1 Peter 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ಯೇಸು ಕ್ರಿಸ್ತನ ಅಪೊಸ್ತಲೆ ಆಯಿ ಪೇತ್ರೆ, ಪೊಂತು, ಗಲಾತ್ಯ, ಕಪ್ಪದೋಕ್ಯ, ಆಸ್ಯ, ಬಿಥೂನ್ಯ ಈ ಪ್ರದೇಶೊಲೆಡ್ ಚದರಾದುಪ್ಪು ಪ್ರವಾಸಿಲಾಯಿ ದೇವಜನೊಕುಲೆಗ್ ಬರೆಪಿನ ಕಾಕಜಿ. ಅಮ್ಮೆ ಆದುಪ್ಪು ದೇವೆರೆಗ್ ದುಂಬೆ ಗೊತ್ತು ಇತ್ತ್‌ದ್ ನಿಕ್ಲೆನ್ ಅಜತ್‌ದ್ ದೆತ್ತೊಂಡೆ. ಬೊಕ್ಕ ಆಯನ ಪರಿಶುದ್ಧಾತ್ಮ ನಿಕ್ಲೆನ್ ಪರಿಶುದ್ಧ ಮಲ್ತಿನೆಡ್ದ್ ನಿಕುಲು ಯೇಸು ಕ್ರಿಸ್ತಗ್ ವಿಧೇಯರಾಯರ್ ಬೊಕ್ಕ ಆಯನ ನೆತ್ತೆರ್‌ಡ್ದ್ ನಿಕುಲು ತಲಿತಿದಿನಾಕುಲು ಆದ್ ಶುದ್ಧ ಆಯರ್. ನಿಕ್ಲೆಗ್ ದಯಲಾ ಸಮಾಧಾನಲಾ ಹೆಚ್ಚೆಚ್ಚಾದ್ ತಿಕ್ಕಡ್.

3ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಮ್ಮೆಲಾ ದೇವೆರ್‌ಲಾ ಆದುಪ್ಪುನಾಯಗ್ ಉಪಕಾರ ಸ್ತುತಿ ಆವಡ್. ದೇವೆರೆನ ಮಲ್ಲ ಕರುಣೆಡ್ದ್ ನಮ ಪೊಸತ್ತಾದ್ ಕುಡ ಪುಟ್ಟುದ. ದಾಯೆಗಂದ್ಂಡ ಯೇಸು ಕ್ರಿಸ್ತೆ ಸೈತ್‌ದ್ ಲಕ್ಕಿನೆಡ್ದ್ ನಂಕ್ ಜೀವ ಇತ್ತಿ ನಿರೀಕ್ಷೆ ಉಂಡು.

4ದೇವೆರ್ ನಂಕಾದ್ ಇತ್ತೆ ಪರಲೋಕೊಡು ದೀತಿ ಬಾಧ್ಯಸ್ತಿಗೆನ್ ನಮ ಎದುರು ತೂವೊಂದುಲ್ಲ. ಅವು ನಾಶಾದ್ ಪೋಪುಜಿ, ಮೈಲೆ ಆಪುಜಿ, ಪೊರ್ಲು ಬಾಡ್ದ್ ಪೋಪುಜಿ.

5ಅಂತ್ಯ ಕಾಲೊಡು ತೋಜಿದ್ ಬರಿಯೆರೆಗ್ ತಯಾರಾದುಪ್ಪು ರಕ್ಷಣೆ, ನಂಬಿಕೆಡ್ ಉಪ್ಪುನಾಕುಲೆಗ್ ತಿಕ್ಕೊಡು ಅಂದ್‌ದ್ ದೇವೆರ್ ತನ ಬಲೊಟು ಕಾಪುವೆ.

6ದಾಯೆಗಂದ್ಂಡ ನಿಕ್ಲೆಗ್ ಸದ್ಯೊಗು ಮಾತ ರೀತಿದ ಶೋಧನೆ ಬತ್ತ್‌ಂಡಲಾ ಸಂತೋಷ ಮಲ್ಪುನಾಕುಲು ಆದುಪ್ಪುಲೆ.

