James 2

Tswana (BAEBELE e e Boitshepo) 1992

← Chapter 1 Jump to: Chapter 3 →

1Bagaetsho, lo se ka lwa pataganya go dumela ga lona mo go Morena wa rona Jesu Keresete, Morena wa kgalalelo, le go tlhaola batho.

2Gonne e re fa go tsena mo ntlong ya lona ya thuto, monna mongwe a rwele lenyena la gouta, a le diaparo dintle; go ba go tsena mohumanegi yo o diaparo di maswe;

3fa lo tlhokomela yo o apereng diaparo tse dintle, lo mo raya lo re: “Wena, a ke o dule fano bonnong jo bontle,” mme lo reye motho wa mohumanegi lo re: “Wena o eme foo, kgotsa o dule fa tlase ga sebeo sa me sa dinao,”

4a megopolo ya lona ga e a kgaogana, a ga lo a tswa baatlhodi ba ba megopolo e e bosula?

5Reetsang, bagaetsho ba ba rategang: A Modimo a ga o a itlhaolela ba e leng bahumanegi ka ga lefatshe leno, gore ba nne bahumi mo tumelong, le barui ba bogosi jo o bo solofeditseng ba ba o ratang?

6Mme lona lo tlotlolotse motho wa mohumanegi. A bahumi a ga ba lo patike, ba lo gogela ka bosi kwa dinnong tsa tshekelo?

7A ga ba tlhapatse leina le le tlotlegang le lo bidiwang ka lone?

8Le fa go ntse jalo, fa lo dirafatsa molao o e leng wa segosi, ka fa lokwalong, go re: “O rate mongwe ka wena jaaka o ithata,” lo tlaa bo lo dira sentle.

9Mme fa lo tlhaola batho, lo a leofa, lo bile lo tshwerwe ke molao jaaka batlodi.

10Gonne le fa e le mang yo o bolokang molao otlhe, mme a kgotswa mo go o mongwe fela, o itirile molato mo go one otlhe fela.

11Gonne ene yo o rileng: “O se ka wa dira boaka,” o bile a re: “O se ka wa bolaya.” Jaana le fa o sa dire boaka, mme fa o bolaya, o bo o ntse o le motlodi wa molao fela.

12Lo bue lo bo lo dire, jaaka batho ba ba tlaa atlholwang ka molao wa kgololego.

13Gonne katlholo ga e na kutlwelobotlhoko mo go ene yo o se kang a itshupa kutlwelobotlhoko; kutlwelobotlhoko e belafalela katlholo.

14Go thusang, bagaetsho, fa motho a re o na le tumelo, mme a se na ditiro? A tumelo eo e ka mmoloka?

15Fa oo rra motho, kgotsa kgaitsadia motho a sa apara, a ba a tlhoka tse e leng dijo tsa letsatsi,

16mme mongwe wa lona a ba raya a re: “Tsamayang sentle, lo thuthafale, lo kgore,” le fa go ntse jalo lo sa ba neye dilo tse di tlhokwang ke mmele, ana go a bo go thusang?

17Go ntse fela jalo tumelo, fa e se na ditiro e be e sule ka e yosi.

18Ee, motho mongwe o a ba a tlaa re: “Wena o na le tumelo, nna ke na le ditiro.” Mpontsha tumelo ya gago kwa ntle ga ditiro tsa gago, mme nna ke tlaa go bontsha tumelo ya me ka ditiro tsa me.

19O a dumela fa Modimo o le mongwe fela; o dira sentle; mewa e e maswe le yone e a dumela, mme e tsitsibane fela e rorome.

20Motho ke wena wa boithamako, a o a itse fa tumelo e se na ditiro e a bo e se na loungo?

21Ana Aberahame rraetsho, a ga a a siamisiwa ka ditiro ka a isitse Isake morwawe tshupelo mo sebesong?

22O a bona fa tumelo e pataganye le ditiro tsa gagwe, mme tumelo ya dirwa boitekanelo ka ditiro.

23Mme lokwalo lwa dirafala lo lo reng: “Aberahame a dumela Modimo, a go balelwa e le tshiamo,” a bidiwa tsala ya Modimo.

24Lo a bona fa motho a siamisiwa ka ditiro, e seng ka tumelo e le yosi.

25Go ntse fela jalo le ene Rahabe wa seaka, a ga a a siamisiwa ka ditiro, ka a tshola barongwa, mme a ba ngwegisa ka tsela e sele?

26Gonne jaaka mmele fa o se na mowa, o sule; go ntse fela jalo, tumelo fa e tlhalanye le ditiro e sule.

← Chapter 1 Jump to: Chapter 3 →