Ezra 1

Teso

Jump to: Chapter 2 →

1Kokaru losodit loka Kuro ekabaka loko Perusia, tetere itodolikinio akirot naka EJAKAIT kaituk naka Yeremia, kisidik EJAKAIT etau loka Kuro ekabaka loko Perusia, kolimo anatar ajakanutuke kere, kiwadika da ebe:

2“Inera kwanata Kuro ekabaka loko Perusia ebe, ‘Kainaki eoŋ EJAKAIT, Edeke loka akuj, ajakanuto kere nuka akwapin; keeoraki da adukokin ŋes etogo Yerusalem, loejai toma Yuda.

3Ŋin yenejai kayes kotuŋake kere, kojai Ekedeke kaŋes, kolot Yerusalem, loejai toma Yuda, koduk etogo loka EJAKAIT, Edeke loka Isirael, ŋes Edeke, loejai Yerusalem.

4Yenesalit da kere, kaŋiniibois naiboiororor, kiŋarakis ituŋa luka aiboisike kepuesa, ka esabu, ka iboro, ka ibaren, komam imarakinito ainakineta nuka akot nuka etogo loka Edeke loejai Yerusalem.’’’

5Kosodete konyout lukapolok luka ikekia luka Yuda ka Benyamin, ka isasedotin, ka Ilebin, kere luabu Edeke kisidik ikecetauon alosit aiduk etogo loka EJAKAIT loejai Yerusalem.

6Ŋul da kere lualukunitos kitogogoŋoto akecekanin kanuka iboro luka epuesa, ka esabu, ka iboro, ka ibaren, ka iboro luka etiai loepol, komam imarakinito kere luainaldnito kanuka akot.

7Kitolom Kuro da iboro luka etogo loka EJAKAIT, luabu Nebukadanesar kolem koYerusalem, kibwaik abila naka idekesioke;

8ŋupeŋul etolomuni Kuro ekabaka loko Perusia kakan naka Mituredat ekeŋadan, kimarak Sesebasar, ekapolon laka Yuda.

9Lo ŋes etiaikec: atuba akaisauni nuka esabu, atuba alukumit nuka epuesa, ikileŋa akaisaarei ka lukanykaoŋon:

10atiboi akaisauni nuka esabu, atiboi nuka epuesa nuka epone lokiareit akwat aoŋon ka itomon, ka iboro ice elukumit.

11Iboro kere luka esabu ka luka epuesa emwaasi ilukumin ikany ka akwat aoŋon, Abu Sesebasar koyaŋau ŋul kere, nakeyaŋauniata luejoreoritai anyoun koBabulon kiton Yerusalem.

Jump to: Chapter 2 →