Leviticus 21

Tsonga Xitsonga (Bibele) 1929

← Chapter 20 Jump to: Chapter 22 →

1Yehovha a ku eka Muxe: “Byela vaprista, vana va Aroni, u ku eka vona: ‘Muprista a nga tshuki a tiyirisa hi mufi etikweni ra yena,

2loko a nga ri mufi wa xaka ra yena, ra ngati ya yena, hambi mana wa yena, hambi tata wa yena, hambi n'wana wa wanuna, hambi n'wana wa wanhwanyana, hambi makwavo wa wanuna,

3hambi makwavo la nga tekiwangiki, la nga ekusuhi na yena, la nga riki na nuna; u ta tinyamisa hikwalaho ka yena.

4Leswi a nga ni vuhosi etikweni ra yena, a nga tshuki a tinyamisa a nyamisa ni vuhosi bya yena.

5Vaprista va nga tshuki va byewula misisi, va nga tshuki va titsemela ematlhelo ya malebvu, va nga titlhaveli emirini ya vona.

6Va ta tihlawulela Xikwembu xa vona, hikuva va tshama va humesela Yehovha magandzelo lama hisiwaka, swi ri swakudya swa Xikwembu xa vona: va ta va lava hlawuriweke.

7“ ‘Va nga tshuki va teka nsati wa mbhisa, kumbe la nga ni xisandzu; va nga tshuki va teka wansati la tshikiweke hi nuna wa yena, hikuva muprista u hlawuleriwe Xikwembu xa yena.

8U ta n'wi vula la hlawuriweke, hikuva hi yena la humesaka swakudya swa Xikwembu xa wena, hikuva ndzi hlawulekile, mina Yehovha la mi hlawulaka.

9Kungakuloko n'wana wa wanhwana wa muprista a tikhomisa tingana hi ku tinyiketa vuoswi, a khomise tata wa yena tingana; u ta hisiwa endzilweni.

10“ ‘Loko a ri muprista lonkulu exikarhi ka vamakwavo, la hlawuriweke hi ku cheriwa enhlokweni mafurha ya ku tola, la ambexiweke tinguvu leti hlawuriweke, a nga ka a nga fununguli nhloko ya yena hambi ku ri ku handzula tinguvu ta yena.

11A nga ka a nga tshineleli mufi ni un'we, a nga tshuki a tinyamisela tata wa yena, hambi mana wa yena.

12A nga tshuki a huma evukwetsimelweni, a nga tshuki a endla vukwetsimelo bya Xikwembu xa yena xilo xa hava; hikuva mafurha ya ku tola ya Xikwembu xa yena, ma le henhla ka yena: hi mina Yehovha.

13“ ‘Loko a teka nsati, u ta teka wanhwana.

14A nga ka a nga teki noni, hambi a ri wa mbiri, hambi a ri la khomisiweke tingana, kumbe nsati wa muoswi: kambe u ta teka wanhwana exikarhi ka tiko ra yena.

15A nga tshuki a khomisa xivongo xa yena tingana etikweni ra yena; hikuva hi mina Yehovha la n'wi hlawulaka.’ ”

16Yehovha a byela Muxe, a ku:

17“Byela Aroni, u ku eka yena: ‘Munhu un'wana ni un'wana wa rixaka ra wena ni wa vatukulu va wena, la nga ni vulema, a nga tshuki a tshinelela ku humesa swakudya swa Xikwembu xa yena;

18hikuva ku nga tshuki ku tshinela munhu la nga ni vulema emirini wa yena. Munhu un'wana ni un'wana la feke mahlo, kumbe la khwitaka hambiloko a ri ni xivati, hambi xin'wana lexo mila emirini,

19kumbe munhu la tshovekeke nenge, kumbe voko,

20kumbe la nga ni lundza, kumbe xigono, kumbe la nga ni tihlo ra ndzololo, hambi la nga ni ntshansi ra nhloko, kumbe ntshansi rin'wana, kumbe la tsheniweke.

21Munhu un'wana ni un'wana wa rixaka ra Aroni, muprista, la nga ni vulema, a nga tshuki a tshinela ku humesa magandzelo lama hiseriwaka Yehovha, u ni vulema, a nga ka a nga tshineleli ku humesa swakudya swa Xikwembu xa yena.

22U ta dya kunene vuswa bya Xikwembu xa yena, ni ku averiwa ka yena ka swilo leswi hlawuriweke ngopfu, ni leswi kwetsimisiweke;

23kambe a nga ka a nga yi ekusuhi ni xisirhelelo ni ku tshinelela alitari, hikuva u ni vulema. A nga tshuki a endla vukwetsimelo bya mina swahava, hikuva hi mina Yehovha la n'wi kwetsimisaka.’ ”

24Kutani Muxe a byerisa sweswo Aroni ni vana va yena, ni vana hinkwavo va Israele.

← Chapter 20 Jump to: Chapter 22 →