Daniel 3

Teso

← Chapter 2 Jump to: Chapter 4 →

1Abu ekabaka Nebukadenesar kosub aput naka esabu, aoiauke ikubitin akaisakanykape, alalauke da ikubitin ikanykape: kosipok apuuton naka Dura, obuku loko Babulon.

2Kosodi ekabaka Nebukadenesar aijukar atukonokin lukibukui, ka luketeok, ka lukitemwan, ikerabak, ka ikeŋadak, ikenerunak, ka iricakisila, ka ijaka kere lukobukui, aponare toma asuban nuka aitan aput naabu ekabaka Nebukadenesar kosipokinite,

3Kosodete lukibukui, ka luketeok, lukitemwan, ka ikerabak, ka ikeŋadak, ka ikenerunak ka iricakisila ka ijaka kere lukobukui, kotukonokinos kanuka asuban nuka aput naabu eka baka Nebukadenesar kosipokinite; kobwaata kesi kakonyen nuka aput, naasipokinit ekabaka Nebukadenesar.

4Kosodi lokalimoron aiworoor kuju ebe, “Kicorakinitai yes ituŋa, ka atekerin ka aŋajepa,

5naipupunioto aruo naka arupepe, ka alamaru, ka adeudeu, ka aiosi, ka etida, ka esos, ka nolipone kere loeruo, kosodete aisuded kere aima aput naka esabu naabu ekabaka Nebukadenesar kosipokinite:

6ido yenimam isudedei aima apak nipenin, ecakakinio kidin oupa loesarani noi.”

7Aso kapak kaŋin kepuput ituŋa kere aruo naka arupepe, ka alamaru, ka adeudeu, ka ajosi, ka etida, ka ŋolipone kere loeruo, kosodete ituŋa kere, atekerin, ka aŋajepa, aisuded aima aput naka esabu naabu ekabaka Nebukadenesar kosipokinite.

8Kosodi kapak kaŋin kikunyakis Ikaludean ice aideide Iyudayan.

9Kobonokis kotemasi ekabaka Nebukadenesar atiar, “Wu ekabaka Nebukadenesar, kobusi ikar kere,

10Ŋo, wu ekabaka, ibu kibwaik ekisil ebe, ŋin yeniirari aruo naka arupepe, ka alamaru, ka adeudeu, ka aiosi ka etida, ka esos, ka ŋolipone kere loeruo, kisudedei komai aput naka esabu:

11ido nin yenimam isudedei ka aima ecakakinio kidin oupa loesarani noi.

12Ejaas Iyudayan ice luibu ijo kitopoloo kotoma akiro nuka ebuku loko Babulon, Sadurak, ka Mesak, ka Abed-nego; ituŋa ŋul, wu ekabaka, mam kipodosi jo; mam ijaanakinete idekesiokon, karaida aima aput naka esabu naibu kosipok.”

13Kosodi konyet Nebukadenesar anyunyurikin koresiar kicorak ayaun Sadurak, ka Mesak, ka Abed-nego. Koyaunai ituŋa nul akonyen nuka ekabaka,

14Koboŋok Nebukadenesar kotema kes atiar, “Yes, Sadurak, ka Mesak, ka Abed-nego, ipeleikinito kereka yesi apele aigir aijaanakin ekadeke, aima da aput naka esabu naabu eoŋ kasipok?

15Aso natikwana arai itemonokino kipuput aruo naka arupepe, ka alamaru, ka adeudeu, ka ajosi, ka etida, ka esos, ka ŋolipone kere loeruo, kisudedeoto aima aput naabu kasub, aso; konye arai mam imaete, kicakakinio toma oupa loesarani noi; ido iŋai bo Edeke nol Iokiyuuni yes kakaninika?”

16Kobonokis Sadurak, ka Mesak, ka Abed-nego, kotemasi ekabaka atiar, “Wu Nebukadenesar, mam sio ibusakinit aboŋokin jo kotoma akirot kaŋin,

17Arai kikwaik nen, epedori Edekekosi lokijaanakini ayuun sio kotoma oupa loesarani noi, kiyuuni da kakanikon, wu ekabaka.

18Konye arai mere kwaŋin, kojen, wu ekabaka, kwape mam sio kijaanakinia idekesiokon karaida aima aput naka esabu naibu kosipok.”

19Kanen, konyunyurikin eut Nebukadenesar, kitegelikin epone loka akonyeneke mama ejaas Sadurak, ka Mesak, ka Abed-nego, kiner, kicorak aitasaran eupa aatenak akanykaarei adepar nelem esarania.

20Kicorak ikagogoŋok ice kanul luajaas ajoreke ajen Sadurak, ka Mesak, ka Abednego: ka acakakin da toma oupa loesarani noi.

21Aponi koenai ituŋa nul konapitos ipaleikee, ka ikootinikee, ka ilounakec, ka inapenekee ice, kocakakis kidin oupa loesarani nol.

22Kanuka nun naarai abu ekabaka kicorakinite eut kosaranunite eupa noi, apotu aipelonoreta nuka akim koarata ituŋa kwi luetiŋito Sadurak, ka Mesak, ka Abed-nego.

23Kodooto ituŋa nul luuni, Sadurak, ka Mesak, ka Abed-nego, eenen kidin oupa loesarani noi.

24Kosodi ekabaka Nebukadenesar aumokin, kodetun; kiner kotema ikekenerunak atiar, “Mam nat oni kicakakinit ituŋa iuni eenen kidiŋ akim?” Kobonokis kotemasi ekabaka atiar, “Abeit, wu ekabaka.”

25Koboŋok kotema atiar, “Koany, aseseni eoŋ ituŋa iwonon elaeara, elosete kokidin akim, kwabo emamei kes aronis; as ima naka Iokiwononet esubit bala okoku loka idekesio.”

26Kosodi kikunyak Nebukadenesar okek loka eupa loesarani noi; kotema atiar, “Sadurak, ka Mesak, ka Abed-nego, yes ibulesin luka Edeke Loejai kuju kakui, kolomutu, kopotu nee,” Kosodete Sadurak ka Mesak ka Abed-nego alomun kokidin akim,

27Kotukokinos lukibukui ka luketeok, ka lukitemwan, ka ikenerunak luka ekabaka, aanyun ituŋa nul, lumam akim apedorit awatekec, karaida itima luka akwesikee mam asisiito, karaida ikeeenapen mam ilocokino, karaida aures naka akim mam ajaas kakes.

28Kotema Nebukadenesar atiar, “Kituritete Edeke loka Sadurak, ka Mesak, ka Abed-nego, loejukuni ekemalaika, kitaiar ikebulesin luapotu komunokinos ŋes, kilocoto da akirot naka ekabaka, kijaikis awatekec kinyeis aijaanakin karaida aima edeke kere nabarai Edekekee bon.

29Ŋes esilakinia ekisil ebe, ŋulutuŋa, ka ateker, ka aŋajep, luinerenenas aronis kere mama ejai Edeke loka Sadurak, kaMesak ka Abed-nego, eiepeiepeo, itogoikec da ituluorio amejei: naarai emamei edeke ece loepedori aitajar kopone kanol.”

30Kosodi ekabaka aitopoloor Sadurak, ka Mesak ka Abed-nego, kobuku loko Babulon.

← Chapter 2 Jump to: Chapter 4 →