2 Kings 11

Tsonga Xitsonga (Bibele) 1929

← Chapter 10 Jump to: Chapter 12 →

1Ataliya, mana wa Ahaziya, kuteloko a vonile leswaku n'wana wa yena a file, a pfuka, a dlaya vanhu hinkwavo va yindlu ya hosi.

2Kambe Yoxeba, n'wana wa wansati wa hosi Yehoramu, makwa Ahaziya, a teka Yowasi n'wana Ahaziya, a n'wi susa exikarhi ka vana va hosi loko va dlawa, kutani a n'wi fihla ni muan'wisi wa yena endlwini ya masangu. A fihliwa sweswo emahlweni ka Ataliya, a nga dlawanga.

3A tshama na yena endlwini ya Yehovha a ri karhi a fihliwa hi malembe ya ntlhanu na rin'we; Ataliya a a fuma etikweni ra Yuda.

4Hi lembe ra ntlhanu na mambirhi, Yehoyada a vitana tindhuna ta madzana ta Vakereti ni ta vatsutsumi; a va lerisa ku nghena na yena endlwini ya Yehovha; a endla xinakulobye na vona, a va hlambanyisa endlwini ya Yehovha, kutani a va kombisa hosi.

5A va lerisa a ku: “Mi ta endlisa sweswo: Ku avanyisa ka vunharhu ka n'wina, lava nghenaka entirhweni hi Savata, mi ta langutela yindlu ya hosi;

6ku avanyisa kun'wana ka vunharhu, ku ta yima enyangweni ya Suru, ku avanyisa kun'wana ka vunharhu ku ta yima enyangweni leyi nga endzhaku ka vatsutsumi; mi ta langutela yindlu leswaku ku nga ngheni munhu.

7Loko mi ri n'wina, yi ri mitlawa mimbirhi ya hinkwavo lava humaka entirhweni hi siku ra Savata, mi ta langutela yindlu ya Yehovha ekusuhi ni hosi.

8Kutani mi ta rhendzela hosi, un'wana ni un'wana a tamerile matlhari ya yena, kutani mani na mani la nga ta nghena etinxaxeni, u ta dlawa; mi ta va ni hosi loko yi ta huma ni loko yi ta nghena.”

9Tindhuna ta madzana ti endla hinkwaswo leswi Yehoyada, muprista, a va leriseke swona; ti teka un'wana ni un'wana vanhu va yena, va ri lava nghenaka siku ra Savata, ni lava humaka siku ra Savata, va ta eka Yehoyada, muprista.

10Muprista a nyika tindhuna ta madzana mafumu ni switlhangu leswi ngi swi ri swa hosi Davhida, leswi ngi swi ri endlwini ya Yehovha.

11Vatsutsumi lava tameleke matlhari ya vona, a va yima ku suka etlhelo ra xinene ra yindlu ku fika etlhelo ra ximatsi ra yindlu, ekusuhi ni alitari ni yindlu, va rhendzele hosi.

12Kavaloko va humesa n'wana wa hosi, va veka harhi ya vuhosi ehenhla ka yena, va n'wi nyika vumbhoni, va n'wi veka hosi, va n'wi chela hi mafurha, va phokotela mavoko va ku: “A ku hanye hosi!”

13Ataliya, kuteloko a twile mpfumawulo wa vatsutsumi, ni wa tiko, a ta eka tiko endlwini ya Yehovha.

14A languta, kutani waswivo hosi a yi yimile evuyimisweni hi mukhuva wa kona; tindhuna ni vayimbi va tinanga a va ri ekusuhi ni hosi, ni vanhu hinkwavo va tiko a va tsakile, a va yimba tinanga. Kavaloko Ataliya a handzula tinguvu ta yena, a huwelela, a ku: “Ku xenga!”

15Kutani Yehoyada, muprista, a lerisa tindhuna ta madzana leti fambisaka nyimpi, a ku eka vona: “N'wi humeseni etinxaxeni; la nga ta n'wi landza, mi n'wi dlaya hi tlhari,” hikuva muprista a a ku: “A nga tshuki a dlawa endlwini ya Yehovha.”

16Kutani va xaxamelana, va n'wi tshika a hundza, kutani a ya fika endlwini ya hosi hi ndlela ya Nyangwa ya Tihanci, va n'wi dlaya kona.

17Kutani Yehoyada a endla ntwanano na Yehovha, ni hosi ni tiko, leswaku ri va tiko ra Yehovha; a endlisa sweswo ni le xikarhi ka hosi ni tiko.

18Kutani vanhu hinkwavo va tiko va ta endlwini ya Baali, va yi mbundzuxa va fayetela tialitari ta yena ni swifaniso swa yena, va dlaya Matani, muprista wa Baali emahlweni ka tialitari, kutani muprista a vekela yindlu ya Yehovha valanguteri.

19A teka tindhuna ta madzana ni Vakereti, ni vatsutsumi ni vanhu hinkwavo va tiko, va ngirimerisa hosi hi le ndlwini ya Yehovha, va ya nghena endlwini ya hosi hi ndlela ya nyangwa ya vatsutsumi, kutani Yowasi a tshamisa exiluvelweni xa tihosi.

20Vanhu hinkwavo va tiko va tsaka ni muti wu rhula; kasi a va dlayile Ataliya hi tlhari endlwini ya hosi.

← Chapter 10 Jump to: Chapter 12 →