1 Peter 2

Tulu (ಪೊಸ ಒಡಂಬಡಿಕೆ)

← Chapter 1 Jump to: Chapter 3 →

1ಅಂಚಾಯಿನೆಡ್ದ್ ಮಾತ ಪಡಿಕೆಂತಿನೆನ್, ಮಾತ ವಂಚನೆನ್, ಕಪಟೊನು, ಕಿಚ್ಚಿನ್, ಮಾತ ತರತ ನಿಂದೆಲೆನ್ ಬುಡ್ದು ಬುಡ್ಲೆ.

2ಪುರುಬಾಲೆಲೆ ಲೆಕ್ಕ ನಿಕುಲು ದೇವೆರೆ ವಾಕ್ಯ ಪನ್ಪಿ ಶುದ್ಧವಾಯಿನ ಆತ್ಮೀಕ ಪೇರ್‌ನ್ ಬಯಕ್ಲೆ. ಐಟ್ಟ್ ಬಲ ಪಡೆದ್ ರಕ್ಷಣೆನ್ ಪಡೆವರ್.

3ಕರ್ತವೆ ಕರುಣೆದಾಯೆ ಅಂದ್‌ದ್ ನಿಕುಲು ಅನುಭವ ಮಲ್ತ್‌ದ್ ತೆರಿಯೊಂದರ್.

4ನಿಕುಲು ಜೀವ ಇತ್ತಿ ಕಲ್ಲಾದುಪ್ಪು ಕ್ರಿಸ್ತನ ಕೈತಲ್‌ ಬೈದರ್. ಆ ಕಲ್ಲ್‌ನ್ ನರಮಾನಿಲು ತಿರಸ್ಕಾರ ಮಲ್ತೆರ್ಡಲಾ ಅವು ದೇವೆರೆಡ್ದ್ ಅಜತ್‌ದಿನವುಲಾ ಬಿಲೆ ಇತ್ತಿನವುಲಾ ಆದುಂಡು.

5ಐತ ಲೆಕ್ಕನೇ ನಿಕುಲುಲಾ ಜೀವ ಇತ್ತಿ ಕಲ್ಲ್‌ಲು ಆದುಲ್ಲರ್. ನಿಕ್ಲೆನ್ ದೇವೆರ್ ಆತ್ಮಸಮ್ಮಂಧವಾಯಿನ ಮಂದಿರದಂಚ ಕಟ್ಟಾವೊಂದು ಉಲ್ಲರ್. ಬೊಕ್ಕ ಯೇಸು ಕ್ರಿಸ್ತಡ್ದ್ ದೇವೆರೆಗ್ ಒಪ್ಪಿಗೆ ಇತ್ತಿ ಆತ್ಮೀಕ ಬಲಿನ್ ಸಮರ್ಪಣೆ ಮಲ್ಪುನ ಪರಿಶುದ್ಧ ಯಾಜಕ ವರ್ಗದಾಕುಲಾದುಲ್ಲರ್.

6ಗ್ರಂಥೊಡು ಪನ್ಪಿಲೆಕ್ಕ, “ಇಂದಾ, ಯಾನ್ ಚೀಯೋನುಡು ಅಜತ್‌ದಿನ ಬಿಲೆ ಇತ್ತಿ ಮೂಲೆಕಲ್ಲ್‌ನ್ ಪಾಡ್ವೆ; ಆಯ ಮಿತ್ತ್ ನಂಬಿಕೆ ದೀಪಿನಾಯಗ್ ನಾಚಿಗೆ ಆವಂದ್.”

7ಅಂಚಾಯಿನೆಡ್ದ್ ನಂಬುನಾಕುಲೆಗ್ ಈ ಕಲ್ಲ್ ಬಿಲೆ ಇತ್ತಿನವು ಆದುಂಡು; ನಂಬಂದೆ ಉಪ್ಪುನಾಕುಲು, “ಈ ಕಲ್ಲ್‌ನ್ ಬೊಡ್ಚಿಂದ್‌ದ್ ಬುಡಿಯೆರ್. ಆಂಡ ಬೊಡ್ಚಿಂದ್‌ದ್ ಬುಡ್ತಿ ಕಲ್ಲೇ ಮೂಲೆದ ತರೆಕಲ್ಲಾಂಡ್.”

