Jonah 1

Teso

Jump to: Chapter 2 →

1Kobu akirot naka EJAKAIT mama ejai Yona okoku loka Amitai ebe,

2“Konyou, kolot Ninebe, ore ŋol loepol, kiworo aikwenyar ŋes; naarai adolu aronisikec mamakaŋ.”

3Konye konyou Yona akerear Tarusis anyoun kakonyen nuka EJAKAIT. Kolot Yopa, kodum ameeri naalosi Tarusis: kotae etiai loka erotoke, kikwaŋar, alosit kakes Tarusis, anyoun kakonyen nuka EJAKAIT.

4Konye kijuka EJAKAIT ekwam loepol aŋolol, kojaun ekwam loepol noi aŋolol, koapikinite ameeri abilibilun.

5Kosodete ikekwaŋak akurianar, kiwone ŋinituŋanan ekedeke; kocakanakisi iboro luajaas ameeri aŋolol, tetere ebeneniar. Konye alomarit Yona atutubet nakotoma naka ameeri; koperi kojotoi.

6Kobu ekapolon loka ameeri neejai ŋesi, kotema ŋes atiar, “Biai bo, ijo loijotoi? Konyou, kiwone Ekonideke! Elemuni eomoomoi Edeke nuwok, kenyeis atwakare,”

7Kotemanaros, ŋinituŋanan aupake atiar, “Bia, kelamilamata eroet, tetere kijenuni akirot kanai kidoikinio oni aronis na.” Kilamilamata, kobe Yona eroet.

8Kosodete atemar ŋes atiar, “Kinainait jo, kolimokinai sio, akirot kanai kidoikinio sio aronis na? Anyoin akoniswam? Laali bo kibunio? Ai bo obukus? Loka lukanai bo jo?”

9Kotema kes atiar, “Arai eoŋ Eburaniat; ido ayoŋit EJAKAIT, Edeke loka akuj, loasubi aŋolol ka akwap naconit.”

10Kosodete ituŋa akurianar noi noi, kotemasi ŋes atiar, “Anyoika ŋun nuisub?” Naarai apotu iruna kojenut ebe ekerit ŋesi anyoun kakonyen nuka EJAKAIT, naarai abu kolimok kes.

11Kosodete atemar ŋes atiar, “Anyoika kiswamakini isio jo, tetere aŋolol iyamakin?” Naarai eyata ekwam noi noi kaŋolol.

12Kotema kes atiar, “Kodakarai eoŋ, kocakakis aŋolol; kwaŋin iyamakinor aŋolol: naarai ajeni ebe kanukan ŋes kibunokinia yes ekwam lo loepol.”

13Konye kikwanata ituŋa kagogon aboŋor neconit; konye mam kepedoro; naarai eyata ekwam noi noi kaŋolol aluikinite kes.

14Kanuka nun kiwoneoto EJAKAIT ebe, “Kinainait jo, wu EJAKAIT, kinainait, kenyeis isio atwakare kanuka aijar naka etuŋanan kalo, sirikibwaik mamakosi aokot numam aronis: naarai ijo, wu EJAKAIT, iswama kwape itojokitor.”

15Kodakutu Yona, kocakakis aŋolol: kiyamakin aŋolol.

16Kosodete iruna aiyoŋ EJAKAIT noi noi; koinakis EJAKAIT asubanit, kiyapoto.

17Kitemokinite EJAKAIT ibore yenikecor yenepol ailikor Yona; kojaun Yona akoik naka ibore yenikecor apaarasia auni ka akuaresia auni.

Jump to: Chapter 2 →