Isaiah 17

Tsonga (BIBELE Mahungu Lamanene) 1989

← Chapter 16 Jump to: Chapter 18 →

1Lawa i mahungu hi tlhelo ra muti wa Damaska. HOSI Xikwembu xi ri: “Muti wa Damaska a wu nga ha vi kona, ku ta sala marhumbi ntsena.

2Miti ya tiko ra Siriya a yi nga ha tshami munhu ni siku ni rin'we, yi ta hundzuka madyelo ya swifuwo, swi ta vundza kona swi nga karhatiwi hi munhu.

3A ku nga ha vi na miti ya makhokholo etikweni ra Efrayimi, ni vuhosi byi ta hela emutini wa Damaska. Ku dzuneka ka masalela ya Vasiriya ku ta nyamalala kukota ku dzuneka ka Vaisraele. Mina HOSI ya matimba hinkwawo, ndzi vurisa sweswo.

4“Eminkarhini yoleyo, va ka Yakobo va ta ondza, va ta sala marhambu ntsena.

5Swi ta fana ni loko vanhu va tsema koroni, va hlengeleta min'woko ya kona, kumbe loko va ya eku khwajeni, emasin'wini ya le nkoveni wa Refayimi:

6Ku ta sala Vaisraele va nga ri vangani; swi ta fana ni loko va hetile ku tshovela mihandzu hinkwayo ya mitlhwari; ku sala mihandzunyana yi nga ri yingani emarhavini ya le henhla, ni marhavini lawa a ma tswale ngopfu. Mina HOSI, Xikwembu xa Israele, ndzi vurisa sweswo.”

7Enkarhini wolowo, vanhu va ta hundzuluka va languta Muvumbi wa vona, yena Muhlawuleki wa Israele;

8a va nga ha hundzulukeli eka tialitari leti va nga lo tiakela, naswona a va nga ha languti swilo leswi va swi endleke hi mavoko ya vona vinyi, swo fana ni timhandze ta Axera xikwembukazi, na tialitari ta mirhi ya risuna.

9Eminkarhini yoleyo, miti leyi biyeleriweke yi ta sala yi fana ni tindhawu ta le swihlahleni kumbe ta le nhlohlorhini ya ntshava, leti vanhu va tsutsumeke va ti siya hi ku chava Vaisraele; yi ta sala yi ri marhumbi ntsena.

10N'wina Vaisraele, mi rivarile Xikwembu lexi xi mi ponisaka, Ribye leri mi tumbelaka eka rona, a mi ri tsundzukanga; hikuva mi tsakela ku endla mintanga, mi simeka ni swirhabyana eka yona, mi simekela swikwembu swimbe.

11Kambe hambiloko leswi mi swi byalaka swi nga kula hi siku rin'we, swi baleka swiluva mpundzu wolowo, ntshovelo wa kona wu ta nyamalala, hi siku ra maxangu ni nhlomulo lowu nga heriki.

12Yingisani, ku twala huwa ya vanhu lavo tala, wonge yo va huwa ya mati ya lwandle! Twanani pongo ra vanhu va matiko, wonge ro va pongo ra magandlati!

13Vanhu va matiko va ba pongo ku fana ni maboboma, kambe Xikwembu xi ta va tshinya, va tsutsuma va ya kule swinene, kukota mungu lowu hahisiwaka hi moya etintshaveni, kumbe ritshuri loko ku ri na xidzedze.

14Va ta chavisa vanhu nimadyambu ntsena, nimixo va ta va va nyamalarile! Leswi hi swona swi nga ta humelela lava va hi hlaselaka, va ta herisa sweswo lava phanghaka swa hina.

← Chapter 16 Jump to: Chapter 18 →