8ಆಂಡ, “ಆ ಕಲ್ಲ್ ಜನೊಕುಲೆನ್ ದಂಟುಲೆಕ್ಕ ಮಲ್ಪು. ಅಂಚೆನೇ ಆ ಕಲ್ಲ್ ಪಾದೆದ ಲೆಕ್ಕ ಜನೊಕುಲೆನ್ ಬೂರುಲೆಕ್ಕ ಮಲ್ಪು,” ಅಂದ್‌ದ್ ಬರೆತಿ ಪಾತೆರ ಸರಿ ಆದುಂಡು. ಅಕುಲು ದೇವೆರೆ ಪಾತೆರೊಗು ಒಳಗಾವಂದಿನೆಡ್ದ್ ದಂಟ್‌ದ್ ಬೂರ್ವೆರ್. ಅಕುಲು ಐಕಾದೆ ನೇಮಕ ಆತೆರ್.

9ಆಂಡ ನಿಕುಲು ಅಜತ್‌ದಿನ ಜನಾಂಗೊಲು, ಮಾಮಲ್ಲ ಯಾಜಕ ವರ್ಗದಾಕುಲು, ಪರಿಶುದ್ಧ ಜನಾಂಗೊಲು, ದೇವೆರೆನ ಸ್ವಂತ ಜನೊಕುಲು ಆದುಲ್ಲರ್. ದೇವೆರೆ ಕಾರ್ನಿಕೊಲೆನ್ ತೆರಿಪಾವೆರೆ ಅಜತ್‌ದಿನಾಕುಲು ಆದುಪ್ಪುನೆಡ್ದ್ ದೇವೆರ್ ನಿಕ್ಲೆನ್ ಪಾಪದ ಗರ್ಗಂಡ ಕತ್ತಲೆಡ್ದ್ ಲೆತ್ತ್‌ದ್ ತನ ಮೈಮೆದ ಬೊಲ್ಪುಗು ಸೇರಾದಿನಾಯೆ ಆಯೆನೇ.

10ಒಂಜಿ ಸಮಯೊಡು ನಿಕುಲು ಪ್ರಜೆಕುಲು ಆದಿತ್ತಿಜರ್; ಇತ್ತೆ ನಿಕುಲು ದೇವೆರೆ ಪ್ರಜೆಕುಲು ಆದುಲ್ಲರ್. ಆ ಸಮಯೊಡು ನಿಕ್ಲೆಗ್ ಕರುಣೆ ತಿಕ್ಕ್‌ದಿಜ್ಜಾಂಡ್; ಇತ್ತೆ ನಿಕ್ಲೆಗ್ ಕರುಣೆ ತಿಕ್ಕ್‌ದ್ಂಡ್.

11ಪ್ರೀತಿದಾಕುಲೇ, ನಿಕುಲು ಈ ಲೋಕದ ಪ್ರಯಾಣಿಕೆರ್‌ಲಾ ಪರದೇಶಿಲುಲಾ ಆದುಪ್ಪುನೆಡ್ದ್ ಆತ್ಮೊಗು ವಿರೋಧ ಆಪಿನ ಶರೀರದ ದುರಾಶೆಲೆಡ್ದ್ ದೂರ ಆದುಪ್ಪುಲೆ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.

12ನಿಕ್ಲೆನ ನಡತೆ ಲೋಕದ ಜನೊಕುಲೆ ನಡುಟು ಎಡ್ಡೆಂತಿನವು ಆದುಪ್ಪಡ್; ಅಪಗ ಅಕುಲು ವಾ ಸಂಗತಿಡ್ ನಿಕ್ಲೆನ್ ಅಕ್ರಮದಾಕುಲು ಅಂದ್‌ದ್ ನಿಂದನೆ ಮಲ್ಪುವೆರಾ, ಅಂಚೆನೆ ನಿಕ್ಲೆನ ಎಡ್ಡೆ ನಡತೆನ್ ತೂದು ಆಯೆ ಕುಡ ಬರ್ಪಿ ದಿನೊಟು ಅಕುಲು ದೇವೆರೆನ್ ಪುಗರ್‌ವೆರ್.