7ಇಂಚಿನ ಶೋಧನೆಲೆಡ್ದ್ ನಿಕ್ಲೆ ನಂಬಿಕೆ ಸ್ಥಿರಾದ್ ತೋಜಿದ್ ಬರು. ನಾಶಾದ್ ಪೋಪಿ ಬಂಗಾರೊನ್ಲಾ ತೂಕು ಪಾಡ್ದ್ ಶುದ್ಧ ಮಲ್ಪುವೆರ್, ಅಂಚೆನೆ ನಿಕ್ಲೆ ನಂಬಿಕೆ ಬಂಗಾರೊಡ್ದುಲಾ ಆತಿ ಬಿಲೆ ಇತ್ತಿನೆಡ್ದ್ ಕಷ್ಟ ನಿಕ್ಲೆನ್ ಶೋದ್ಯಾವು. ನಿಕ್ಲೆನ ನಂಬಿಕೆ ಯಥಾರ್ಥ ಇತ್ತ್ಂಡ ಯೇಸು ಕ್ರಿಸ್ತೆ ಕುಡ ಬನ್ನಗ ನಿಕ್ಲೆಗ್ ಪುಗರಿಕೆ, ಮೈಮೆ, ಮಾನೊಲು ತಿಕ್ಕುಂಡು.

8ನಿಕುಲು ಆಯನ್ ಕಣ್ಣಾರೆ ತೂಯಿಜರ್ಡಲಾ ಆಯನ್ ಪ್ರೀತಿ ಮಲ್ಪುವರ್. ಇತ್ತೆ ನಿಕುಲು ಆಯನ್ ತೂಯಿಜರ್ಡಲಾ ಆಯ ಮಿತ್ತ್ ನಂಬಿಕೆ ದೀದ್ ನಿಕ್ಲೆ ನಂಬಿಕೆದ ಅಂತ್ಯ ಫಲ ಆದುಪ್ಪು ಆತ್ಮ ರಕ್ಷಣೆನ್ ಪಡೆಯಿನಾಕುಲಾದ್ ಗೆನ್ಪೆರೆ ತೀರಂದಿನಾತ್ ಮೈಮೆಡ್ ದಿಂಜಿದ್ ಸಂತೋಷ ಮಲ್ಪುವರ್.

10ಈ ರಕ್ಷಣೆದ ವಿಷಯೊನ್ಲಾ ಪ್ರವಾದಿಲು ಸೂಕ್ಷ್ಮೊಡು ನಾಡ್ದ್ ಪರೀಕ್ಷೆ ಮಲ್ತ್‌ದ್ ದೇವೆರ್ ದುಂಬಗ್ ನಿಕ್ಲೆಗ್ ಕೊರ್ಪಿನ ಆ ದಯತ ವಿಷಯೊಡ್ಲಾ ಅಕುಲು ಪ್ರವಾದನೆ ಮಲ್ತ್‌ದಿತ್ತೆರ್.

11ಕ್ರಿಸ್ತನ ಆತ್ಮ ಅಕ್ಲೆ ಉಲಯಿ ಇತ್ತಿನೆಡ್ದ್ ಕ್ರಿಸ್ತಗ್ ಬರ್ಪಿ ಶ್ರಮೆ ಬೊಕ್ಕ ಶ್ರಮೆಲೆಡ್ದ್ ತಿಕ್ಕು ಮೈಮೆನ್ಲಾ ಆದಿಡ್ ತೆರಿಪಾದಿನೆಡ್ದ್, ಆ ಸಮಯ ಏಪ ಬರ್ಪುಂಡು ಎಂಚ ಬರ್ಪುಂಡು ಅಂದ್‌ದ್ ಎದುರು ತೂವೊಂದಿತ್ತೆರ್.

12ದೇವೆರ್ ಪ್ರವಾದಿಲೆಗ್ ತೆರಿಪಾಯಿನ ಪಾತೆರೊಲು ಅವು ಅಕ್ಲೆಗಾದ್ ಅತ್ತ್, ನಿಕ್ಲೆಗಾದೇ ಪನ್ಪಿನವು ಅಂದ್‌ದ್ ದೇವೆರ್ ಅಕ್ಲೆಗ್ ತೋಜಾದ್ ಕೊರಿಯೆರ್. ಆಂಡ ಇತ್ತೆ ಆ ಸುವಾರ್ತೆ ಪರಲೋಕೊಡ್ದು ಕಡಪುಡುದಿ ಪರಿಶುದ್ಧಾತ್ಮನ ಬಲೊಟು ನಿಕ್ಲೆಗ್ ಸಾರಿಯೆರ್. ದೂತೆರ್‌ಲಾ ಈ ಸಂಗತಿಲೆನ್ ಗೇನ ಕೊರ್ದು ತೂವೊಡು; ಅಂದ್‌ದ್ ಬಯಕೊಂದಿತ್ತೆರ್.

13ಅಂಚಾಯಿನೆಡ್ದ್ ನಿಕುಲು ನಿಕ್ಲೆ ಉಡಲ್‌ನ್ ಸೇವೆಗಾದ್ ತಯಾರ್ ಮಲ್ಪುಲೆ, ಸ್ವಸ್ಥಚಿತ್ತೊಡುಪ್ಪುಲೆ. ಯೇಸು ಕ್ರಿಸ್ತೆ ಕುಡೊರ ಬನ್ನಗ ನಿಕ್ಲೆಗ್ ತಿಕ್ಕುನ ದಯತ ಮಿತ್ತ್ ನಿರೀಕ್ಷೆನ್ ದೀಲೆ.

14ಆಂಡ ನಿಕುಲು ದೇವೆರೆನ ಜೋಕುಲೆ ಲೆಕ್ಕ ವಿಧೇಯೆರಾದ್ ನಡಪುಲೆ, ನಿಕುಲು ದುಂಬು ಬುದ್ಧಿದಾಂತಿನಾಕುಲು ಆದುಪ್ಪುನಗ ದುರಾಶೆಲೆಡ್ ನಡತಿಲೆಕ್ಕ ಇತ್ತೆ ನಡಪಡೆ.

15ಆಂಡ ನಿಕ್ಲೆನ್ ಲೆತ್ತಿನಾಯೆ ಪರಿಶುದ್ಧದಾಯೆ, ಅಂಚೆನೇ ನಿಕುಲುಲಾ ಮಾತ ನಡವಳಿಕೆಡ್ಲಾ ಪರಿಶುದ್ಧ ಆದುಪ್ಪುಲೆ.

16ದಾಯೆಗಂದ್ಂಡ ಬರೆದುಪ್ಪುಲೆಕ್ಕ “ಯಾನ್ ಪರಿಶುದ್ಧ ಆದುಪ್ಪುನೆಡ್ದ್ ನಿಕುಲುಲಾ ಪರಿಶುದ್ಧ ಆದುಪ್ಪುಲೆ.”

17ಪ್ರತಿ ಒರಿಯನ ಕೆಲಸೊಲೆನ್ ತೂದು ಪಕ್ಷಪಾತದಾಂತೆ ತೀರ್ಪುಮಲ್ಪು ದೇವೆರೆಗ್ ಅಮ್ಮೆ ಅಂದ್‌ದ್ ಪಾರ್ಥನೆ ಮಲ್ಪುನೆಡ್ದ್ ನಿಕ್ಲೆನ ಪ್ರವಾಸಕಾಲೊನು ಈ ಲೋಕೊಡು ಪೋಡಿಗೆಡ್ ನಡತೊನ್ಲೆ.

18ನಿಕ್ಲೆ ಹಿರಿಯಾಕುಲು ಕಲ್ಪಾದಿನ ವ್ಯರ್ಥವಾಯಿನ ನಡವಳಿಕೆಡ್ದ್‌ಲಾ ನಾಶಾದ್ ಪೋಪಿನ ಬೊಳ್ಳಿ ಬಂಗಾರೊಡ್ದುಲಾ ನಿಕ್ಲೆಗ್ ಬುಡುಗಡೆ ಆತಿನತ್ತ್.

19ಆಂಡ ಊನದಾಂತಿ ಕಲೆದಾಂತಿ ಬಲಿತ ಕುರಿ ಆದುಪ್ಪು ಕ್ರಿಸ್ತನ ಬಿಲೆ ಇತ್ತಿ ನೆತ್ತೆರ್‌ಡ್ದ್ ಅಂದ್‌ದ್ ನಿಕುಲು ತೆರಿದರ್.

20ಲೋಕ ಉಂಡಾಪಿನೆಡ್ದ್ ದುಂಬೇ ದೇವೆರ್ ಆಯನ್ ಅಜತ್‌ದ್ ನಿಕ್ಲೆಗ್ ಬೋಡಾದ್ ಕಡೆ ಕಾಲೊಡು ತೋಜಾದ್ ಕೊರಿಯೆ.

21ನಿಕುಲು ಯೇಸು ಕ್ರಿಸ್ತಡ್ದ್ ದೇವೆರೆನ್ ನಂಬುನಾಕುಲು ಆಯರ್. ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯಿನೆಡ್ದ್ ದೇವೆರೆಗ್ ಮೈಮೆ ಆಂಡ್, ಐಡ್ದಾವರ ನಿಕ್ಲೆ ನಂಬಿಕೆಲಾ ನಿರೀಕ್ಷೆಲಾ ದೇವೆರೆ ಮಿತ್ತ್ ನಿಲೆ ಆದುಪ್ಪುಂಡು.

22ನಿಕುಲು ಸತ್ಯೊಗು ವಿಧೇಯೆರಾದ್ ನಿಕ್ಲೆ ಆತ್ಮೊಲೆನ್ ಶುದ್ಧ ಮಲ್ತಿನೆಡ್ದ್ ಸಹೋದರೆ ಲೆಕ್ಕ ಕಪಟದಾಂತಿ ಪ್ರೀತಿಡುಪ್ಪುಲೆ. ಒರಿಯನ್ ಒರಿ ಶುದ್ಧ ಉಡಲ್‌ಡ್ದ್ ಸ್ಥಿರಾದ್ ಪ್ರೀತಿ ಮಲ್ಪುಲೆ.

23ದಾಯೆಗಂದ್ಂಡ ನಿಕುಲು ಪೊಸತ್ತಾದ್ ಕುಡ ಪುಟುದರ್. ಆ ಜೀವ ನಾಶಾದ್ ಪೋಪಿ ಬಿತ್ತ್‌ಡ್ದ್ ಅತ್ತ್, ಆಂಡ ಏನಿತ್ಯೇನಿಗ್ಲಾ ಜೀವ ಇತ್ತಿ ದೇವೆರೆ ಪಾತೆರೊಡ್ದು ಉಂಡಾಯಿನವು.

24ಅಂಚೆನೆ ಗ್ರಂಥ ಪನ್ಪುಂಡು “ಮಾತ ನರಜಾತಿಲು ಪಜಿರ್‌ದ ಲೆಕ್ಕನೆ ಉಲ್ಲೆರ್. ಅಕ್ಲೆನ ಮೈಮೆ ಪಜಿರ್‌ದ ಪೂತ ಲೆಕ್ಕನೆ ಉಂಡು. ಪಜಿರ್ ನುಂಗುದು ಪೋವು, ಐತ ಪೂ ತಾಲ್ದ್ ಪೋವು.

25ಆಂಡ ಕರ್ತವ ಪಾತೆರ ಏನಿತ್ಯೇನಿಗ್ಲಾ ಉಪ್ಪು.” ಅವು ದಾನೆಂದ್ಂಡ ನಿಕ್ಲೆಗ್ ಸಾರಿನ ಸುವಾರ್ತೆನೇ.

Jump to: Chapter 2 →