Revelation 15

Tulu (ಪೊಸ ಒಡಂಬಡಿಕೆ)

← Chapter 14 Jump to: Chapter 16 →

1ಪರಲೋಕೊಡು ಅಚ್ಚಿರದ ಬೊಕ್ಕೊಂಜಿ ಮಲ್ಲ ಗುರ್ತ ಎಂಕ್ ತೋಜ್ಂಡ್. ಏಳ್‌ ಮಂದಿ ದೂತೆರೆ ಕೈಟ್ ಏಳ್‌ ಉಪದ್ರೊಲು ಇತ್ತ್ಂಡ್. ಉಂದು ಕಡೆತ ಉಪದ್ರೊಲು. ಉಂದೆಡ್ದ್ ದೇವೆರೆ ಕೋಪ ಮುಗಿಯುಂಡು.

2ಬೊಕ್ಕ ತೂ ಕಲಡಾಯಿ ಕನ್ನಡಿದ ಕಡಲ್‌ದಲೆಕ್ಕ ಇತ್ತಿನವು ಎಂಕ್ ತೋಜ್ಂಡ್. ಅಪಗ ಮೃಗತ ಮೂರ್ತಿಗ್ ಪೂಜೆ ಮಲ್ಪಂದೆಲಾ ಐತ ಪುದರ್‌ದ ಅಂಕೆದ ಗುರ್ತ ಪಾಡೊನಂದೆಲಾ ಐಟ್ಟ್ ಗೆಂದಿನಾಕುಲು ದೇವೆರ್ ಕೊರಿನ ವೀಣೆಲೆನ್ ಕೈಟ್ ಪತ್ತೊಂದು ಕನ್ನಡಿದ ಕಡಲ್ದ ಕೈತಲ್‌ ಉಂತುದಿತ್ತೆರ್.

3ಅಕುಲು ದೇವೆರೆ ಸೇವಕೆ ಆಯಿ ಮೋಶೆನ ಬೊಕ್ಕ ಕುರಿತ ಕಿನ್ನಿ ಆದಿತ್ತಿನಾಯನ ಪದೊನು ಮಲ್ತೊಂದಿತ್ತೆರ್. ಅವು ಇಂಚ ಉಂಡು, “ಸರ್ವಶಕ್ತೆ ದೇವೆರಾಯಿ, ಕರ್ತವಾ, ನಿನ ಕಾರ್ಯೊಲು ಮಲ್ಲದವುಲಾ ಅಚ್ಚಿರದವುಲಾ ಆದುಂಡು. ಮಾತ ಜನಾಂಗೊಲೆ ಅರಸೋ, ನಿನ ಮಾರ್ಗೊಲು ನ್ಯಾಯದವುಲಾ ಸತ್ಯದವುಲಾ ಆದುಂಡು.

4ಕರ್ತವಾ ನಿನ ಪುದರ್‌ಗ್ ಪೋಡಿಯಂದಿನಾಕುಲುಲಾ ನಿನ ಪುದರ್‌ನ್ ಮೈಮೆ ಪಡೆಪಾವಂದಿನಾಯೆ ಏರುಲ್ಲೆ? ಈ ಮಾತ್ರ ಪರಿಶುದ್ಧದಾಯೆ. ನಿನ ನೀತಿದ ಬೇಲೆಲು ತೋಜಿದ್ ಬತ್ತಿನೆಡ್ದ್ ಮಾತ ಜನಾಂಗೊಲು ನಿನ ಎದುರು ಬತ್ತ್‌ದ್, ನಿಕ್ಕ್ ಆರಾಧನೆ ಮಲ್ಪುವೆರ್.”

5ಬೊಕ್ಕ ಯಾನ್ ತೂನಗ ಪರಲೋಕೊಡುಪ್ಪು ದೇವೆರೆ ಸಾಕ್ಷಿದ ಗುಡಾರ ಪನ್ಪಿ ದೇವಾಲಯದ ಬಾಕಿಲ್ ಜತ್ತ್ಂಡ್.

6ಆ ದೇವಾಲಯೊಡ್ದು ಏಳ್‌ ಉಪದ್ರೊಲೆನ್ ಪತ್ತೊಂದಿನ ಏಳ್‌ ದೂತೆರ್ ಬತ್ತೆರ್. ಅಕುಲು ಮಿಂಚುನ ಶುದ್ಧ ನಾರ್‌ಮಡಿತ ಕುಂಟು ಪಾಡ್ದಿತ್ತೆರ್. ತನ್ಕುಲೆ ತಿಗಲೆಗ್ ಬಂಗಾರ್‌ದ ಪಟ್ಟಿನ್ ಕಟ್ಟ್‌ದಿತ್ತೆರ್.

7ಬೊಕ್ಕ ನಾಲ್ ಜೀವಿಲೆಡ್ ಒಂಜಿ, ಆ ಏಳ್‌ ದೂತೆರೆಗ್ ಏನಿತ್ಯೇನಿಗ್ಲಾ ಬದುಕುನಾಯೆ ಆದುಪ್ಪು ದೇವೆರೆ ಕೋಪ ದಿಂಜಿದಿತ್ತಿನ ಏಳ್‌ ಬಂಗಾರ್‌ದ ಬಾಜನೊನು ಕೊರ್‌ಂಡ್.

8ದೇವೆರೆ ಮೈಮೆ ಬೊಕ್ಕ ಬಲೊಟು ಉಂಡಾಯಿ ಪುಗೆ ಇಡೀ ಆಲಯೊಡು ದಿಂಜಿಂಡ್. ಆ ಏಳ್‌ ದೂತೆರೆ ಕೈಟ್‌ತ್ತಿನ ಏಳ್‌ ಉಪದ್ರೊಲು ಮುಗಿನೆಟ್ಟ ಆ ಪವಿತ್ರ ದೇವಾಲಯದ ಉಲಯಿ ಪೋವೆರೆ ಏರೆಡ್ದ್‌ಲಾ ಆಯಿಜಿ.

← Chapter 14 Jump to: Chapter 16 →