Ecclesiastes 4

Teso

← Chapter 3 Jump to: Chapter 5 →

1Kasodi bobo kaany aimwaŋ kere naiswama kokwap kakoloŋ: ido koany, akiyo nuka nul kalukemwanitai, kwabo emameete luitalakarete kes; koiai da apedor neejaas luemwanito kes, konye komameete luitalakarete kes.

2Ŋes keturio lukatwak luadaut atwakare aitelekarit lueiarete lueroko eiarete,

3Eebo, kaomoom aitelekarit kere nin yeneroko ejauna, yenimam ber eanyunit aswamisio nukaronok nuiswamas kokwap kakoloŋ.

4Kasodi aanyun aitaaritoi kere ka niniswam kere nakapirianut, kanuka ŋun ŋes ikokotikinio etuŋanan ekeidunyet. Ŋun da eraas aamameak ka ainyam ekwam.

5Ilokonyikini ebaŋ akekanin, kosodi ainyam akekuan elopet.

6Amukunet adiopet naka akan kaiyamakina itelekarit amukuneta aarei kaitaaritoi ka ainyam ekwam.

7Kasodi bobo kaany aamameak kokwap kakoloŋ.

8Kojai obonipe, komamei lokiareit; eebo, emamei ŋes ikoku karaida onaee; konye aitaaritoike kere mam enaŋi, akekonye da mam imonikinos abar, Aso ebala ebe, “Etaarikini iŋai, emiki da ekatau ajokis kanuka ŋai?” Ŋun da aamameak, eebo, aitaaritoi naepol.

9Itelekarito iarei ediopet; naarai ejaas keropit loejok kanuka aitaaritoikec,

10Naarai arai kibiroros, itonyouni ediopet aupake; konye itukwi nin yeneiai bon naibiroror, yenemamei aupake loitonyouni,

11Bobo da, arai eperete iarei nepepe, ibusubusakinete: konye obonipe epedori biai aibusubusakin?

12Arai da itelekari etuŋanan obonipe, ipikorete ŋes iarei; auno da naicipitai kauni mam eneda atipet,

13Ekatumunan lokican lokacoa itelekarit ekabaka loemoionit kobanaana, lomam ecamuni bobo alimokinio.

14Naarai toma aenis ŋes kelomunia araun ekabaka; eebo, keurio kerai lokican kajakanutuke.

15Abu kaany lukaiarak kere luilatos kokwap kakoloŋ, koiaas nepepe kekatumunan, lokiareit, loabwoi kaiboisike.

16Emamei neesanakinete ituŋa kere, nul kere luirumit ŋesi: konye nul luetupanakinete mam isiyalamikinete ŋes. Abeit nun da eraas aamameak ka ainyam ekwam.

← Chapter 3 Jump to: Chapter 5 →