Hosea 7

Teso

← Chapter 6 Jump to: Chapter 8 →

1Naenyakunia ikatuŋa kaijoreorio, Naakotor aitaŋaleun Isirael, Ŋes etakanunia numam adolit nuka Epuraim, Ka aronis da naka Samaria; Naarai emodete: Elomuni ekokolan kotoma, Eŋasi ekodet loka ikaŋatak kokina.

2Mam eomoomoete kotauonokec ebe eituni eoŋ aronisikec kere; Kwana do irigaunete kes akeeeswamisio, Ejaas kakonyeneka.

3Isiyalamikinete ekabaka karonisikec, Ka ikapolok da kaisabakec.

4Eraas kere idotea: Eraas bala ekiala loinoki ekepoon; Inyeini do aiyatakin akim, Ageun kainyon akiria aitodol naebuunioto,

5Kapaaran naka ekabakawok kodekakinos ikapolok kadwaris naka ajon; Korio akekan nepepe kikesekelok.

6Naarai etemokis ikecetauon kwape ekiala, eperunete; Eiotoi anyunyurakec akuare kia; Tupuruc enoki kwape akim naesarani.

7Emwaka kes kere kwape ekiala, Idoporete ikatubokokec; Ebiroros ikabakanakec kere: Emameun kotomakec yenikewonet eoŋ.

8Enyalakin Epuraim toma atekerin; Epuraim ŋes emugati lomam ibelokinitai.

9Anyamata imo akegogoŋ, komam ejeŋi; Eebo, abwanut akoruo kamake, komam ŋes ejeŋi,

10Itejenuni aiturokin naka Isirael kakonyeneke: Kwabo mam apotu kobonut mama ejai EJAKAIT Ekecedeke, Karaida amoot ŋes kanuka ŋun kere.

11Esubit Epuraim bala ajele naebaŋaana, Naemamei aijen: Iwoneete Misiri, elosete Asuria.

12Naelosioto, alokikini kes ekaboi; Alatakini kes kwap kwape akweny nuka apak:

13Alecori kes, kwape epupunio ekodetekec. Itukwi kesi! Naarai apaasi kamakaŋ; Komudiarai, naarai ebueasi kamakaŋ! Karaida akoto alakun kes, Konye apotu kasabanakis.

14Mam apotu kamonyakis eoŋ ketaukec, Konye ibwololoete kaperitokec: Egeras kanuka akima ka ebino, Kepaliikis ŋol.

15Karaida abu eoŋ ketuutoorite, ketogogonite da akecekanin, Konye itetemonorete ameŋeranut aluikin eoŋ.

16Eboŋunete, konye mere mama ejai ŋol loejai kuju; Esubito bala akabwa nakaimod: Ibiroros ikapolokokec kekilen, Kanuka adedeŋ naka aŋajepekec: Ŋin ŋes aisekeliokec kakwap nako Misiri

← Chapter 6 Jump to: Chapter 8 →