Jonah 4

Teso

← Chapter 3 Jump to:

1Konye kitakadikis ŋun Yona noi, konyunyurikin.

2Kilip EJAKAIT, kotema atiar, “Kenaiŋait, wu EJAKAIT, mere nuabala eoŋ nu, naarokor ajai bukosi? Kanuka ŋun abu kesunya akerit Tarusis; naarai abu kajeni ebe irai ijo Edeke loisiana, ileleba aisioni, iyapi anyunyurikin, ebarar aitimikon, iituni kinyek aronis,

3Aso do, wu EJAKAIT, kenaiŋait kolema aijaraka kamakaŋ; naarai ejok eoŋ atwanare itia aijar.”

4Kotema EJAKAIT atiar, “Isubit kereka ijo ejok anyunyurikin?”

5Kosodi Yona alomar kina naka ere, kiboikin ari nakokide naka ere, kidukur iswam. Kiboikin otolimike, aanyun nuedoikinete ere,

6Kitemok EJAKAIT Edeke ekakale, kitopolou ŋes kaneejai Yona, tetere eyaun etolim akouke, ayuun ŋes kationisike. Kiyalamikin Yona noi kanuka ekakale.

7Konye kitemok Edeke ekurut tupuruc apaaran naatupakini, konyam ekakale, korinyo.

8Kosodi kelom akoloŋ, kitemok Edeke ekwam lokokide loemwana; konomo akoloŋ akou naka Yona, kiilor; kilip atwanare, kobala ebe, “Eiok eoŋ atwanare itia aijar.”

9Kotema Edeke Yona atiar, “Isubit kereka ijo ejok anyunyura kanuka ekakale?” Kotema atiar, “Asubit ejok anyunyura kiton atwanare da.”

10Kotema EJAKAIT atiar, “Itimi ijo ekakale, lomam jo ibu kitaaritor, karaida aitopoloun; loalomuni akuare adiopet, loarinyori da akuar: adiopet.

11Mam ti eoŋ ebusakinit aitim Ninebe, ere ŋol loepol; loejaas ituŋa luedeparito ilukumin akwatat ka ilukumin akaisaarei lumam epedorete atiak akecekan nakoteten ka akecekan nakokediany; ka ibaren da luipu?”

← Chapter 3 Jump to: