2 Timothy 2

Tswana (BAEBELE e e Boitshepo) 1992

← Chapter 1 Jump to: Chapter 3 →

1Ke gone ngwanaka, ka re, o thatafadiwe mo tshegofatsong e e mo go Keresete Jesu.

2Dilo tse o di utlwileng mo go nna mo gare ga basupi ba le bantsi, tsone tseo o di neele batho ba ba ikanyegang, ba ba tlaa nonofang le go di ruta ba bangwe.

3O tlhakanele bothata le nna, jaaka motlhabani yo o molemo wa ga Keresete Jesu.

4Ga go motlhabani ope yo o reng a le mo ntweng a be a itlhakatlhakantse le dilo tsa botshelo jono; e be e le gore a kgatlhe ene yo o mo kwadileng motlhabani.

5Le gone fa motho a tsena a leka mo ditshamekong, ga a ke a rwesiwa, fa a se ka a leka ka fa molaong.

6Molemi yo o dirang, ke ene o tshwanetseng go nna wa ntlha go ja maungo.

7O akanye se ke se buang; gonne Morena o tlaa go naya tlhaloganyo mo dilong tsotlhe.

8Gakologelwa Jesu Keresete fa a tsogile mo baswing, e le wa losika lwa ga Dafite, ka fa Mafokong a a Molemo a me,

9a ke tshwereng bothata mo go one, ke ba ke tsena mo dikgoleng jaaka modiradibe; mme lefoko la Modimo lone ga le a golegwa.

10Ke gone, ke itshokelang dilo tsotlhe ka ntlha ya ba ba itshenketsweng, gore le bone ba amogele poloko e e mo go Keresete Jesu, le kgalalelo e e sa khutleng.

11Go boikanngo polelo e e reng: “Gonne fa re kile ra swa nae, le gone re tlaa tshela nae;

12fa re itshoka nae, le gone re tlaa busa nae; fa re mo itatola, le ene o tlaa re itatola;

13fa rona re sa ikanyege, ene o ntse o boikanngo fela, gonne ga a ka ke a iitatola.”

14O ba gakolole dilo tse, o ntse o ba laya mo ponong ya Morena, gore ba se ka ba ganela ka ga mafoko fela, mo go se nang thuso, e le mo go timetsang fela ba ba utlwang.

15O tlhoafalele go itshupa o le molebosegi mo Modimong, o le modiri yo o se nang go tlhajwa ke ditlhong, o bua lefoko la boammaaruri ka tshiamo.

16O tshabe tse e leng dipalabalo tse di bosula; gonne ba ba di tlwaelang ba tlaa tswelela kwa pele mo boikepong.

17Lefoko la bone le tlaa ja jaaka ntho e e kekelang; ba Humenaio le Fileto e leng ba bone;

18e le batho ba ba fositseng boammaaruri, ba re: “Tsogo ya baswi e setse e fetile,” mme ba ribegetse tumelo ya bangwe.

19Le fa go ntse jalo motheo o o nitameng wa Modimo o eme fela, ka o na le sekano se, go re: “Morena o itse ba e leng ba gagwe:” Le go re: “A mongwe le mongwe yo o umakang leina la Morena a kgaogane le tshiamololo.”

20Jaana mo ntlong e kgolo go bo go se dijana tsa gouta le tsa selefera di le tsosi; le gone go na le tsa logong le tsa letsopa; dingwe ke tsa tlotlo, tse dingwe ke dijana fela.

21Ke gone fa motho a itlhapisa mo dilong tsele, o tlaa bo a le sejana sa tlotlo se se itshepisitsweng, se se tshwanetseng go jela ka mong, se se baakanyeditsweng tiro nngwe le nngwe e e molemo.

22O tshabe dithato tsa bokau, o latele tshiamo, le tumelo, le lorato, le kagiso, o na le ba ba bitsang Morena ka pelo e e itshekileng.

23O gane dipotso tsa bonyana le tse di se nang kitso, o ntse o itse fa di tsosa dikgang fela.

24Motlhanka wa Morena ga a a tshwanela go lwa, fa e se go nna bonolo fela mo go botlhe, a le setswerere go ruta, a le boiphapaanyo;

25a le boikokobetso, a sokolola ba ba ikgantshang; e tle e re kgotsa Modimo wa ba naya boikwatlhao jwa go fitlha mo kitsong ya boammaaruri.

26Ba itse go itshomola mo serung sa diabolo, ka ba gapetswe go rata ga Modimo ke motlhanka wa Morena.

← Chapter 1 Jump to: Chapter 3 →