Revelation 18

Tsonga (BIBELE Mahungu Lamanene) 1989

← Chapter 17 Jump to: Chapter 19 →

1Endzhaku ka sweswo ndzi vona ntsumi yin'wana yi xika hi le tilweni, yi ri ni matimba lamakulu, ni misava yi voningiwa hi ku vangama ka yona.

2Yi huwelela hi rito lera ntamu yi ku: “Ú wile, ú wile, Babilona lonkulu, ú hundzukile kaya ka mademona, ni bako ra mimoya ya thyaka ya tinxaka-xaka, ni xisaka xa tinyanyana ta tinxaka-xaka leti nga tengangiki, leti vengekaka.

3Vanhu va matiko hinkwawo va nwile vhinyo yo bava ya vuoswi bya yena; tihosi ta misava ti oswene na yena, ni va mabindzu va misava leyi va fumisiwile hi vuhunguki bya yena lebyo chavisa.”

4Kutani ndzi twa rito rin'wana leri humaka etilweni ri ku: “N'wina vanhu va mina, humani mi n'wi siya, leswaku mi ta kala mi nga ngheni eswidyohweni swa yena, mi ta kala mi nga weriwi hi maxangu ya yena,

5hikuva swidyoho swa yena swi tlhandlekelene ku ya fika ehenhla tilweni, kutani Xikwembu xi tsundzukile ku homboloka ka yena.

6N'wi endleni leswi a mi endleke swona, mi n'wi nyika kambirhi hakelo ya leswi a swi endleke; exinwelweni lexi a nga chela swakunwa eka xona, n'wi cheleleni kambirhi.

7N'wi kombeni maxangu ni mahlomulo, hi ku ya hi mpimo wa ku tidzunisa ka yena ni wa ku hunguka ka yena, hikuva embilwini ya yena ú vula a ku: ‘Ndzi tshama la, mina Nkosikazi! A ndzi wansati wa noni, a ndzi nga heli hi ku vona mahlomulo!’

8Hikwalaho ka swona, mintungu hinkwayo yi ta n'wi wela henhla hi siku rin'we, a kuma mavabyi yo chavisa, ni mahlomulo, ni ku sika, kutani ú ta hisiwa hi ndzilo, hikuva Hosi Xikwembu, muavanyisi wa yena, xi ni matimba lamakulu.”

9Tihosi ta misava leti ti nga oswana na yena ni ku hunguka na yena, ti ta rila ti ba nkosi hikwalaho ka yena, loko ti ta vona musi wa ku tshwa ka yena.

10Ti ta yimela kule hi ku chava maxangu ya yena, ti ku: “Yo! Yo! Wena muti lowukulu, wena Babilona muti wa matimba, ku avanyisiwa ku ku fikele hi nkarhinyana ntsena.”

11Va mabindzu va laha misaveni va rila ni ku ba nkosi hikwalaho ka yena, leswi nhundzu ya vona sweswi yi nga hava loyi a yi xavaka.

12Ku hava ni un'we loyi a xavaka nsuku wa vona, ni silivhere, ni maribye ya nkoka, ni vuhlalu bya nxavo lowukulu; tinguvu ta vona ta ntsembyani wa risima, leto vangama ta xivunguvungu, ni ta silika, ni leto tshwuka; tinxaka-xaka ta mintsandza leyo nun'hwela, ni swilo swa mihlovo-hlovo leswi nga vatliwa hi matino ya tindlopfu, ni mintsandza ya nkoka, ni swa koporo, ni swa nsimbhi, ni swa maribye layo rhetela;

13sinamoni, ni swin'wana swo nandzihisa swakudya; mirhi ya risuna ya magandzelo, ni mafurha ya “mirha”, ni mirhi yin'wana yo nun'hwela; vhinyo ni mafurha, mapa ni mavele, tihomu ni tinyimpfu, tihanci ni magolonyi, mahlonga, hambi yi ri mimoya ya vanhu.

14Va ta ku: “Swilo leswo saseka leswi a wu navela ku va na swona, swi nyamalarile, hinkwaro rifuwo ra wena ni ku vangama ka wena swi fambile, u nga ka u nga ha swi kumi kambe.”

15Va mabindzu va swilo leswi, lava nga fuma hi ku bindzurisa emutini wolowo, va ta yimela kule, hi ku chava maxangu ya yena. Va ta rila ni ku ba nkosi,

16va ku: “Yo! Yo! Khombo ra muti lowukulu, lowu a wu ambele tinguvu ta ntsembyani wa risima, to vangama ta xivunguvungu ni leto tshwuka; a wu tikhavisile hi nsuku, ni maribye ya nkoka, ni vuhlalu byo saseka.

17Kambe hi nkarhinyana ntsena rifuwo leri hinkwaro ri herisiwile!” Kutani hinkwavo vini va tingalava, ni vakhandziyi va tona, ni vatluti, ni hinkwavo lava bindzurisaka hi ku tirha elwandle, va yimela kule,

18va huwelela swinene loko va vona musi wa ku tshwa ka muti lowukulu, va ku: “Hi wihi muti lowu wu tshamaka wu fana ni muti wolowo hi vukulu xana?”

19Kutani va ticheletela ritshuri etinhlokweni, va ri karhi va rila va ba nkosi, va huwelela va ku: “Yo! Yo! Khombo ra muti lowukulu, lowu hinkwavo lava a va ri ni tingalava elwandle va nga fumisiwa hi rifuwo ra wona: Hi nkarhinyana ntsena, wu herisiwile.

20Tsaka hi mhaka ya wona, wena tilo; na n'wina vahlawuriwa va Xikwembu, ni vaapostola, ni vaprofeta, tsakani, hikuva Xikwembu xi wu avanyisile, xi mi rihisetela.”

21Kutani ntsumi ya matimba yi tlakula ribye leri fanaka ni ribye ra ku sila hi ku kula, yi ri hoxa elwandle, yi ku: “Hi swo leswi u nga ta endliwa swona, we Babilona, muti lowukulu: U ta wiseriwa ehansi hi nsele, kutani a wu nga ha vi kona nakambe.

22Mpfumawulo wa vachayi va tiharipa ni wa vayimbeleri, ni wa vachayi va switiringo ni va tinanga, a wu nga ha twali nakambe laha ka wena. Mutirhi wa swilo swihi ni swihi swa mavoko a nga ka a nga ha vi kona nakambe laha ka wena; ni mpfumawulo wa xigayo a wu nga ha twali nakambe laha ka wena.

23Ku voninga ka rivoni, a ku nga ha vonaki nakambe laha ka wena, ni marito ya muteki ni ya mutekiwa, a ma nga ha twali nakambe laha ka wena; hikuva va mabindzu va wena a va ri tinganakana ta laha misaveni, kutani vanhu va matiko hinkwawo va xisiwile hi vungoma bya wena.”

24Eka muti lowu, a ku kumiwa ngati ya vaprofeta, ni ya vahlawuriwa va Xikwembu, ni ya hinkwavo lava nga dlawa laha misaveni.

← Chapter 17 Jump to: Chapter 19 →