा हा बापै बो आपकी भरपूर मेमा परगट कर सकै।

24अर सचमई आपा बे मिनख हा जानै परमेसर बुलायो ह अर खाली यहूदिई नइ, पण गैर-यहूदि बी सामिल ह।

25जंय्यां की होसे की पोथी म मंडर्यो ह: “जखा मिनख मेरा कोनी हा बानै म ‘खुदका मिनख खेस्युं,’ अर जखी परजा मेरी लाडली कोनी हीं, बिनै म ‘लाडली बोलस्युं।’

26“अर, जि झघा म खेयड़ो हो, “थे मेरी परजा कोनी हो। बठैई थे जीवता परमेसर की ओलाद खुवास्यो।”

27अर परमेसर की खेबाळो यसाया, इजरायल क बाबत हेलो पाड़र बोलै ह क: “इजरायल की ओलाद समदर की बाळू का रणा जंय्यां कोनी गिणी जा सकै। इकै बावजुद बी बामैऊँ क्युंकई बचाया ज्यासी।

28क्युं क परबु धरती प आपका न्यायनै पूरीतर्या बिना देरी क पूरो करसी।”

29अर जंय्यां यसाया बोल्यो हो, “ज सक्‍तिसाली परबु आपणै ताँई, बंसज नइ छोडतो जणा आपा सदोम अर अमोरा जंय्यांई होज्याता ।”

30जणा पाछै आपा काँई बोलां? गैर-यहूदि मिनख जखा धारमिक्‍ता की खोज म कोनी हा, बानै धारमिक्‍ता मिलगी। बे बिस्वास की बजेऊँई धरमी बणाया गया।

31पण इजरायल का मिनख जखा नेम-कायदा प चालबो चावा हा जखी बानै धरमी बणाती, बे बि धारमिक्‍तानै कोनी पा सक्या।

32अंय्यां क्युं कोनी होयो? क्युं क बे इनै बिस्वास की झघा आपका करमाऊँ पाबा की कोसिस करी, पण बे ठोकर खाबाला भाठा प ठोकर खाई।

33जंय्यां क पबितर सास्तर म मंडेड़ो ह, “सुणो, म सिओन म एक भाठो धर राख्यो हूँ, जखो ठोकर खुवावै ह अर एक ढाड जखी पाप करवावै ह। पण जखो बिपै बिस्वास करै ह, बो कदैई सरमिंदा कोनी होसी।”

← Chapter 8 Jump to: Chapter 10 →