Ecclesiastes 6

Tsonga Xitsonga (Bibele) 1929

← Chapter 5 Jump to: Chapter 7 →

1Mhaka leyo biha yi kona leyi ndzi yi voneke ehansi ka dyambu yi andzile exikarhi ka vanhu:

2Hi leswaku loko Xikwembu xi nyikile munhu rifuwo, ni xuma, ni ku twala, ku fikela loko a nga ha pfumali nchumu eku hanyeni ka yena, hambi xi ri xilo xin'we xa hinkwaswo leswi a swi navelaka, Xikwembu a xi n'wi nyiki nkarhi wa ku dya swona, i un'wana la swi dyaka. Swoleswo i vuhava ni khombo leri vavisaka.

3Hambiloko munhu a nga veleka vana va dzana, a hanya malembe layo tala, ni loko masiku ya malembe ya yena ma andzisiwa, loko moya wa yena wu nga xurhi vunene, a va a pfumala ni sirha: ndzi ri, swi tsandza ni la velekiweke wu nga si va nkarhi, u n'wi tlula hi ku kateka.

4Hikuva u velekeriwe swahava, u famba emunyameni, kutani vito ra yena ri funengetiwa hi munyama;

5u ta va la nga vonangiki dyambu ni ku ri tiva a nga ri tivi. Yena u ni ku wisa ku tlula munhu yeloyi.

6Hambiloko a hanyile malembe ya khume ra madzana lama hlayiwaka kambirhi, kambe a nga voni ku kateka, andziri hinkwaswo a swi fambi endhawini yi ri yin'we xana?

7Ntirho hinkwawo wa munhu wu yisiwa enon'wini wa yena, hambiswiritano, ku navela ka yena a ku xurhi.

8Xana lowo tlhariha u tlula xihunguki ha yini? Kumbe xisiwana lexi tivaka ku tifambela emahlweni ka lava hanyaka, xi fuwa yini?

9Lexi voniwaka hi mahlo xi sasekile, ku ri ni lexi anakanyiwaka hi mbilu. Xolexo, na xona, i vuhava, ni ku landza mheho.

10Lexi nga kona xi thyiwile vito; loko a ri munhu, ku tiviwa lexi a nga xona ni leswaku a nga ka a nga tengisani na la n'wi tlulaka hi matimba.

11Langutani, ku ni swilo leswo tala leswi andzisaka swahava; loko swi ri tano, munhu a nga fuwa yini ha swona?

12Hikuva i mani la tivaka leswi nga saseka eka munhu evutomini bya yena, hi masiku ya ku hanya ka yena ka swahava lama hundzaka kukota ndzhuti? Kumbe i mani la byelaka munhu leswi nga ta va kona ehansi ka dyambu, loko a nga ha ri kona?

← Chapter 5 Jump to: Chapter 7 →