Ezra 9

Teso

← Chapter 8 Jump to: Chapter 10 →

1Kosodi kedaut aswam akiro nun kere, kekunyakis ikapolok eoŋ, kobalasi atiar, “Mam etiakara ituŋa luka Isirael, ka isasedotin ka Ilebin kotuna luka akwapin, iswamaete kwape ejaatar italesiakee, luka Ikanaanin, ka Ikitin, ka Iperisin, ka Iyebusin, ka Imonain, ka Imoabin, ka Imisirian, ka Imorain da.

2Naarai emanyete apesurukec, komanyanakinete odwekee da; kwaijin kinyalinyalun aur nakalaunan katekerin nuka akwapin: cebo, akan naka ikapolok ka ikayaitok ŋes ageiki adiakanar ŋin.”

3Naapupunio akirot nin, kacil anapitoka ka elouka, kenyul itima luka akouka ka lukopenekika, kasala eboie kaumokinit.

4Kotukonokinos neaiai kere luamaranete kakiro nuka Edeke loka Isirael, kanuka aidiak naka nul kaluejoreoritai; kasala eboie kaumokinit aitodol ainakinet naka eboŋ.

5Kosodi keinakini ainakinet naka eboŋ, kanyou kaisilarika, kociliciluna anapitoka ka elouka; kakukokini kakuninika, kariono akakanin mama ejai EJAKAIT Ekadeke;

6kener atiar, “Wu Ekadeke, keruma eoŋ ileic, kekamu aitirir aitonyoun akonyeneka mama ijai, wu Ekadeke: naarai eyatakinos numam adolitekosi adepar akwesikosi, apoloor agwaunitekosi adolo toma akuj.

7Ageun kapaarasia nuka lukapapaakosi kidiakanari akiro nukos kiton lolo; kanuka numam adolitekosi, ŋes kiinakinere sio, ka ikosikabakan, ka isasedotinikosi akanin nuka ikabakan luka akwapin, neejai ekileŋ, ka aijoreorio, ka anasio, ka aisurumio da ileic, kwape lolo.

8Kwana da, kapak naeuriana, etodun asianut naebuni kama ejai EJAKAIT Ekosideke, aideikin aatoŋot naaku, kainakini da sio aseitoit kaiboisike nakalaunan, kitacaik Edeke akosikonye, kainakini da adioisikwarunio kobulesenekosi.

9Naarai kirai ibulesin; konye mam Edeke kinyeinit sio kobulesenekosi, konye kiyataki aitimio kakonyen nuka ikabakan luka Perusia, ainakin sio aikwarun, ka aiduk etogo loka Edekekosi, aiteteun da aaponoruke, ainakin da sio arwatat koYuda ka Yerusalem.

10“Aso do, wu Edekekosi, kineri anu akaulo kanun? Naarai kipou kenyeis akoniicorakineta,

11nuibu kicorak kama kikonikejaanakinak inabin, ebe, ‘Akwap nailomarete airum, ŋes akwap namam elai kanuka amamus aila naka ituŋa luka akwapin, kanuka italesiakec, luesilelebata asilianutukec epuai kepuai da.

12Aso do sirikikorakis akusipesur otelepaikec, karaida amanyanakin ikusitelepai akecepesur, siriikotononos ainapakinikee karaida asulianyikec ikar kere: tetere igogonooros, inyamete ajokis naka akwap, inyeiniata ikusidwe araun airumet ikar kere.’

13Ido kedautu nun adolokin sio kanuka aswamisiokosi nueroko, kanuka agwaun akiro nuepolok, naarai ijo Ekosideke ibu kitican sio kwabo mere kwape ibusakinitor numam adolitekosi, koinak sio aatoŋot kwape na.

14Kibili kereka bobo isio aicorakinetakon, karaunos ikamurak luka atekerin nuiswamaete italesia nul? Ti mam kinyunyuranakini aitodol nekimudiaria, komamei aatoŋot, karaida luekuete?

15Wu EJAKAIT, Edeke loka Isirael, irai ijo loidolit; naarai kisalaki isio kirai aatoŋot naaku, kwape eiaar lolo: koany, kija kakonyenekon kagwaunetekosi; naarai emamei loepedori aibwo kakonyenekon kanuka nun.”

← Chapter 8 Jump to: Chapter 10 →