Hebrews 12

Tulu (ಪೊಸ ಒಡಂಬಡಿಕೆ)

← Chapter 11 Jump to: Chapter 13 →

1ಅಂಚಾಯಿನೆಡ್ದ್ ಈತ್ ಜನ ಸಾಕ್ಷಿದಾಕುಲು ಮುಗಲ್‌ದ ಲೆಕ್ಕ ನಮ ಸುತ್ತಲಾ ಉಲ್ಲೆರ್. ನಂಕ್ ಅಡ್ಡಿ ಮಲ್ಪುನ ಮಾತ ಭಾರೊನ್ಲಾ ಅಂಟುನ ಪಾಪೊನ್ಲಾ ನಮ ದೆತ್ತ್ ದೀದ್ ನಂಬಿಕೆನ್ ಪುಟ್ಟಾವುನಾಯೆಲಾ ಕೊರ್ಪಿನಾಯೆಲಾ ಆದುಪ್ಪು ಯೇಸುನ ಮಿತ್ತ್ ದೃಷ್ಟಿ ದೀಕ. ನಂಕ್ ನೇಮಕ ಆದುಪ್ಪು ಬಲ್ಪಾಟೊನು ತಾಳ್ಮೆಡ್ ಬಲ್ಪುಗ. ಆಯೆ ತನ ದುಂಬು ದೀದಿತ್ತಿ ಸಂತೋಷಗಾದ್ ಅವಮಾನೊನು ಅಸಡ್ಡೆ ಮಲ್ತ್‌ದ್ ಕ್ರುಸ್ಸುದ ಮರಣೊನು ಸೈಸೊಂದು ದೇವೆರೆ ಗದ್ದಿಗೆದ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಲ್ಲೆ.

3ನಿಕ್ಲೆ ಪ್ರಾಣೊಡು ಸೋತಿನಾಕುಲಾದ್ ಬೇಜಾರ್ ಆವಂದಿಲೆಕ್ಕ ಆಯನ್ ಎನ್ನೊನ್ಲೆ. ಆಯೆ ಪಾಪಿಲೆಡ್ದ್ ಏತೋ ಪಗೆನ್ ಸೈಸೊಂಡೆ.

4ನಿಕುಲು ಪಾಪೊಗು ವಿರೋಧಾದ್ ಪೊಂರ್ಬುನೆಟ್ ನೆತ್ತೆರ್ ಗುಪ್ಪುನೆಟ್ಟಲಾ ವಿರೋಧ ಮಲ್ತ್‌ಜರ್.

5ಜೋಕುಲೆಗ್ ಪನ್ಪಿಲೆಕ್ಕ ನಿಕ್ಲೆಗ್ ಪಂಡಿನ ಎಚ್ಚರಿಕೆದ ಪಾತೆರೊಲೆನ್ ಮದತ್ ಬುಡಿಯರಾ? ದಾನೆಂದ್ಂಡ “ಮಗಾ, ಕರ್ತವನ ಶಿಕ್ಷೆನ್ ತಿರಸ್ಕಾರ ಮಲ್ಪಡ; ಆಯೆ ನಿನನ್ ದಡ್ಡಿನಗ ಬೇಜಾರ್ ಮಲ್ಪಡ;

6ಕರ್ತವೆ ತಾನ್ ಪ್ರೀತಿ ಮಲ್ಪುನಾಯಗೇ ಶಿಕ್ಷೆ ಕೊರ್ಪೆ; ತಾನ್ ಸೇರಾವೊನುನ ಪ್ರತಿಯೊಂಜಿ ಮಗಕ್ಕ್ ಹಾಕುವೆ ಪನ್ಪಿನವು.”

7ನಿಕುಲು ತೆರಿದಿನಾಕುಲು ಆವೊಡು ಪಂಡ್ದೇ ನಿಕ್ಲೆಗ್ ಶಿಕ್ಷೆ ಆಪುಂಡು ಅಂದ್‌ದ್ ತೆರಿದ್ ಅವೆನ್ ಸಹಿಸೊನ್ಲೆ. ದೇವೆರ್ ನಿಕ್ಲೆನ್ ಜೋಕುಲಂದ್‌ದ್ ನಡಪಾವೆ.

8ಅಮ್ಮೆರೆಡ್ದ್ ಶಿಕ್ಷೆ ಪಡೆವಂದಿನ ಮಗೆ ಓಲ್ಲೆ? ಜೋಕುಲು ಮಾತೆರ್ ಪಡೆಯುನ ಶಿಕ್ಷೆ ನಿಕ್ಲೆಗ್ ಉಂಡಾಯಿಜಿಡ ನಿಕುಲು ಹಾದ್ರೊಡ್ದು ಪುಟ್ಟುದಿನಾಕುಲೇ ಅತ್ತಂದೆ ಮಗಾಡ್ಲು ಅತ್ತ್.

9ಉಂದು ಮಾತ್ರ ಅತ್ತಂದೆ ನಂಕ್ ಶಿಕ್ಷೆ ಕೊರಿನ ಶರೀರ ಸಮ್ಮಂಧವಾಯಿನ ಅಮ್ಮಾಡ್ಲೆಗ್ ನಮ ಮರ್ಯಾದಿ ಕೊರಿ ಲೆಕ್ಕ, ನಮ್ಮ ಆತ್ಮೊಲೆಗ್ ಅಮ್ಮೆ ಆದುಪ್ಪುನಾಯಗ್ ನಮ ನನಲಾ ತಗ್ಗ್‌ದ್ ಬದುಕೊಡು.

10ಆ ಅಮ್ಮಾಡ್ಲು ಕೆಲವು ದಿನತ ಪ್ರಯೋಜನೊಲೆನ್ ಲಕ್ಷೊಗು ದೆತ್ತೊಂದು ತನ್ಕುಲೆಗ್ ಮನಸ್ ಬತ್ತಿಲೆಕ್ಕ ನಂಕ್ ಶಿಕ್ಷೆನ್ ಕೊರಿಯೆರ್. ಆಂಡ ದೇವೆರ್ ನಮ ಆಯನ ಪರಿಶುದ್ಧತೆಡ್ ಪಾಲ್‌ದಾರೆರಾವೊಡು ಪಂಡ್ದ್ ನಮ ಎಡ್ಡೆಗಾದ್ ಶಿಕ್ಷೆ ಕೊರ್ಪೆ.

11ವಾ ಶಿಕ್ಷೆ ಆಂಡಲಾ ಆ ಸಮಯೊಗು ನಂಕ್ ಸಂತೋಷದವು ಆದ್ ತೋಜಂದೆ ದುಃಖದವು ಆದ್ ತೋಜುಂಡು, ಆಂಡಲಾ ಐಡ್ದ್ ಬೊಕ್ಕ ಅವು ಶಿಕ್ಷೆ ಪಡೆಪಿನಾಕುಲೆಗ್ ನೀತಿ ಪನ್ಪಿ ಫಲೊನು ಕೊರ್ದು ಮನಸ್‌ಗ್ ಸಮಾಧಾನೊನು ಉಂಡು ಮಲ್ಪುಂಡು.

12ಐಡ್ದಾವರ ಬಲದಾಂತಿ ಕೈಲೆನ್ಲಾ ನಡುಗುನ ಮೊರಂಪುಲೆನ್ಲಾ ಸುದಾರಿತೊನ್ಲೆ.

13ನಿಕ್ಲೆ ಕಾರ್‌ಗ್ ಸರ್ತ ಸಾದಿನ್ ಮಲ್ತೊನ್ಲೆ. ಇಂಚ ಮಲ್ತರ್ಡ ಕುಂಟುನ ಕಾರ್ ಕುಸ್ಕುದು ಪೋವಂದೆ ಗುಣ ಆಪುಂಡು.

14ಮಾತೆರೆಡೊಪ್ಪ ಸಮಾಧಾನೊಡುಪ್ಪೆರೆಲಾ ಪರಿಶುದ್ಧತೆಡ್ ಉಪ್ಪುನೆಕ್ಕ್‌ಲಾ ಪ್ರಯತ್ನ ಮಲ್ಪುಲೆ. ಪರಿಶುದ್ಧತೆ ಇಜ್ಜಂದೆ ಏರ್ಲಾ ಕರ್ತವನ್ ತೂಪುಜೆರ್.

15ನಿಕ್ಲೆಡ್ ಏರಾಂಡಲಾ ದೇವೆರೆ ದಯೊಕು ತತ್ತ್‌ದ್ ಪಿರಜಾರಂದಿಲೆಕ್ಕ ವಾ ವಿಷತ ಬೇರ್‌ಲಾ ನಿಕ್ಲೆಡ ತೆಗ್‌ಲ್‌ದ್ ಅಸಮಾಧಾನೊನು ಪುಟ್ಟಾದ್ ಸಭೆತಾಕುಲೆನ್ ಹಾಳ್ ಮಲ್ಪಂದಿಲೆಕ್ಕ ತೂಲೆ.

