Leviticus 27

Tsonga Xitsonga (Bibele) 1929

← Chapter 26 Jump to:

1Yehovha a byela Muxe, a ku:

2“Byela vana va Israele u ku eka vona: ‘Kutakuloko munhu a tibohile hi ku hlambanya leswaku a ta humesela Yehovha mali yo ringanisa nxavo wa munhu:

3Loko a ri wanuna wa malembe ya makume mambirhi, ku yisa eka ntlhanu wa makume na khume rin'we, ku ringanisa ku ta va ka tixikele ta silivhere ta ntlhanu wa makume hi mpimo wa xikele ya vukwetsimelo;

4loko a ri wansati, ku ringanisa ku ta va ka tixikele ta makume manharhu.

5Loko va ri va malembe ya ntlhanu ku fika eka malembe ya makume mambirhi, ku ringanisa ku ta va ka tixikele ta makume mambirhi loko a ri wandzisanyana; loko a ri wanhwanyana, ti ta va tixikele ta khume.

6Loko va ri va n'hweti yin'we ku yisa eka malembe ya ntlhanu, ku ringanisa ku ta va ka tixikele ta ntlhanu ta silivhere loko a ri wandzisanyana, ni tixikele tinharhu, loko a ri wanhwanyana.

7Loko va ri lava tlulaka malembe ya ntlhanu wa makume na khume rin'we, ku ringanisa ku ta va ka tixikele ta khume na ntlhanu loko a ri wanuna, eka tixikele ta khume loko a ri wansati.

8Kungakuloko munhu a tsandzeka ku humesa mali hi mpimo wa kona, u ta yisiwa eka muprista, kutani muprista la nga vula mpimo wa yena, u ta ringanisa loyi a tiboheke hi ku hlambanya hi ku xaxameta leswi a swi fuweke.

9“ ‘Loko swi ri swifuwo leswi nga humeseriwaka Yehovha, hinkwaswo leswi humeseriweke Yehovha swi hlawulekile.

10Va nga ka va nga swi hundzuluxi, ni ku humesa leswo biha ematshan'weni ya leswo saseka, hambi swi ri leswo saseka ematshan'weni ya leswo biha; kambe loko va humese xifuwo xin'wana ematshan'weni ya xin'wana, swi ta va leswi hlawuriweke ha swimbirhi.

11Loko xi ri xifuwo lexi nga tengangiki, lexi va nga swi kotiki ku xi humesela Yehovha, va ta yisa xifuwo eka muprista,

12kutani muprista u ta xi ringanisa hi ku saseka ka xona, kumbe hi ku biha ka xona, kutani va ta endla hi ku ringanisa ka muprista.

13Kambe loko va rhandza ku xi kutsula, va ta engetela mali ya xona hi ku avanyisa ka vuntlhanu bya nxavo.

14“ ‘Kutakuloko munhu a hlawulele Yehovha yindlu ya yena, muprista u ta yi ringanisa hi ku saseka ka yona, kumbe hi ku biha ka yona kutani ku ta endliwa hi ku ringanisa ka muprista.

15Kambe munhu la hlawuleleke Yehovha yindlu ya yena loko a rhandza ku yi kutsula, u ta yi engetela hi ku avanyisa ka vuntlhanu bya mali ya yona, kutani yi ta va ya yena.

16“ ‘Kungakuloko munhu a hlawulele Yehovha ndzima ya nsimu ya yena, ku ringanisa ka wena ku ta endliwa hi mpimo wa leswi byariwaka kona, ti ri tixikele ta ntlhanu wa makume ta silivhere, ematshan'weni ya homere ya mbewu.

17Loko a hlawulela Yehovha nsimu ya yena ku suka eka lembe ra Jubili, ku ta endliwa hi ku ringanisa kuloku.

