Daniel 2 — Teso

1Kokaru lokiareit loka airumit naka Nebukadenesar kiruja ŋesi airujasia; kiyaloŋoŋ kotauke, kikoleroto akekonyen,

2Kosodi ekabaka aicorakin anyaraun imurwok, ka ikasupok, ka ikaroak, ka Ikaludean alimokin ekabaka airujasiake, Kolomasi do kobwaata kakonyen nuka ekabaka.

3Kotema eka baka kes atiar, “Erujat eoŋ airujasit, kiyaloŋoŋ da ekatau ajenun airujasit.”

4Kosodete Ikaludean atemar ekabaka kaIJajep naka. Asurian ebe, “Wu ekabaka, kobusi ikar kere: kolimok ikonikejaanakinak airujasit, ka sio da kitoduuni apolouke.”

5Koboŋok ekabaka kotema Ikaludean atiar, “Alom akirot kamaka: arai mam yes itejenunete eoŋ airujasit ka apolouke da, kijepejepeo yes, ikusitogoi da eraunos amejei.

6Konye do arai kitodutu airujasit ka apolouke, idumunete ainakineta ka iropito ka aibuses naepol da; asa kitodikinai eoŋ airujasit ka apolouke da.”

7Kirucakis aboŋokin ebe, “Kolimok do eka baka ikekejaanakinak airujasit, kasodete isio aitodiar apolouke.”

8Koboŋok ekabaka ebe, “Ajeni eut ebe ikotosi yesi aitumor naarai ianyut ebe alom akirot kamakaŋ.

9Konye arai mam kitejenikinete eoŋ airujasit, ejai ekisil ediopet kanukus: naarai ipotu kitemokis akiro nukaisab ka nukaronok einer kakonyeneka, aitodol nailoeokinotor apakio: asa do kolimokinai eoŋ airujasit, kasodi eoŋ ajenun ebe ipedorete aitodiar apolouke.”

10Kobonokis Ikaludean kakonyen nuka eka baka ebe, “Emamei da ituŋanan kakwap yenepedori aitodiar akirot naka ekabaka: naarai emamei ekabaka loepol ido lokapedor lolem inisit emurwon, arai ekasupon, arai Ekaludeat akirot naikoni nen.

11Epagal akirot naitinaikinit ekabaka, kwabo emamei yenepedori aitodikin ekabaka, dimikito idekesio lumam iboiete kaluejaas awat.”

12Kanuka ŋun kodedeniar ekabaka konyunyurikin noi, kicorak amudiar lukacoa kere luko Babulon.

13Aso kolimoroi ekisil loka aiar lukacoa; aponi komoai Daniel ka lukaupake da aiar.

14Kosodi Daniel aboŋokin kacoa kaiyapepera Ariok ekapolon loka ikedarak luka ekabaka, loalomarit aiar lukacoa luko Babulon;

15Koboŋok kotema Ariok ekapolon loka eka baka ebe, “Kanukinyo kisuburikinia ekisil loebunit kama ejai ekabaka?” Kosodi Ariok aitejenun Daniel akirot.

16Koloma Daniel, kilip ekabaka aseikin ŋes apak, tetere itodikini ekabaka apolou.

17Kosodi Daniel alosit togoke, kitejenik ikepaup Kanania, ka Misael, ka Asaria akirot.

18Tetere ilipete aitim naka Edeke loka akuj kanuka aiyeiyea kaŋin; kinyeis Daniel ka ikepaup amudiario nepepe ka lukacoa ice luko Babulon.

19Kosodi kopukokinai Daniel aiyeiyea kaitapoet naka akuar. Kosodi Daniel aimal Edeke loka akui.

20Koboŋok Daniel, kotema atiar, “Kituritete ekiror loka Edeke ikar ka ikar: Naarai acoa ka apedor eraas nuke.

21Ŋes da iloci apakio ka ikar: Elemari ŋesi ikabakan, edakakini da ikabakan: Einakini lukacoa acoa, Aijen da mama ejaas lueberian ajenun;

22Epukori ŋesi akiro nuidulok ka nukaiyeiyea: Ejeŋi ŋesi nuejaas toma amuton, Iboie aica kaŋes.

23Emalai jo, eturit jo, wu jo Edeke loka lukapapaaka, Lokiinak eoŋ acoa ka apedor, Kwana da kitejenik eoŋ nukipou kelipito jo: Naarai kitejenik sio akirot naka ekabaka.”

24Aso koloma Daniel mama ejai Ariok, loabu ekabaka koseu amudiar lukacoa luko Babulon: abu kolot kotema ŋes kwanata atiar, “Sirikimudia lukacoa luko Babulon: kitolomarai eoŋ mama ejai eka baka, eoŋ da etodikini ekabaka apolou.”

25Kosodi kisunya Ariok aitolomar Daniel mama ejai ekabaka, kotema ŋes kwanata ebe, “Adum eoŋ etuŋanan lokodwe Iuejoreunitai luka Yuda, itejenikini ŋesi ekabaka apolou.”

