Philippians 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ಕ್ರಿಸ ಯೇಸುನ ದಾಸೆರಾದುಪ್ಪು ಪೌಲುಲಾ ತಿಮೋಥಿಲಾ ಫಿಲಿಪ್ಪಿಡುಪ್ಪು ಕ್ರಿಸ್ತ ಯೇಸುಡು ದೇವಜನೊಕುಲೆಗ್ಲಾ ಸಭಾದ್ಯಕ್ಷೆರೆಗ್ಲಾ ಸಭಾಸೇವಕೆರೆಗ್ಲಾ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

3ಯಾನ್ ನಿಕ್ಲೆಗಾದ್ ದೇವೆರೆಡ ಪ್ರಾರ್ಥನೆ ಮಲ್ಪುನ ಮಾತ ಸಮಯೊಲೆಡ್ ಸಂತೋಷೊಡು ಪ್ರಾರ್ಥನೆ ಮಲ್ಪುವೆ. ದಾಯೆಗಂದ್ಂಡ ನಿಕುಲು ಸುರುಡ್ದು ಇನಿ ಮುಟ್ಟಲಾ ಸುವಾರ್ತೆ ಸಾರಿಯುನೆಟ್ಟ್ ಪಾಲ್‌ದಾರೆರಾದ್ ಉಲ್ಲರ್ ಅಂದ್‌ದ್ ಎನ ದೇವೆರೆಗ್ ಉಪಕಾರ ಮಲ್ಪುವೆ.

6ಈ ಎಡ್ಡೆ ಬೇಲೆನ್ ನಿಕ್ಲೆಡ್ ಸುರು ಮಲ್ತ್‌ದಿನ ದೇವೆರ್ ಅವೆನ್ ದುಂಬು ಸಾಗಾದ್ ಯೇಸು ಕ್ರಿಸ್ತೆ ಬನ್ನಮುಟ್ಟ ಪೂರ್ತಿ ಮಲ್ಪುವೆ ಪನ್ಪಿ ಭರವಸ ಎಂಕ್ ಉಂಡು.

7ನಿಕ್ಲೆ ಮಾತೆರೆ ಕಡೆಕ್ಕ್ ಯಾನ್ ಇಂಚ ಎನ್ನುನವು ಸರಿಯಾದುಪ್ಪುನವೇ. ಯಾನ್ ಸೆರೆಮನೆಟ್ ಉಪ್ಪುನಗ ಸುವಾರ್ತೆದ ಸತ್ಯೊನು ದೃಢವಾದ್ ಸಾರಿನಗ ನಿಕುಲು ಎನಡೊಪ್ಪ ದೇವೆರೆ ದಯೊಟು ಪಾಲ್‌ದಾರೆರ್ ಆದುಲ್ಲರಂದ್‌ದ್ ನಿಕ್ಲೆನ್ ಎನ ಉಡಲ್‌ಡ್ ದೀವೊಂಡೆ.

8ಯಾನ್ ಕ್ರಿಸ್ತ ಯೇಸುಡುಪ್ಪುನ ಕನಿಕರೊಡು ನಿಕ್ಲೆನ್ ಏತೋ ಬಯಕುವೆ ಅಂದ್‌ದ್ ಉಂದೆಕ್ಕ್ ದೇವೆರೇ ಸಾಕ್ಷಿ.

9ಬೊಕ್ಕ ನಿಕ್ಲೆನ ಪ್ರೀತಿ ನನಲಾ ಹೆಚ್ಚೆಚ್ಚಾದ್ ಗೇನೊಡ್ಲಾ ತಿಳುವಳಿಕೆಡ್ಲಾ ಕೂಡ್ದು ಉಪ್ಪೊಡು ಪಂಡ್ದ್‌ಲಾ ಯಾನ್ ಪ್ರಾರ್ಥನೆ ಮಲ್ಪುವೆ.

10ನಿಜಾದ್ ಅವಶ್ಯ ಉಪ್ಪುನವು ದಾನೆಂದ್ಂಡ ನಿಕುಲು ಸರಿಯಾದ್ ತೆರಿಯೊಂದು, ಕ್ರಿಸ್ತೆ ಬನ್ನಮುಟ್ಟ ನಿರ್ಮಲ ಆದಿತ್ತ್‌ದ್ ವಾ ಕಪಟದಾಂತಿನಾಕುಲಾದ್ ಉಪ್ಪೊಡಂದ್‌ದೇ ಎನ ಆಸೆ.

11ಯೇಸು ಕ್ರಿಸ್ತಡ್ದ್ ಆಪಿ ನೀತಿದ ಫಲ ನಿಕ್ಲೆಡ ಏಪಲಾ ದಿಂಜಿದ್ ತೋಜಿದ್ ಬರಡ್ ಪಂಡ್ದ್‌ಲಾ ದೇವೆರೆಗ್ ದಿಂಜ ಮೈಮೆಲಾ ಸ್ತುತಿಲಾ ಸಂದಾವೊಡು ಪಂಡ್ದ್‌ಲಾ ನಟ್ಟೊನ್ವೆ.

12ಸಹೋದ್ರೆರೇ, ಎಂಕ್ ಮೂಲು ಆದುಪ್ಪುನವು ಮಾತಲಾ ಸುವಾರ್ತೆದ ಪ್ರಚಾರೊಗು ಸಹಾಯ ಆಂಡ್ ಅಂದ್‌ದ್ ನಿಕುಲು ತೆರಿಯೊನೊಡು ಅಂದ್‌ದ್ ಎನ ಆಸೆ.

13ಎಂಚಂದ್ಂಡ ಯಾನ್ ಸೆರೆಮನೆಟ್ ಉಪ್ಪುನವು ಕ್ರಿಸ್ತಡ್ದಾವರ ಅಂದ್‌ದ್ ಇಡೀ ಅರಮನೆದ ಕಾವಲ್‌ದಾಕುಲೆಗ್ಲಾ ಅಂಚೆನೇ ಒರಿದಿನಾಕುಲೆಗ್ಲಾ ತೆರಿದ್ ಬತ್ತ್ಂಡ್.

14ಬೊಕ್ಕ ಯಾನ್ ಸೆರೆಮನೆಟ್ ಉಪ್ಪುನೆಡ್ದಾದ್ ಮುಲ್ಪದ ಸಹೋದ್ರೆರೆಡ್ದ್ ಹೆಚ್ಚಿನ ವಿಶ್ವಾಸಿಲು ದೇವೆರೆ ಪಾತೆರೊನು ಪೋಡಿಗೆದಾಂತೆ ತೆರಿಪಾವೆರೆ ಧೈರ್ಯಲಾ ಭರವಸಲಾ ಮಲ್ತ್‌ದೆರ್.

15ಕೆಲೆವೆರ್ ಮಚ್ಚರೊಡು ತರ್ಕೊಗಾದ್ ಬೇತೆ ಕೆಲೆವೆರ್ ಎಡ್ಡೆ ಮನಸ್‌ಡ್ದ್ ಕ್ರಿಸ್ತನ್ ಸಾರಿಯುವೆರ್.

16ಮೊಕುಲಾಂಡಲಾ ಯಾನ್ ಸುವಾರ್ತೆನ್ ಒರಿಪಾವೆರೆಗಾದ್ ಯಾನ್ ಮೂಲು ಉಲ್ಲೆ ಅಂದ್‌ದ್ ತೆರಿಯೊಂದು ಪ್ರೀತಿಡ್ ಸುವಾರ್ತೆ ಸಾರಿಯುವೆರ್.

17ಬೇತೆ ತರೊಟಾವಡ್ ಯಾನ್ ಸೆರೆಮನೆಟ್ ಉಪ್ಪುನಗ ಎಂಕ್ ನನಲಾ ಬೇನೆ ಆವೊಡು ಅಂದ್‌ದ್ ಎನ್ನ್‌ದ್ ಕ್ರಿಸ್ತನ್ ಯಥಾರ್ಥಾದ್ ಸಾರಿಯಂದೆ ಸ್ವಾರ್ಥದ ಉದ್ದೇಶೊಡು ಸಾರಿಯುವೆರ್.

18ಆಂಡ ಅವು ಮಲ್ಲೆ ಅತ್ತ್. ವಾ ರೀತಿಡಾಂಡಲಾ ಸ್ವಾರ್ಥೊಡಾವಡ್ ಸತ್ಯೊಡಾವಡ್ ಕ್ರಿಸ್ತನ್ ಸಾರಿಯುನೆಡ್ದ್ ಯಾನ್ ಸಂತೋಷ ಮಲ್ಪುವೆ. ನನ ದುಂಬಗ್ಲಾ ಸಂತೋಷ ಮಲ್ತೊಂದೇ ಉಪ್ಪುವೆ.

19ದಾಯೆಗಂದ್ಂಡ ನಿಕುಲು ಎಂಕಾದ್ ಪ್ರಾರ್ಥನೆ ಮಲ್ಪುನೆಡ್ದ್‌ಲಾ ಯೇಸು ಕ್ರಿಸ್ತನ ಆತ್ಮ ಎಂಕ್ ಸಹಾಯ ಮಲ್ಪುನೆಡ್ದ್‌ಲಾ ಉಂದು ಮಾತಲಾ ಎನ ಬುಡುಗಡೆಗಾದ್ ಕೂಡ್ದು ಬರ್ಪುಂಡು ಅಂದ್‌ದ್ ಯಾನ್ ತೆರಿದೆ.

20ಯಾನ್ ವಾ ವಿಷಯೊಗಾಂಡಲಾ ನಾಚಿಗೆಗ್ ಗುರಿ ಆವಂದೆ ಏಪೊಗ್ಲಾ ಇತ್ತಿಲೆಕ್ಕ ಇದ ಮುಟ್ಟಲಾ ಧೈರ್ಯೊಡು ಉಪ್ಪುನೆಡ್ದ್. ಯಾನ್ ಬದುಕೊಂದಿತ್ತ್‌ಂಡಲಾ ಸರಿ, ಸೈತ್ಂಡಲಾ ಸರಿ ಎನ ಶರೀರೊಡ್ದು ಕ್ರಿಸ್ತಗ್ ಮೈಮೆ ಉಂಡಾವೊಡು ಅಂದ್‌ದ್ ಎಂಕ್ ಆಸೆಲಾ ಭರವಸೆಲಾ ಉಂಡು.

21ಎಂಕಾಂಡಲಾ ಬದುಕುನು ಪಂಡ ಕ್ರಿಸ್ತೆನೇ, ಸೈಪಿನವು ಎಂಕ್ ಲಾಭನೇ.

22ಆಂಡ ಬದುಕೊಂದಿತ್ತ್‌ಂಡ ಕ್ರಿಸ್ತಗಾದ್ ಹೆಚ್ಚ್ ಫಲ ಕೊರ್ಪಿನ ಬೇಲೆ ಮಲ್ಪುನವೇ ಅನುಕೂಲ. ಅಂಚಾಯಿನೆಡ್ದ್ ಯಾನ್ ಒವೆನ್ ಅಜತ್ ದೆಪ್ಪೊಡು ಅಂದ್‌ದ್ ಎಂಕ್ ಗೊತ್ತಾಪುಜಿ.

23ಈ ರಡ್ಡೆತ್ತ ನಡುಟು ಯಾನ್ ಒದ್ದಾಡೊಂದುಲ್ಲೆ; ಯಾನ್ ಮುಲ್ತು ಪೋದು ಕ್ರಿಸ್ತಡೊಪ್ಪ ಉಪ್ಪೆರೆಗ್ ಆಸೆ ಮಲ್ಪುವೆ; ಅವು ಎಂಕ್ ಮಸ್ತ್ ಎಡ್ಡೆಂತಿನವು.

24ಆಂಡ ನಿಕ್ಲೆಗಾದ್ರ ಯಾನ್ ಶರೀರೊಡು ಉಪ್ಪುನವು ಎಡ್ಡೆನೇ.