13ಕರ್ತವಗಾದ್ ಈ ಲೋಕದ ಅಧಿಕಾರಿಲೆಗ್ ಅಧೀನೆರಾದುಪ್ಪುಲೆ. ಸರ್ವಾಧಿಕಾರಿ ಆದಿತ್ತಿನ ಅರಸುಗ್ಲಾ ಅಧೀನೆರಾದುಪ್ಪುಲೆ.

14ಅರಸು ಕಡಪುಡುನ ಅಧಿಕಾರಿಲೆಗ್ಲಾ ಅಧೀನೆರಾದುಪ್ಪುಲೆ. ದಾಯೆಗಂದ್ಂಡ ಅಧಿಕಾರಿಲು ತಪ್ಪು ಮಲ್ತಿನಾಕುಲೆನ್ ಶಿಕ್ಷೆ ಕೊರಿಯೆರೆಗ್ಲಾ ಎಡ್ಡೆಂತಿನಾಕುಲೆಗ್ ಉತ್ತೇಜನ ಕೊರಿಯೆರೆಗ್ಲಾ ಸರಕಾರೊಡ್ದು ನೇಮಕ ಆತಿನಾಕುಲು ಪಂಡ್ದ್ ಎನ್ನ್‌ದ್ ಅಕ್ಲೆನ ಪಾತೆರೊನು ಕೇನ್ಲೆ.

15ತೆರಿಯಂದೆ ಪಾತೆರುನ ಹೆಡ್ಡೆರೆನ ಬಾಯಿನ್ ನಿಕ್ಲೆನ ಎಡ್ಡೆ ನಡತೆಡ್ ಮುಚ್ಚಾವೊಡು ಪನ್ಪಿನವೇ ದೇವೆರೆ ಚಿತ್ತ ಆದುಂಡು.

16ಸ್ವತಂತ್ರದಾಕುಲೆ ಲೆಕ್ಕ ನಡಪುಲೆ; ಆಂಡ ಪಡಿಕೆಂತಿನೆನ್ ದೆಂಗಾವೆರೆಗ್ ಬೋಡಾದ್ ನಿಕ್ಲೆ ಸ್ವತಂತ್ರೊನು ದುರುಪಯೋಗ ಮಲ್ಪಡೆ. ಆಂಡ ನಿಕುಲು ದೇವೆರೆಗ್ ದಾಸೆರಾದ್ ನಡತೊನ್ಲೆ.

17ಮಾತೆರೆಗ್ ಮಾನ ಕೊರ್ಲೆ; ಸಹೋದ್ರೆರೆನ್ ಪ್ರೀತಿ ಮಲ್ಪುಲೆ; ದೇವೆರೆ ಪೋಡಿಗೆಡ್ ನಡಪುಲೆ; ಸರಕಾರೊಗು ಒಳಗಾಲೆ.

18ಚಾಕ್ರಿದಾಕುಲೇ, ನಿಕ್ಲೆನ ಯಜಮಾನ್ಯೆರೆಗ್ ಮಾನ ಕೊರ್ದು ಅಧೀನೆರಾದುಪ್ಪುಲೆ. ಎಡ್ಡೆಂತಿನಾಕುಲೆಗ್ಲಾ ಸಜ್ಜನೆರೆಗ್ಲಾ ಮಾತ್ರ ಅತ್ತ್ ಕಠಿಣಾದುಪ್ಪುನಾಕುಲೆಗ್ಲಾ ತಗ್ಗ್‌ದುಪ್ಪುಲೆ.

