Esther 6

Tswana (BAEBELE e e Boitshepo) 1992

← Chapter 5 Jump to: Chapter 7 →

1Ya re bosigo joo kgosi ya lala e sa robala; ya laola gore ba lere lokwalo lo lo kwadilweng ditirafalo, mme tsa balwa fa pele ga kgosi.

2Ga fitlhelwa go kwadilwe go re, Moretekai o ne a bolela ka ga Bigethane le Tereše baopafadiwa ba kgosi ba le babedi, ba bone ba ba lebelang kgoro, fa ba kile ba batla go tsenya kgosi Ahasueruse mabogo.

3Kgosi ya re: “Ana Moretekai o diretswe tlotlo le bogolwane bofe ka ntlha ya sone seo?” Foo batlhanka ba kgosi ba ba e direlang ba re: “Ga a a direlwa sepe.”

4Kgosi ya re: “E mang yo o ka fa lwapeng?” Jaana Hamane o ne a tsile mo lwapeng lo lo kwa ntle, lwa ntlo ya kgosi, a tla go bua le kgosi ka ga go pega Moretekai mo sefateng sa polaelo se o se mmaakanyeditseng.

5Batlhanka ba kgosi ba mo raya ba re: “Bona, Hamane o eme ka fa lwapeng.” Kgosi ya re: “A a tsene.”

6Jalo Hamane a tsena. Kgosi ya mo raya ya re: “Ana monna yo kgosi e ratang go mo tlotla o ka direlwa eng?” Jaana Hamane a ithaya mo pelong ya gagwe a re: “Ana kgosi e ka bo e rata go tlotla mang bogolo go nna?”

7Hamane a raya kgosi a re: “Monna yo kgosi e ratang go mo tlotla,

8a a lerediwe diaparo tsa segosi tse kgosi e ntseng e di apara, le pitse e kgosi e ntseng e e palama, le serwalo sa segosi se se bewang mo tlhogong ya yone;

9a diaparo tseo le pitse eo di neelwe nngwe ya dikgosana tsa kgosi tse di tlotlegang bogolo, gore ba di apese monna yo kgosi e ratang go mo tlotla, ba mo ralatse mmila wa motse a palame pitse, ba ope mokgosi fa pele ga gagwe, ba re: ‘Go direlwa jaana monna yo kgosi e itumelang go mo tlotla.’ ”

10Foo kgosi ya raya Hamane ya re: “Itlhaganele tlhe, o tseye diaparo le pitse jaaka o buile, o direle jalo Moretekai wa Mojuta yo o dutseng fa kgorong ya kgosi, go se tlhaele sepe sa tsotlhe tse o di buileng.”

11Foo Hamane a tsaya diaparo le pitse, a apesa Moretekai, a mo ralatsa mmila wa motse a palame, a opa mokgosi fa pele ga gagwe, a re: “Go direlwa jalo monna yo kgosi e ratang go mo tlotla.”

12Moretekai a boela gape mo kgorong ya kgosi. Hamane a itlhaganelela kwa ntlong ya gagwe a hutsafetse, tlhogo ya gagwe e khurumeditswe.

13Hamane a kakanyetsa Sereše mosadi wa gagwe le ditsala tsa gagwe tsotlhe fela, sengwe le sengwe se se mo dirafaletseng. Foo matlhale a gagwe le Sereše mosadi wa gagwe ba mo raya ba re: “Fa Moretekai, yo o simolotseng go wa fa pele ga gagwe, e le wa losika lwa Bajuta, ga o ketla o mo fenya, mme ruri o tlaa wa fa pele ga gagwe.”

14Ya re ba sa ntse ba bua nae, baopafadiwi ba kgosi ba tla, ba itlhaganela go isa Hamane modirong o Esethere o ne a o baakantse.

← Chapter 5 Jump to: Chapter 7 →