25ಅಂಚಾಯಿನೆಡ್ದ್ ನಿಕ್ಲೆಗ್ ಕ್ರಿಸ್ತ ನಂಬಿಕೆಡ್ ಅಭಿವೃದ್ಧಿಲಾ ಸಂತೋಷಲಾ ಉಂಡಾಪಿಲೆಕ್ಕ ಯಾನ್ ಜೀವೊಡು ಇತ್ತ್‌ದ್ ನಿಕ್ಲೆ ಒಟ್ಟುಗು ಉಪ್ಪುವೆ ಅಂದ್‌ದ್ ಭರವಸೊಡುಲ್ಲೆ.

26ಬೊಕ್ಕ ಯಾನ್ ಕುಡೊರ ನಿಕ್ಲೆ ಕೈತಲ್‌ ಬನ್ನಗ ಎನನ್ ತೂದು, ನಿಕುಲು ಕ್ರಿಸ್ತ ಯೇಸುಡು ಸಂತೋಷ ಮಲ್ಪೆರೆ ನನಲಾ ಹೆಚ್ಚಿನ ಕಾರಣ ಆಪುಂಡು.

27ಎಂಚಿನಾಂಡಲಾ ನಿಕುಲು ಕ್ರಿಸ್ತನ ಸುರ್ವಾತೆಗ್ ಯೋಗ್ಯೆರಾದ್ ನಡಪುಲೆ. ಅಪಗ ಯಾನ್ ಕುಡ ನಿಕ್ಲೆ ಕೈತಲ್‌ ಬತ್ತ್‌ದ್ ನಿಕ್ಲೆನ್ ತೂಯೆಡಲಾ ಸರಿ, ದೂರೊಡ್ದು ಇತ್ತ್‌ದ್ ನಿಕ್ಲೆ ಸಂಗತಿಡ್ ಕೇಂಡಲಾ ಸರಿ, ನಿಕುಲು ನಿಕ್ಲೆ ವೈರಿಲೆಗ್ ವಾ ವಿಷಯೊಡ್ಲಾ ಪೋಡಿಯಂದೆ ಒಂಜೇ ಆತ್ಮೊಡು ದೃಢ ಉಂತುದು ಸುವಾರ್ತೆಡ್ ದೀತಿನ ನಂಬಿಕೆಗಾದ್ ಒಟ್ಟಾದ್ ಹೋರಾಟ ಮಲ್ಪುನಾಕುಲು ಆದುಲ್ಲರ್ ಅಂದ್‌ದ್ ಯಾನ್ ತೆರಿಯೊನ್ವೆ.

28ನಿಕುಲು ಇಂಚ ಉಪ್ಪುನೆಡ್ದ್ ವೈರಿಲೆನ ನಾಶನೊಗ್ಲಾ ನಿಕ್ಲೆನ ರಕ್ಷಣೆಗ್ಲಾ ಒಂಜಿ ಗುರ್ತ ಆಪುಂಡು. ಅವು ದೇವೆರೆಡ್ದೇ ಬತ್ತಿನ ಗುರ್ತ ಆದುಪ್ಪುಂಡು.

29ದಾಯೆಗಂದ್ಂಡ ನಿಕುಲು ಕ್ರಿಸ್ತ ಮಿತ್ತ್ ನಂಬಿಕೆ ದೀಪಿನಿ ಮಾತ್ರತ್ತಂದೆ ಆಯಗ್ ಬೋಡಾದ್ ಭಂಗ ದೆತ್ತೊನಿಯೆರೆಲಾ ನಿಕ್ಲೆಗ್ ದಯ ತಿಕ್ಕ್‌ದ್ಂಡ್.

30ಎನ ಈ ಹೋರಾಟೊಲೆನ್ ನಿಕುಲು ತೂತರ್; ನನಲಾ ಯಾನ್ ಹೋರಾಟದ ನಡುಟೇ ಉಲ್ಲೆ ಅಂದ್‌ದ್ ನಿಕ್ಲೆಗ್ ತೆರಿದುಂಡು. ಆ ಹೋರಾಟ ನಿಕ್ಲೆಗ್ಲಾ ಉಂಡು.

Jump to: Chapter 2 →