19ಮನಸಾಕ್ಷಿಡ್ ದೇವೆರೆ ದಯ ಉಂಡು ಅಂದ್‌ದ್ ನೆನೆಪುನಾಯೆ ಅನ್ಯಾಯ ತಾಳ್‌ದ್ ಕಷ್ಟೊನು ಸಹಿಸೊಂಡ ಆಯನ್ ದೇವೆರ್ ಮೆಚ್ಚುವೆ ಅಂದ್‌ದ್ ಆಯಗ್ ಗೊತ್ತುಂಡು.

20ಆಂಡ ತಪ್ಪು ಮಲ್ತ್‌ದ್ ಪೆಟ್ಟ್ ತಿನ್ಪಿನೆಟ್ ತಾಳ್ಮೆಡ್ ಉಪ್ಪುನಾಂಡ ಐಟ್ಟ್ ದಾನೆ ಪುಗರಿಕೆ? ಆಂಡ ಎಡ್ಡೆಂತಿನೆನ್ ಮಲ್ತ್‌ದ್ ಕಷ್ಟೊನು ತಾಳ್ಮೆಡ್ ಸಹಿಸೊಂಡ ಅವು ದೇವೆರೆ ದುಂಬು ಮೆಚ್ಚಿಗೆದವು ಆದುಂಡು.

21ಐಕಾದ್ ದೇವೆರ್ ನಿಕ್ಲೆನ್ ಎಡ್ಡೆ ಕೆಲಸೊನು ಮಲ್ತ್‌ದ್ ಕಷ್ಟ ಸೈಸೊನಿಯೆರೆ ಲೆತ್ತ್‌ದೆ, ಅಂಚೆನೆ ಕ್ರಿಸ್ತೆಲಾ ನಿಕ್ಲೆಗ್ ಬೋಡಾದ್ ಕಷ್ಟ ತಿಂದ್‌ದ್, ನಿಕುಲು ಆಯನ ಪಿರವುಡು ನಡಪುಲೆಕ್ಕ ಮಾದ್ರಿ ತೋಜಾಯೆ.

22“ಆಯೆ ವಾ ಪಾಪಲಾ ಮಲ್ತ್‌ದಿಜೆ; ಆಯನ ಬಾಯಿಡ್ದ್ ವಾ ಕುರ್ತೆಲ್ ಪಾತೆರಲಾ ಬೈದಿಜಿ.”

23ಆಯಗ್ ನೆರ್ಪಿನಾಕುಲೆಗ್ ಪಿರ ನೆರ್ತಿಜೆ; ದಿಂಜ ಶ್ರಮೆನ್ ಅನುಭವ ಮಲ್ಪುನಗ ಏರೆನ್ಲಾ ಪೋಡಿಯಾಯಿಜೆ. ಆಂಡ ನೀತಿಡ್ ನ್ಯಾಯತೀರ್ಪು ಮಲ್ಪು ದೇವೆರೆಗ್ ತನನ್ ಒಪ್ಪಿಸಾಯೆ.

24ನಮ ಪಾಪೊಲೆಗಾದ್ ಸೈತ್‌ದ್ ನೀತಿವಂತೆರಾದ್ ಬದುಕುಲೆಕ್ಕ ಯೇಸು ನಮ ಪಾಪೊಲೆನ್ ತಾನೇ ತನ ಶರೀರೊಡು ತುಂಬೊಂದು ಮರಣದ ಕಂಬೊನು ಏರಿಯೆ. ಆಯನ ಗಾಯೊಡ್ದು ನಂಕ್ ಗುಣ ಆಂಡ್.

25ನಿಕುಲು ಸಾದಿ ತತ್ತ್‌ದ್ ಪೋತಿ ಕುರಿಕುಲು ಆದಿತ್ತರ್. ಆಂಡ ಇತ್ತೆ ನಿಕುಲು ಪಿರ ತಿರ್ಗ್‌ದ್ ನಿಕ್ಲೆನ ಆತ್ಮೊನು ಕಾಪುನ ಕುರುಬೆಲಾ ಪರಂಬರಿಪುನಾಯೆಲಾ ಆದುಪ್ಪು ಯೇಸು ಕ್ರಿಸ್ತನ ಕೈತಲ್‌ ಬೈದರ್.

← Chapter 1 Jump to: Chapter 3 →