18Kambe loko a hlawulela Yehovha nsimu ya yena endzhaku ka Jubili, muprista u ta ringanisa mali hi nhlayo ya malembe lama seleke ku ya fika Jubili, kutani ku ta hungutiwa mali leyi ringanaka.

19Kungakuloko loyi a hlawuleleke Yehovha nsimu ya yena, a rhandza ku yi kutsula, u ta engetela hi ku avanyisa ka vuntlhanu bya mali leyi ringanisiweke hi muprista, kutani nsimu yi ta va ya yena.

20Loko a nga kutsuli nsimu, kambe a yi xavisa eka munhu un'wana, yi nga ka yi nga ha kutsuriwi.

21Ni loko muxavi wa nsimu a ta huma eka yona hi lembe ra Jubili, yi ta hlawuleriwa Yehovha kukotisa nsimu leyi nyikiweke hi ku hlambanya; yi ta va ya muprista.

22“ ‘Kutakuloko munhu a hlawulela Yehovha nsimu leyi a yi xaveke, leyi nga riki ya ndzhaka ya yena,

23muprista u ta ringanisa mali ya yona hi ku hlaya ku fika eka lembe ra Jubili, kutani munhu loyi u ta humesa mali ya yona hi siku rolero, hikuva nsimu yi hlawuleriwe Yehovha.

24Hi lembe ra Jubili, nsimu yi ta tlhelela eka muxavisi wa yona, hikuva yi huma endzhakeni ya yena.

25“ ‘Ku ringanisa hinkwako ka wena ku ta endliwa hi xikele ya vukwetsimelo, xikele yi ni tigera ta makume mambirhi.

26“ ‘Kambe munhu a nga ka a nga hlawuli mativula ya swifuwo swa yena, hikuva i ya Yehovha hi leswi ma nga mativula, hambi ma ri ya swifuwo leswikulu hambi ya leswitsongo, i ya Yehovha.

27Loko xi ri xifuwo lexi nga tengangiki, xi ta kutsuriwa hi mali ya ku ringanisa, va engetela hi ku avanyisa ka vuntlhanu bya yona, kambe loko xi nga kutsuriwi, xi ta xavisiwa hi laha u xi ringaniseke hakona.

28“ ‘Ntsena hinkwaswo leswi nyikiweke Yehovha hi munhu hi ku hlambanya, i anathema; hambi a ri munhu, hambi xi ri xifuwo, hambi nsimu ya ndzhaka, swi nga ka swi nga xavisiwi, kambe swi nga ka swi nga kutsuriwi: hinkwaswo leswi swa anathema swi hlawulekile swinene, i swa Yehovha.

29Munhu la endliweke anathema, leswaku a va anathema, a nga kutsuriwi, u ta dlawa kunene.

30“ ‘Ku avanyisa ka vukhume hinkwabyo bya leswi tshoveriwaka, lebyi pamburiweke etimbewini, ni le mihandzwini ya mirhi, i swa Yehovha, swi hlawuleriwe Yehovha.

31Loko munhu a rhandza ku kutsula swa vukhume bya yena, u ta swi engetela hi ku avanyisa ka vuntlhanu bya swona.

32Loko swi ri swa vukhume swa swifuwo leswikulu ni leswitsongo swa hinkwaswo leswi risiwaka, xifuwo xin'wana ni xin'wana xa vukhume xi ta hlawuleriwa Yehovha.

33Va nga ka va nga hlawuli lexo saseka, kumbe lexo biha; va nga ka va nga humesi xin'wana ematshan'weni ya xin'wana, kambe loko va endlisa sweswo, xifuwo lexi hlawuriweke, ni lexi humesiweke ematshan'weni ya xona, swi ta va leswi hlawuriweke ha swimbirhi: swi nga ka swi nga kutsuriwi.’ ”

34Hi yona milawu leyi Yehovha a yi nyikeke Muxe entshaveni ya Sinayi, leswaku yi va milawu ya vana va Israele.

← Chapter 26 Jump to: