Luke 15

Tsonga Xitsonga (Bibele) 1929

← Chapter 14 Jump to: Chapter 16 →

1Kutani valuvisi ni vadyohi va tshinelela eka yena ku n'wi yingisa.

2Kambe Vafarisi ni vatsari va hleva ha swona, va ku: “Loyi, u amukela vadyohi, u dya na vona.”

3Kutani a va byela xifaniso lexi, a ku:

4“Hi wihi munhu exikarhi ka n'wina, loko a ri ni tinyimpfu ta dzana, loko ku lahleka yin'we ntsena, a nga ka a nga siyi leta ntlhanu wa makume, na mune wa makume, na ntlhanu na mune emananga, a ya lava leyi lahlekeke, u ko a yi kuma?

5Kuteloko a yi kumile, a yi teka, a yi rhwala emakatleni, a tsakile.

6Kuteloko a fika ekaya, a vita varikwavo, ni lava akeke na yena, a ku eka vona: ‘A hi tsakeni swin'we hikuva ndzi kumile nyimpfu ya mina leyi ngi yi lahlekile.’

7Ndzi ri eka n'wina: Ku tsaka ku ta va kona ematilweni hikwalaho ka mudyohi a ri un'we la hundzukaka, ku tlurisa ku tsaka loku nga ta va kona, hikwalaho ka lava lulameke va ntlhanu wa makume, na mune wa makume, na ntlhanu na mune, lava nga faneriki hi ku hundzuka.

8“Kumbe wansati hi wihi la nga na khume ra macheleni, kungakuloko a lahlekeriwe hi yin'we ntsena, a nga ka a nga lumeki rivoni, a kukula yindlu, a langutisa a ko a yi kuma.

9Kuteloko a yi kumile, a vita varikwavo, ni lava akeke na yena, a ku eka vona: ‘A hi tsakeni swin'we, hikuva ndzi kumile cheleni ya mina, yi ngi yi lahlekile.’

10Ndzi ri eka n'wina: Hi mukhuva wolowo, ku tsaka ku kona emahlweni ka tintsumi ta Xikwembu, hikwalaho ka mudyohi a ri un'we la hundzukaka.”

11A engeta a ku: “Munhu un'wana a a ri ni vana va va vanuna vambirhi; lowa ndzisana a ku eka tata wa yena:

12‘Tatana, ndzi avele xuma lexi nga ta va xa mina.’ Kutani tata wa vona a va avanyisela xuma xa yena.

13Kuteloko ku hundzile masiku ma nga ri mangani, n'wana wa yena lowa ndzisana loko a hlengeletile hinkwaswo, a rhurhela etikweni leri nga ekule a hangalasa xuma xa yena hi vusopfa.

14Loko a dyile hinkwaswo, ku wa ndlala leyikulu etikweni rero, kutani a sungula ku pfumala.

15Kutani a ya a ya namarhela munhu wa tiko rero; yeloyi a n'wi rhuma enhoveni ku risa tinguluve.

16Kutani a navela ku xurha hi makamba lama dyiwaka hi tinguluve, kambe a ku nga ri na munhu la n'wi nyikaka.

17Ku va laha a tiehleketaka, a ku: ‘Malandza layo tala swonghasi ma kona eka tatana, ma ni vuswa lebyo tala; kasi mina halenu, ndza fa hi ndlala.

18Ndzi ta pfuka, ndzi ya eka tatana, ndzi ta ku eka yena: “Tatana, ndzi dyohele tilo na wena,

19a swi ndzi faneri ku tshama ndzi vuriwa n'wana wa wena; u ndzi endla kukota un'wana wa malandza ya wena.” ’

20Kwalaho a pfuka, a ya eka tata wa yena. Kakuloko a ha ri ekule, tata wa yena a n'wi vona, a n'wi twela vusiwana; kutani a tsutsuma, a wela enhan'wini ya yena, a n'wi ntswontswa.

21Kutani n'wana a ku eka yena: ‘Tatana, ndzi dyohele tilo na wena, a ndzi fanelanga ku tshama ndzi vuriwa n'wana wa wena.’

22Kambe tata wa yena a ku eka malandza ya yena: ‘Tisani nguvu leyo saseka ngopfu, mi n'wi ambexa yona, mi n'wi nghenisa xingwavila eritihweni, ni tintanghu emilengeni.

23Tisani rhole leri noneke, mi ri tlhava, hi dya, hi tsaka;

24hikuva n'wana loyi wa mina a a file, kutani u hanyile; a a lahlekile kambe u kumiwile.’ Kutani va sungula ku tsaka.

25“Kambe n'wana wa yena lonkulu a a ri emasin'wini; kuteloko a fikile ekusuhi ni yindlu, a twa ku yimbelela ni ku cina.

26A vita un'wana wa malandza, a n'wi vutisa, a ku: ‘Swi lo yini?’

27Yeloyi a ku eka yena: ‘Ndzisana ya wena yi vuyile, kutani tata wa wena u tlhavile rhole leri noneke hikuva u n'wi vonile a ha hanya.’

28Kambe a kariha, a ala ku nghena. Tata wa yena a huma a n'wi khongotela leswaku a nghena.

29Yena a hlamula a ku eka tata wa yena: ‘Vona, ndzi ku tirhele hi malembe layo tala, ndzi nga tluri ku lerisa ka wena, kambe a ku si ndzi nyika ni ximbutana leswaku ndzi tsaka ni vanakulorhi.

30Kambe n'wana wa wena loyi, la dyeke xuma xa wena hinkwaxo a ri ni tinghwavava, kutani loko a vuya, u n'wi tlhavela rhole leri noneke!’

31Kambe tata wa yena a ku eka yena: ‘N'wananga, u tshama na mina hi masiku; hinkwaswo leswi nga swa mina, i swa wena;

32kambe a hi fanele ku tsaka ni ku tlangela, hikuva makwenu loyi a a file, kambe u hanyile; a a lahlekile, kambe u kumiwile.’ ”

← Chapter 14 Jump to: Chapter 16 →