Ecclesiastes 11

Tsonga Xitsonga (Bibele) 1929

← Chapter 10 Jump to: Chapter 12 →

1Cukumeta vuswa bya wena ehenhla ka mati, hikuva endzhaku ka masiku layo tala u ta tlhela u byi kuma.

2Byi nyike ka vanhu va ntlhanu na vambirhi, kumbe ka va ntlhanu na vanharhu; hikuva a ku tivi khombo leri nga ta humelela emisaveni.

3Loko mapapa ma tele mpfula, ma yi halatela emisaveni; kutani hambi murhi wu wela etlhelo ra le dzongeni kumbe en'walungwini, laha wu welaka kona hilaha wu tshamaka kona.

4La xiyaka moya a nga ka a nga byali, ni la langutaka mapapa a nga ka a nga tshoveri.

5Kukotisa loko u nga tivi ndlela ya moya, hambi ku ri hilaha marhambu ma vumbiwaka hakona ekhwirini ra wansati la tikeke, a ku tivi mitirho ya Xikwembu lexi endlaka hinkwaswo.

6Byala mbewu ya wena ka ha ri mixo; mavoko ya wena u nga tshuki u ma nyiketa nkarhi nimadyambu hikuva a ku tivi leswaku ku ta mila yihi, kumbe leyi, kumbe liya, kumbe loko ti ta mila ha timbirhi.

7Hakunene ku vonakala ka nandziha, kutani mahlo ma rhandza ku vona dyambu.

8Hambi munhu a nga hanya malembe layo tala, u fanele ku tsaka ha wona, kambe, na swona, u fanele ku anakanya masiku ya munyama, hikuva ma ta va lamanyingi. Hinkwaswo leswi nga ta humelela i swahava.

9Jaha, tsakela vuntshwa bya wena, mbilu ya wena yi ku tsakisa hi masiku ya vuntshwa bya wena, u famba hi ku rhandza ka mbilu ya wena, ni ku languta ka mahlo ya wena;

10kambe tiva leswaku Xikwembu xi ta ku avanyisa eka sweswo hinkwaswo. Susa tingana embilwini ya wena, u yisa ku biha ekule ni nyama ya wena; hikuva vuntshwa ni vurhonga i swahava!

← Chapter 10 Jump to: Chapter 12 →