Genesis 23

Tsonga Xitsonga (Bibele) 1929

← Chapter 22 Jump to: Chapter 24 →

1Malembe ya Sara a ma ri 127; hi wona malembe ya ku hanya ka Sara.

2Kutani Sara a fa eKiriyata-Araba (a nga Hebroni), etikweni ra Kanana; kutani Abrahama a ta ba nkosi wa Sara, a n'wi rila.

3Kutani Abrahama a suka emahlweni ka mufi wa yena, a ya vulavula ni Vahiti, a ku:

4“Ndzi muluveri ni muendzi exikarhi ka n'wina; ndzi nyikeni exikarhi ka n'wina sirha ndzi ri fuwa, ndzi tiva ku susa mufi wa mina emahlweni ka mina, ndzi n'wi yimbela.”

5Vahiti va hlamula Abrahama va ku eka yena:

6“Hi yingisise, hosi: U ndhuna ya Xikwembu exikarhi ka hina; lahla mufi wa wena esirheni ra hina leri u nga ta ri hlawula. A ku na un'we wa ka hina la nga ta ku alela sirha ra yena, u yimbela kona mufi wa wena.”

7Abrahama a suka a yima, a khinsama emahlweni ka vanhu va tiko, emahlweni ka Vahiti,

8a ku eka vona: “Loko timbilu ta n'wina ti ndzi pfumelela leswaku ndzi susa mufi emahlweni ka mina ndzi n'wi yimbela, ndzi yingiseni mi ndzi khongelela eka Efroni, n'wana Sohara,

9a ndzi nyika bako ra Makapela, leri nga ra yena, leri nge makumu ka nsimu ya yena, a ndzi nyika rona emahlweni ka n'wina ematshan'weni ya mali ya rona, ri va sirha ra mina exikarhi ka n'wina.”

10Kasi Efroni a a tshamile exikarhi ka Vahiti. Kavaloko Efroni, wa Muhiti, a hlamula Abrahama, Vahiti va ri karhi va swi twa, ni hinkwavo lava nga karhi va nghenaka hi nyangwa ya muti wa yena, a ku eka yena:

11“A swi nga vi tano, hosi yanga; ndzi yingise: Nsimu, ndzi ku nyika ntsena, na rona bako leri nga eka yona, ndzi ku nyika rona; ndzi ku nyika rona emahlweni ka vana va tiko ranga; yimbela ntsena mufi wa wena.”

12Abrahama a khinsama emahlweni ka vanhu va tiko,

13a vulavula na Efroni, vanhu va tiko va ri karhi va yingisa, a ku: “I ngi loko u ndzi yingisisa! Ndzi humesa mali ya nsimu, yi amukele emandleni ya mina, ndzi ta lahlela kona mufi wa mina.”

14Kutani Efroni a hlamula Abrahama, a ku eka yena:

15“Hosi yanga, yingisa: Nsimu ya mune wa madzana ya tixikele ta silivhere exikarhi ka mina na wena, i nxini-ke? Yimbela mufi wa wena.”

16Abrahama a twisisa Efroni, a pimela Efroni hi xikalo mali leyi a nga yi vula, Vahiti va ri karhi va swi twa, a nga tixikele ta silivhere ya mune wa madzana lama amukeriwaka exikarhi ka vaxavi.

17Sweswo nsimu ya Efroni, leyi nga eMakapela, ni ku vandzakana na Mamre, nsimu ni bako leri nga eka yona, ni mirhi hinkwayo leyi nga ensin'wini, ni le mindzilekaneni ya yona,

18swi tshamile swi ri swa Abrahama, emahlweni ka Vahiti, emahlweni ka hinkwavo lava nga karhi va nghenaka hi nyangwa ya muti wa yena.

19Endzhaku ka swona, Abrahama a yimbela Sara nsati wa yena ebakweni ra nsimu ya Makapela, hi ku vandzakana na Mamre (a nga Hebroni), etikweni ra Kanana.

20Nsimu ni bako leri nga eka yona swi tshame swi fuyiwa hi Abrahama, ri va sirha leri xaviweke eka Vahiti.

← Chapter 22 Jump to: Chapter 24 →