Amos 9

Tswana (BAEBELE e e Boitshepo) 1992

← Chapter 8 Jump to:

1Ka bona Morena a eme fa sebesong, a re: “Itaya ditlhogwana tsa dikgoro, gore direpudi di reketle, o di thubaganyetse mo ditlhogong tsa bone botlhe; mme ke tlaa bolaya ba ba setseng ka tšhaka; ga go ketla go phela ope wa bone; ga go ketla go falola ope wa bone.

2Le fa ba ikepela mo Bobipong, seatla sa me se tlaa ba swatola teng; le fa ba palamela kwa legodimong, ke tlaa ba folosa teng.

3Le fa ba iphitlha mo tlhoreng ya Karemele, ke tlaa putla ke ba ke ba ntsha teng, le fa ba subegetse pono ya me, ba le mo teng ga lewatle, ke tlaa laola noga teng, mme e tlaa ba loma.

4Le fa ba ya botshwarong fa pele ga baba ba bone, ke tlaa laola tšhaka teng, mme e tlaa ba bolaya; ke tlaa ba tsepega matlho ka bosula, e seng ka molemo.”

5Gonne Morena, Modimo wa masomosomo ke ene yo o amang lefatshe, mme le tlhapologe, mme botlhe ba ba agileng mo go lone ba tlaa hutsafala; le tlaa gogomoga gotlhe fela jaaka noka; le tlaa ba le kokobela, jaaka noka ya Egepeto.

6Ke ene yo o agang matlwana a gagwe mo legodimong, o thaetse loobo lwa gagwe lwa loapi fa fatshe; ke yo o bitsang metsi a lewatle, mme a a thele mo godimo ga lefatshe; Jehofa ke leina la gagwe.

7“Mo go nna a ga lo a nna jaaka bone Baethiopia, lona bana ba Iseraele?” Go bua Jehofa. “A ga ke a ntsha Baiseraele mo lefatsheng la Egepeto, le Bafilisitia mo Kafatore, le Basiria mo Kire?

8Bonang, matlho a Morena Modimo a mo bogosing jwa boleo, mme ke tlaa bo senya ke bo tlosa mo lefatsheng; fa e se go re, ga nketla ke senyetsa ruri ba ntlo ya ga Jakobe.” Go bua Jehofa.

9“Gonne bonang, ke tlaa laola, mme ke tlaa feferela ba ntlo ya Iseraele mo merafeng yotlhe, jaaka mabele a tle a feferwe, mo loselong, le fa go ntse jalo go bo go se ketla go wela fa fatshe le fa e le tlhaka e nnyennyane.

10Baleofi botlhe ba batho ba me ba tlaa swa ka tšhaka, e bong ba ba reng: ‘Bosula joo ga bo ketla bo re tshwara le fa e le go re kganela.’

11“Ke tlaa re mo motlheng oo ke emise motlaagana o o oleng wa ga Dafite, ke thibe diphatlha tsa one; ke tlaa tsosolosa marope a gagwe, ke o aga jaaka mo metlheng ya bogologolo;

12gore ba rue masalela a Etome, le merafe yotlhe e e bidiwang ka leina la me.” Go bua Jehofa yo o dirang selo se:

13“Bonang, metlha e etla,” go bua Morena, “e molemi o tlaa fitlhelanang le morobi ka yone, le mogatisi wa difine go fitlhelana le yo o jalang; le dithaba di tlaa rotha bojalwa jwa mofine jo bo botshe, le makhubu otlhe a tlaa tlhapologa.

14Mme ke tlaa ba ke busa botshwaro jwa batho ba me ba Iseraele, ba tlaa aga metse e e ropefetseng, ba nna mo go yone; ba tlaa tlhoma masimo a mafine, mme ba nwa bojalwa jwa mofine jwa one; le gone ba tlaa dira masimo, mme ba ja loungo lwa one.

15Ke tlaa ba tlhoma mo lefatsheng la bone, mme ga ba ketla ba tlhola ba khumolwa mo lefatsheng la ga bone, le ke le ba neileng.” Go bua Morena Modimo wa gago.

← Chapter 8 Jump to: