Hosea 8

Teso

← Chapter 7 Jump to: Chapter 9 →

1Kibwaik arupepe aitukukon. Ebuni kwape emorukaalet asurokin etogo loka EJAKAIT: Naarai ebucasi aitutuketeka, Adiakasi da ikakisila.

2Kamonyete eoŋ ebe, Ekadeke, isio Isirael kijeni joo

3Aeaka Isirael ŋin naejok: Erukio lokasurup ŋes.

4Apotu kodakakis ikabakan, konye mere kanukaŋ; Aseut ikapolok, komam eoŋ ajeni: Eswamaut aputosia nuka epuesakee ka esabukee, Tetere egelario.

5Aeaka ŋesi itaokokon, ijo Samaria; Enepu akanyunyura aluikin kes: Iwori bo edolokinioto aseganut?

6Naarai ebuni ŋin da koIsirael. Ekeswaman ŋes asubi, mam nin erai Edeke: Eebo, ebilibilun itaok yenika Samaria,

7Naarai eyeete ekwam, esakete ca etapipirio: Emameete ŋes akima karaida atinoi; Mam ekokuunete aluŋuren; Konye karaida ekokuunete, Ilikorete do imo.

8Elikor Isirael: Ejaas kwana kotoma atekerin Kwape ibore yenimam isiyalamikinit.

9Naarai aloto Asuria kwape atuko naelosi abonipe: Eropi Epuraim ipaelon.

10Eebo, karaida eropete ikeganak kotoma atekerin, Kwana atukonokini eoŋ kes; Tetere epalarete nediokasilon Kainyonyoikin eka baka ka ikapolok akinyet.

11Naarai asub Epuraim itemwan luipu adiakia, Eraas mamake itemwan luka aidiak.

12Karaida kewadikaki ŋes ikakisila ilukumin itomon, Imarakinitai araut lukimo.

13Eminasi asuban; Einakinete asuban nuka akiriŋ, enyamete da; Konye mam EJAKAIT ecamuni kes: Iituni kwana numam adolitekec, Iticani kanuka aronisiokee; Eboŋorete kesi Misiri.

14Naarai emurwok Isirael Ekasubanike, Abu koduk itogoi lukapolou; Eyatak Yuda ireria luebwaitai: Konye eiukakini eoŋ akim oreriake, Idopori itogoi luegogoŋ.

← Chapter 7 Jump to: Chapter 9 →