16ವಾ ಹಾದ್ರದಾಯೆ ಆವಡ್, ಏಸಾವಲೆಕ್ಕ ಲೋಕದಾಯೆ ಆವಡ್ ನಿಕ್ಲೆಡ್ ಇಜ್ಜಂದಿಲೆಕ್ಕ ಜಾಗ್ರತೆಡ್ ತೂವೊನ್ಲೆ. ಆ ಏಸಾವೆ ಒಂಜೇ ಒಂಜಿ ವಣಸ್‌ಗಾದ್ ತನ ಕಡೀರ್‌ದ ಹಕ್ಕ್‌ನ್ ಕೊರ್ದು ಬುಡಿಯೆ.

17ಐಡ್ದ್ ಬೊಕ್ಕ ತನ ಅಮ್ಮೆರೆನ ಆಶೀರ್ವಾದೊನು ಹಕ್ಕ್‌ಡ್ ಪಡೆವೊಡು ಅಂದ್‌ದ್ ಕಣ್ಣೀರ್ ಜಪುಡಾವೊಂದು ಪಶ್ಚಾತಾಪ ಪಡೆಯೆಡಲಾ ನಡತಿನೆನ್ ಇಜ್ಜಂದಿಲೆಕ್ಕ ಮಲ್ಪೆರೆ ಸಾದಿ ಇಜ್ಜಂದೆ ತಿರಸ್ಕಾರೊಡು ಬೂರಿನೆನ್ ತೆರಿದರ್.

18ನಿಕುಲು ಮುಟ್ಟಿಯೆರೆ ಸಾದ್ಯ ಇತ್ತಿನ ಬೊಕ್ಕ ತೂ ಪತ್ತ್‌ದಿ ಪರ್ವತೊಗ್ಲಾ, ಮುಗಲ್‌ಡ್ದ್ ದಿಂಜಿದಿ ಕತ್ತೆಲೆಗ್ಲಾ, ಬಿರುಗಾಳಿಗ್ಲಾ ತುತೂರಿದ ಸ್ವರೊಕುಲಾ ಪಾತೆರೊಲೆ ಶಬ್ಧೊಗ್ಲಾ ಬೈದಿನಾಕುಲು ಅತ್ತ್. ಆ ಶಬ್ಧೊನು ಕೇಂಡಿನಾಕುಲು ತನ್ಕುಲೆಗ್ ನನ ಒಂಜಿ ಪಾತೆರೊನಾಂಡಲಾ ಪನೊಡ್ಚಿ ಅಂದ್‌ದ್ ನಟ್ಟೊಂಡೆರ್.

20ದಾಯೆಗಂದ್ಂಡ, “ಒಂಜಿ ಪ್ರಾಣಿಯಾಂಡಲಾ ಈ ಪರ್ವತೊನು ಮುಟ್ಟುಂಡ ಅವೆನ್ ಕಲ್ಲ್ ದಕ್ಕ್‌ದ್ ಕೆರೊಡು,” ಪನ್ಪಿ ದೇವೆರೆ ಅಪ್ಪಣೆನ್ ತಡೆಯೊನೆರೆ ಆವಂದೆ ಇತ್ತೆರ್.

21ಉಂದತ್ತಂದೆ ಅವುಲು ತೋಜಿದಿನವು ಆತ್ ಭಯಂಕರದವು ಆದುಪ್ಪುನೆಡ್ದ್ ಮೋಶೆ, ಎಂಕ್ ಬಾರಿ ಪೋಡಿಗೆ ಆಪುಂಡು, ನಡುಗೊಂದುಲ್ಲೆ ಅಂದ್‌ದ್ ಪನ್ತೆ.

22ಆಂಡ ನಿಕುಲು ಚೀಯೋನು ಪರ್ವತೊಗ್ಲಾ ಜೀವ ಇತ್ತಿ ದೇವೆರೆ ಪಟ್ಟಣ ಆದುಪ್ಪುನ ಪರಲೋಕದ ಯೆರೂಸಲೇಮುಗ್ಲಾ ಸೇರ್ದುಪ್ಪು ಕೋಟ್ಯಾನುಕೋಟಿ ದೇವದೂತೆರೆ ಕೈತಲ್‌ ಬೈದರ್.

23ಪರಲೋಕೊಡು ಪುದರ್ ಬರೆಪಾವೊಂಡಿ ಕಡೀರ್‌ದ ಜೋಕುಲೆನ ಸಭೆಕ್ಲಾ, ಮಾತೆರೆಗ್ ನ್ಯಾಯಾಧಿಪತಿ ಆಯಿ ದೇವೆರೆ ಕೈತಲ್‌ಗ್ಲಾ, ಸಂಪೂರ್ಣ ಆಯಿ ನೀತಿವಂತೆರೆ ಆತ್ಮೊಲೆ ಕೈತಲ್‌ಗ್ಲಾ ಬೈದರ್.

24ಪೊಸ ಒಡಂಬಡಿಕೆದ ಮದ್ಯಸ್ತೆಗಾರೆ ಆದುಪ್ಪು ಯೇಸು ಕೈತಲ್‌ಗ್ ತಲಿಪು ನೆತ್ತರ್‌ದಡೆಗ್ ಬತ್ತರ್. ಈ ನೆತ್ತೆರ್ ಹೇಬೆಲ್‌ನೆಡ್ದ್ ಎಡ್ಡೆದೆನ್ ಪಾತೆರುಂಡು.

25ನಿಕುಲು ಪಾತೆರುನಾಯನ ಪಾತೆರೊನು ಕೇನುಜಿ ಅಂದ್‌ದ್ ಪನಿಯೆರೆ ಬಲ್ಲಿ. ಭೂಮಿದ ಮಿತ್ತ್ ದೇವೆರೆ ಪಾತೆರೊಲೆನ್ ಪಾತೆರ್ದಿನಾಯಗ್ ಕೆಬಿ ಕೊರಿಯೆರೆ ಮನಸಿಜ್ಜಂದೆ ಇತ್ತಿ ಇಸ್ರಾಯೇಲ್ಯೆರ್ ಶಿಕ್ಷೆಗ್ ತಪ್ಪಾವೊಂಡಿಜೆರ್ಡ ಪರಲೋಕೊಡ್ದು ಪಾತೆರ್ನಾಯಗ್ ಎಂಕುಲು ಕೆಬಿ ಕೊರಿಯೆರೆ ಮನಸಿಜ್ಜಂದೆ ಪೋಂಡ ಎಂಚ ತಪ್ಪಾವೊನುವಾ?

26ಆಯನ ಸ್ವರ ಆ ಕಾಲೊಡು ಭೂಮಿನ್ ಅದ್‌ರಾಂಡ್; ಇತ್ತೆಲಾ ಆಯೆ ನನೊಂಜಿ ಸರ್ತಿ ಮಾತ್ರ ಯಾನ್ ಭೂಮಿನ್ ಮಾತ್ರ ಅತ್ತಂದೆ ಪರಲೋಕೊನ್ಲಾ ಪಂದಾವೆ ಅಂದ್‌ದ್ ವಾಗ್ದಾನ ಮಲ್ತ್‌ದೆ.

27ನನೊಂಜಿ ಸರ್ತಿ ಇನ್ಪಿ ಪಾತೆರೊನು ಯೋಚನೆ ಮಲ್ತ್ಂಡ ಅದ್‌ರಂದಿನ ವಸ್ತುಲು ಉಂಡಾಯಿನವು ಆದಿತ್ತಿನೆಡ್ದ್ ದೆತ್ತ್‌ದ್ ಪಾಡೊಡು ಪನ್ಪಿನವು ಸ್ಪಷ್ಟ ಆಪುಂಡು. ಅಪಗ ಅದ್‌ರಂದೆ ಉಪ್ಪುನ ವಸ್ತುಲು ಗಟ್ಟಿಯಾದ್ ಉಂತುಂಡು.

28ಅಂಚಾಯಿನೆಡ್ದ್ ಏರ್ಲಾ ಪಂದಾವೆರೆ ಆವಂದಿ ರಾಜ್ಯೊನು ಪಡೆತಿನಾಕುಲಾಯಿ, ಎಂಕುಲು ಉಪಕಾರ ಎನ್ನೊಂದು ಆಯಗ್ ಆರಾಧನೆನ್ ಭಕ್ತಿಡ್ಲಾ ಪೋಡಿಗೆಡ್ಲಾ ಮಲ್ಪುಗ. ದಾಯೆಗಂದ್ಂಡ ನಮ ದೇವೆರ್ ತಿಂದ್‌ದ್ ಬುಡ್ಪಿ ತೂತಲೆಕ್ಕನೆ ಉಲ್ಲೆ.

← Chapter 11 Jump to: Chapter 13 →