Revelation 22

Tsonga (BIBELE Mahungu Lamanene) 1989

← Chapter 21 Jump to:

1Kutani ntsumi yi ndzi komba nambu wa mati ya vutomi lowu vangamaka ku fana ni “kristala”, wu khuluka wu huma exiluvelweni xa Xikwembu ni xa Xinyimpfana.

2Exikarhi ka xivava xa muti ni le matlhelweni ya nambu hala ni hala, ku ni murhi wa vutomi lowu nyikaka mihlovo ya 12 ya mihandzu, wu tswala mihandzu ya kona n'hweti yin'wana ni yin'wana; kutani matluka ya murhi i yo tshungula vanhu va matiko hinkwawo.

3A ku nga ha vi na nchumu lexi nga eku rhukaniweni kona. Xiluvelo xa Xikwembu ni xa Xinyimpfana xi ta va endzeni ka muti, kutani malandza ya xona ma ta xi tirhela.

4Va ta vona nghohe ya xona, ni vito ra xona ri ta va emimombyeni ya vona.

5Vusiku a byi nga ha vi kona, a va nga ha lavi ku vonakala ka rivoni kumbe ka dyambu, hikuva Hosi Xikwembu xi ta va ku vonakala ka vona, kutani va ta fuma hilaha ku nga heriki.

6Kutani ntsumi yi ku ka mina: “Marito lawa ma tshembekile, ma ni ntiyiso. Hosi Xikwembu, xona xi nyikaka vaprofeta eMoya wa xona, xi rhumele ntsumi ya xona ku komba malandza ya xona swilo leswi swi fanelaka ku humelela ku nga ri khale.”

7Yesu ú ri: “Vonani, ndza ta sweswi-sweswi. Ku katekile loyi a hlayisaka marito ya vuhlavuteli bya buku leyi.”

8Hi mina Yohane hi xiviri xa mina ndzi nga twa ni ku vona swilo leswi. Kutani loko ndzi swi twile ni ku swi vona, ndzi wa hi matsolo, ku ta gandzela emilengeni ya ntsumi leyi yi ndzi kombeke swona.

9Kambe yi ku ka mina: “U nga tshuki u endla sweswo! Mina ndzi nandza ntsena, kukota wena ni vamakwenu, va nga vaprofeta ni hinkwavo lava hlayisaka marito ya buku leyi. Gandzela Xikwembu!”

10Yi engeta yi ku ka mina: “U nga lemeli marito ya vuhlavuteli bya buku leyi, hikuva nkarhi wu kusuhi.

11Loyi a endlaka leswo biha a a ye emahlweni a endla leswo biha, wa thyaka a a ye emahlweni na rona, loyi a lulameke, a a ye emahlweni a endla leswo lulama, ni loyi a hlawulekeke a a ye emahlweni a hlawuleka.”

12Yesu ú ri: “Vonani, ndza ta sweswi-sweswi, ndzi ta ni hakelo ya mina, ku ta hakela un'wana ni un'wana hi ku ya hi leswi a swi endleke.

13Hi mina Alfa na Omega, lowo rhanga ni lowo hetelela, ku sungula ni ku hela.”

14Ku katekile lava hlantswaka tinguvu ta vona, leswaku va ta pfumeleriwa ku dya murhi wa vutomi, ni ku nghena emutini hi tinyangwa ta wona.

15Lava salaka ehandle ka muti hi lava endlaka leswo biha, ni vangoma, ni vaoswi, ni vadlayi, ni lava gandzelaka swikwembu swa hava, ni un'wana ni un'wana la tsakelaka vunwa ni ku hanya ha byona.

16Yesu ú ri: “Ndzi rhumile ntsumi ya mina etikerekeni leswaku yi mi tivisa ntiyiso wa swilo leswi. Hi mina rimitsu ra Davhida, ni wa rixaka ra yena, nyeleti leyo vangama ya mixo.”

17Moya ni Mutekiwa va ri: “Tana! Ni loyi a swi twaka a a vule a ku: ‘Tana!’ Loyi a nga ni torha a a te; ni loyi a swi navelaka a a nwe mati ya vutomi a nga hakeli.”

18Ndzi tsundzuxa un'wana na un'wana loyi a twaka marito ya vuhlavuteli bya buku leyi, ndzi ri: Loko munhu a engetela swin'wana eka wona, Xikwembu xi ta engetelela eka yena mintungu leyi tsariweke ebukwini leyi.

19Ni loko un'wana a nga susa swin'wana eka marito ya vuhlavuteli bya buku leyi, Xikwembu xi ta n'wi sivela ku dya mihandzu ya murhi wa vutomi, ni ku tshama emutini lowo hlawuleka, swi nga swilo leswi hlamuseriweke ebukwini leyi.

20Yena loyi a tivisaka ntiyiso wa timhaka leti, ú ri: “Hakunene, ndza ta sweswi-sweswi.” Amen, tana Hosi Yesu!

21Tintswalo ta Hosi Yesu a ti ve ni hinkwavo!

← Chapter 21 Jump to: