Luke 13

Tsonga Xitsonga (Bibele) 1929

← Chapter 12 Jump to: Chapter 14 →

1Enkarhini wolowo, van'wana a va ri kona la va n'wi byeleke timhaka ta Vagaleliya volavo Pilato a nga pfanganyisa ngati ya vona ni magandzelo ya vona.

2Kutani Yesu a hlamula a ku eka vona: “Xana mi ehleketa leswaku Vagaleliya volavo a va ri vadyohi ku tlurisa Vagaleliya hinkwavo leswi va nga humeleriwa hi khombo lero tano xana?

3E-e, kambe ndzi ri eka n'wina: Loko mi nga hundzuki, mi ta lovisa sweswo hinkwenu.

4Hambi va ri vanhu va khume na ntlhanu na vanharhu, volavo xihondzo xa Silowama xi va weleke ehenhla, xi va dlaya; xana mi ehleketa leswaku a va ri ni nandzu ku tlurisa vaaki hinkwavo va Yerusalema, xana?

5Ndzi ri eka n'wina: E-e, kambe loko mi nga hundzuki, mi ta lovisa sweswo hinkwenu.”

6A engeta a va byela xifaniso lexi, a ku: “Un'wana a a ri ni murhi wa nkuwa lowu simekiweke ensin'wini ya yena ya vhinya, kutani a ya lava mihandzu eka wona, kambe a nga yi kumanga.

7Kavaloko a ku eka murimi: ‘Vona, ndzi tile hi malembe manharhu ku ta lava mihandzu enkuweni lowu, kutani a ndzi kumanga nchumu; wu tseme, wu sivela yini misava ntsena xana?’

8Kutani murimi a hlamula a ku eka yena: ‘Hosi, wa nga wu tshika ni nan'waka; ndzi ta wu rimela, ndzi wu chela vulongo,

9kumbexana wu ta veka mihandzu; loko swi nga ri tano, u ta wu tsema.’ ”

10Yesu a a dyondzisa esinagogeni yin'wana hi siku ra Savata.

11Kutani vonani, wansati a a ri kona la ngheniweke hi moya lowu nga n'wi vavisa hi malembe ya khume na ntlhanu na manharhu, a khwanyane a tsandzeka ni ku ololoka.

12Kuteloko Yesu a n'wi vona, a n'wi vitanela eka yena, a ku: “Wansati, u tshunxiwile evuvabyini bya wena.”

13Kutani a n'wi tlhandleka mavoko ehenhla, hi nomu lowu, wansati a ololoka, a dzunisa Xikwembu.

14Kambe hosi ya sinagoga yi hlunama, hikuva Yesu a a hanyisile munhu hi Savata, kutani yi byela vanhu, yi ku: “Ku ni masiku ya ntlhanu na rin'we, lawa ku fanelaka ku tirhiwa ha wona, tanani ha wona ku ta horisiwa, ku nga ri hi siku ra Savata.”

15Kambe Hosi yi n'wi hlamula, yi ku: “N'wamanyunyu, xana un'wana ni un'wana wa n'wina a nge tshunxi homu ya yena, kumbe mbhongolo ya yena exidyelweni hi Savata, a yi yisa eku nweni xana?

16Kutani wansati loyi, la nga n'wana Abrahama, la bohiweke hi Satana hi malembe ya khume na ntlhanu na manharhu, a nga fanelanga ha yini ku tshunxiwa hi siku ra Savata xana?”

17Loko a vula timhaka teto, vakaneti va yena va khomiwa hi tingana, kutani mitshungu yi tsakela mitirho hinkwayo leyo saseka leyi endliweke hi yena.

18Kutani a ku: “Ku fuma ka Xikwembu ku fana na yini; ndzi ta ku fanisa ha yini?

19Ku fana ni ndzhoho ya sinapi, leyi munhu a yi tekeke ku yi byala ensin'wini ya yena kutani yi mila, wu va murhi lowukulu kutani tinyanyana ta le tilweni ti ta ta aka emarhavini ya wona.”

20A engeta a ku: “Ku fuma ka Xikwembu, ndzi ta ku fanisa ha yini?

21Ku fana ni comela lexi wansati a xi tekeke, a xi nghenisa emapeni ya mipimo minharhu, swi ko swi kukumuka hinkwaswo.”

22Kavaloko a famba emitini ni le mitaneni, a ri karhi a dyondzisa, a khome ndlela ku ya eYerusalema.

23Kutani un'wana a ku eka yena: “Hosi, xana lava nga ta hlayiseka, va ta va vangani-ke?”

24A ku eka vona: “Endlani hi matimba ku nghena hi nyangwa leyo khuma, hikuva ndzi ri eka n'wina: Lavo tala va ta rhandza ku nghena, kambe va ta tsandzeka.

25Kutakuloko n'wini wa yindlu a nghenile, a pfarile nyangwa, n'wina mi ri handle, mi ta sungula ku gongondza, mi ku: ‘Hosi, hosi, hi pfulele!’

26U ta mi hlamula, a ku: ‘A ndzi mi tivi laha mi humaka kona.’ Hilaha mi nga ta vula, mi ku: ‘Hi tshama hi dya, hi nwa, hi ri na wena; u dyondzisile emitsendzeleni ya miti ya hina.’

27Yena u ta ku: ‘Ndza mi byela, ndzi ri: A ndzi mi tivi lomu mi pfaka kona sukani eka mina n'wina lava endlaka swo biha.’

28Hilaha ku nga ta va ni mikosi ni ku getsela ka meno, loko mi vona Abrahama, na Isaka, na Yakobo, ni vaprofeta hinkwavo eku fumeni ka Xikwembu kasi n'wina mi cukumetiwa handle.

29Va ta huma evuxeni, ni le vupeladyambu, ni le dzongeni, ni le n'walungwini, va ta tshama eswakudyeni eku fumeni ka Xikwembu.

30Kambe van'wana lava nga endzhaku, va ta va ve mahlweni; ni van'wana valavo rhanga, va ta va ve ndzhaku.”

31Enkarhini wolowo ku ta Vafarisi van'wana eka Yesu va ku: “Tisukele la, u famba, hikuva Heroda u rhandza ku ku dlaya.”

32Kutani a ku eka vona: “Fambani mi ya byela nhlati yeloyi, mi ku: ‘Vona, ndzi hlongola mademona, ndza ha horisa vanhu namuntlha ni mundzuku, kutani hi ra vunharhu ndzi ta heta.

33Kambe ndzi fanele ku famba namuntlha, ni mundzuku, ni mundlwana, hikuva a swi endleki leswaku muprofeta a dlawa, loko ku nga ri eYerusalema.’

34“Yerusalema, Yerusalema, la dlayaka vaprofeta, la khandlaka hi maribye lava rhumiweke eka wena; ndzi rhandzile kangani-ke ku hlengeleta vana va wena, kukotisa huku loko yi hlengeleta swiciwana swa yona ehansi ka timpapa ta yona? Kambe a mi swi rhandzanga.

35Vonani, sweswi, yindlu ya n'wina yi ta mi salela; kambe ndza mi byela, ndzi ri: Mi nga ka mi nga ha ndzi voni, ku ko ku fika siku leri mi nga ta ku: ‘A ku vongiwe la taka hi vito ra Hosi.’ ”

← Chapter 12 Jump to: Chapter 14 →