26Koboŋok ekabaka kotema Daniel, ekekiror Beletesasar, atiar, “Ipedori tope ijo aitejenikin eoŋ airujasit naabu kaany, ka apolouke da?”

27Koboŋok Daniel kakonyen nuka ekabaka ebe, “Mam epedorete lukacoa, ka ikasupok, ka imurwok, karaida ikadwarak aitodikin ekabaka nukaiyeiyea nuabu ekabaka kicorak:

28konye ejai Edeke toma akuj, loepukori nukaiyeiyea, ido kitejenik ŋesi ekabaka Nebukadenesar nuejaunete kapaarasia nukoinaren, Akoniirujasit, ka aitapoeta nuka akoukon kaperitikon, kes nuta:

29Wu ekabaka, apotu aomisio kopotu mama ijai ijo kaperitikon, nuka nuekotosi ajakut; ŋol da loepukori nukaiyeiyea kitejenik ijo nuekotosi ajakut.

30Konye mam kapukokinitai eoŋ aiyeiyea na kanuka adiocoa nakijaar eoŋ adepar yenikajaran kere, konye tetere itejenikinio ekabaka apolouke, ido tetere ijenuni aomisio nukotaukon,

31“Wu ekabaka, ibu kosesen, ido koany, aput nakos. Abu aput nin nakapedor, naimwekimwek aitelekar, kobwo kakonyenekon; eiponeke da loketasuro.

32Aput ŋin korai akouke nakesabu loejok, aketorobu da ka akaninike nukepuesa, akekoik ka amurwosike nukaisinit,

33akejeke nukasua, ka aicaketake da atutubet nakasuat ka atutubet nakelupe,

34Ibu kosesen aitodol neatiakar amoru, komam akan etirorit, kocam aput aicaketake nukasua ka elupe, kobilibil kes,

35Kobilibilunos da asuat, ka elupe, ka aisinit, ka epuesa, ka esabu da, koluoros kwape agugu nukopejal kamu; kokutar ekwam pit, komam kes edumunitos aibois: koluor amoru naabu kocam aput eronat lokos, kilelebun akwap kere.

36“Ŋin ŋes airujasit; kilimori kwana do apolouke kakonyen nuka ekabaka.

37Ŋo, wu ekabaka, irai ekabaka loka ikabakan, loabu Edeke loka akui koinak ajakanut, ka apedor, ka agogoŋ, ka aibuses.

38Kama iboioto da idwe luka ituŋa kere, abu kokorak akanikon itian luka ais ka ikweny luka akui, koinak ijo ayait kes kere: irai ijo akou naka esabu.

39Akaulokon kitupakin acejakanut namam eriakas kajo; ka ajakanut ace nakiwuniet naka aisinit naeyai rwaru akwap kere.

40Egogoŋ ajakanut nakiwononet kwape kasuat: naarai ebilibilei asuat iboro kere, idecideci da: ido kwape kipicipicia asuat nul kere, ebilibilei ipicipici ŋin da.

41Ido kwape kianyunia aicaketa ka ibokoro, atutubet naka elupe loka ekajean, atutubet da naka asuat, eraun ajakanut naetiakak; konye ejaun kotomake agogoŋ naka asuat, naarai ibu koany asuat inyalakina elupe lokenyadu.

42Ido kwape keraatar ibokor luka akejen atutubet nakasuat, atutubet da nakelupe, ikwaikin nen ajakanut, atutubet naegogon, ka atutubet da naebilil.

43Ido kwape kianyunia asuat inyalakina kelupe lokenyadu, inyalakin kwape kwaŋin aur naka ituŋa; konye mam imorianakinos, kwape mam inyalakinotor asuat kelupe.

44Ido kapaarasia nuka ikabakan nul edakakini Edeke loka akui ajakanut namam emudiario ikar kere, karaida airumuke ajalakinio ituŋa ice; konye ebilibilei emudiari da ajakanuto nun kere, ido kojaenena ikar kere.

45Ido naarai ibu koany amoru etiakun koronat komam akan etirorit, kobilibil asuat, ka aisinit, ka elupe, ka epuesa, ka esabu da; etejenu Edeke lokapolon ekabaka nuekotosi ajakut: erai airujasit nakabeit, etogogoŋi da apolouke.”

46Kosodi ekabaka Nebukadenesar aibiror ebuburia, koma Daniel, kicorak ainakin asubanit ka lueur maa.

47Koboŋok ekabaka kotema Daniel atiar, “Abeit Ekonideke ŋes erai Edeke loka idekesio, ka EJAKAIT loka ikabakan, ka ekapukoron nukaiyeiyea, naarai ipedo ijo apukor aiyeiyea nin.”

48Kitopoloo do ekabaka Daniel, koinak ŋes ainakineta nuipu nuepolok, koinak ŋes ayait ebuku kere loko Babulon, kitarau da ŋes ekayaiton lokapolon loka lukacoa kere luko Babulon.

49Kilip Daniel ekabaka, kitopol ŋesi Sadurak, ka Mesak, ka Abed-nego kotoma akiro nuka ebuku loko Babulon: konye kojaenena Daniel orute loka ekabaka.