Ecclesiastes 1

Teso

Jump to: Chapter 2 →

1Akiro nuka Ekalimonokinan, okoku loka Daudi, ekabaka kotoma Yerusalem.

2Inera Ekalimonokinan ebe, Aamameak nuka aamameak; aamameak nuka aamameak, kere eraas aamameak.

3Anyoin ameda naedumuni etuŋanan kaitaaritoike kere naetaaritor kokwap kakoloŋ?

4Elosi atur, ebuni da atur ace; Konye iboienenei akwap ikar kere,

5Elomuni akoloŋ, elomari da akoloŋ, Iwonyari alosit aiboisike neelomunia.

6Elosi ekwam ari naka eŋalakimak, Kosodi aibelokin agolitomei; Ibelonokini ducudue kalositoke, Eboŋori bobo toma airimorike.

7Eleleete icorin kere toma aŋolol, Konye mam aŋolol ilelebun; Aibois naelosenenete icorin, Nepenen da elosenenete bobo.

8Ileleba iboro kere aipas; Mam epedori etuŋanan alimun: Mam akoŋu imonikin asesen, Akit da mam eupi akiirar.

9Nukejaas apeŋo kes nueiaunos rwaru; Nukiswamao apeŋo kes nuiswamao rwaru; Emamei ibore yenikitetet kokwap kakoloŋ.

10Ejai tope ibore yenebalas ituŋa ebe, “Koany, itet yen”? Keiau kolo ŋo kokaru lukigeikinete oni.

11Emamei aiitunet naka ikar lukolo ŋo: Mam ejaun da aiitunet naka ikar luekotosi aponare, Kotoma kanul kaluetupanakinete.

12Eoŋ Ekalimonokinan abu karai ekabaka loka Isirael kotoma Yerusalem.

13Abu kebwaik ekatau amoot ka aŋicun kacoa kere nuiswamas kokwap kakuj; ŋes aitaaritoi naepol naabu Edeke kijaik odwe luka ituŋa aitaaritor.

14Abu kaany aswamisio kere nuiswamas kokwap kakoloŋ; ido koany, kere eraas aamameak ka ainyam ekwam.

15Yenimagul mam epedori aitetenio: Yenemamei da mam epedorio aimar.

16Abu keneru kotauka, katema atiar, “Koany, adum acoa naepol adepar kere lukageikinete eoŋ ko Yerusalem: eebo, adumu ekatau acoa naepol noi ka aijen.”

17Abu kebwaik ekatau aijen acoa, aijen da ikerep, ka abaŋaanut: abu kaienu ebe eraas ŋun da ainyam ekwam.

18Naarai toma acoa naepol ŋes ejai akadakin naepol: Ŋol da loiyatakini aijen iyatakini ican.

Jump to: Chapter 2 →