Psalms 18

Tsonga Xitsonga (Bibele) 1929

← Chapter 17 Jump to: Chapter 19 →

1Ndzi ta ku rhandza ngopfu, wena Yehovha, matimba ya mina!

2Oho Yehovha! Ribye ra mina, ni khokholo ra mina, ni mulweri wa mina! Oho Xikwembu xanga! Ribye ra mina leri ndzi chavelaka eka rona! Xitlhangu xa mina, ni matimba lama ndzi ponisaka, ni xichavelo xa mina!

3Ndzi huwelela, ndzi ku: “Yehovha a a vongiwe!” Kutani ndzi lweriwa eka valala va mina.

4Tinsinga ta rifu a ti ndzi rhendzele, Ni maboboma lama onhaka a ma ndzi tshukisile;

5Tinsinga ta sirha a ti ndzi rhendzele; A ndzi khomiwile emarindzini ya rifu.

6Emapfalweni ya mina, ndzi vitanile eka Yehovha; Ndzi huwelele eka Xikwembu xanga; U yingisile rito ra mina, a ri endlwini ya yena; Kambe ku huwelela ka mina ku fikile emahlweni ka yena etindleveni ta yena.

7Misava yi va yi tsekatseka, yi rhurhumela, Masungulo ya tintshava ma susumetiwa, Ma tsekatseka, hikuva a a karihile.

8Ku tlhandluka musi etinhompfini ta yena, Ni ndzilo lowu lovisaka enon'wini wa yena; Ku huma ka wona makala lama vavamelaka.

9A xikisa matilo, kutani a rhelela; Munyama a wu ri hansi ka mikondzo ya yena.

10U khandziyile kerubu, kutani a haha, A tsemakanya exibakabakeni, a ri etimpapeni ta moya.

11A tifunengeta hi munyama, wu kotisa ntsonga, A tirhendzele hi mati ya ntima ni mapapa ya munyama.

12Eku vonakaleni loku n'wi rhangelaka emahlweni, Ku huma mapapa ya xihangu, ni makala lama vavamelaka.

13Yehovha u pfuma ematilweni Loya nge henhla a twakarisa rito ra yena, Ku va ni xihangu ni makala lama vavamelaka.

14A copa miseve ya yena, a hangalasa valala va mina, A vangamisa tihati leti nga hlayiwiki, a va hambanyisa.

15Vuento bya lwandle byi humelela, Masungulo ya misava ma hluvuleka, Hi ku holova ka wena, Yehovha! Hi ku huhutela ka moya wa tinhompfu ta wena.

16A tshambuluta voko a ri ehenhla a ndzi khoma, A ndzi humesa ematini lamakulu.

17A ndzi lwela eka nala wa mina lowa matimba, Ni le ka lava ndzi vengeke, lava ndzi tlulaka hi matimba.

18Va ndzi sivelele siku ndzi nga va ekhombyeni; Kambe Yehovha u ve xongotelo ra mina.

19A ndzi humesela erivaleni, A ndzi kutsula hikuva a ndzi rhandza.

20Yehovha u ndzi endlile hi ku lulama ka mina, Kambe u ndzi tlherisile hi ku basa ka mavoko ya mina;

21Hikuva ndzi hlayisile tindlela ta Yehovha, A ndzi hundzukelangi Xikwembu xa mina.

22Hikuva ku lerisa hinkwako ka yena ku le mahlweni ka mina, Kambe a ndzi fularhelanga milawu ya yena.

23Ndzi pfumarile swisolo emahlweni ka yena, Kutani ndzi tihlayisile leswaku ndzi nga vi na nandzu.

24Hikwalaho Yehovha u ndzi hakerile hi ku lulama ka mina, Ni ku basa ka swandla swa mina emahlweni ka yena.

25Lonene, u n'wi endla hi vunene, Munhu la lulameke, u n'wi endla hi ku lulama,

26La baseke, u n'wi endla hi ku basa ka wena, Kambe lowo homboloka u n'wi endla hi ku homboloka ka yena.

27Hikuva hi wena la ponisaka lava titsongahataka, Kambe u tsongahata mahlo lama tlakukeke.

28Hi wena la vangamisaka ku vonakala ka mina; Yehovha, Xikwembu xanga, u vonakarisa munyama wa mina.

29Loko ndzi ri na wena, ndzi nga tihoxa evandleni ra valala, Kambe hi Xikwembu xa mina, ndzi nga tlula rihlampfu.

30Tindlela ta Xikwembu ti lulamile, Rito ra Yehovha ri hlawulekile; I xitlhangu eka hinkwavo lava titshembeleke yena.

31I mani Xikwembu, loko a nga ri Yehovha? I mani ribye lero tiya, loko xi nga ri Xikwembu xa hina?

32Xikwembu lexi ndzi boheke hi vamba ra matimba, Kambe wa ndzi fambisa hi ndlela leyi lulameke.

33U endle milenge ya mina yi fana ni ya tinhlangu, U ndzi tiyisile etindhawini ta mina leti tlakukeke.

34U tlharihisele nyimpi swandla swa mina. Kutani mavoko ya mina ma kunga vurha bya koporo.

35U ndzi nyikile xitlhangu xa ku hlayiseka ka wena, Voko ra wena ra xinene ri ndzi tiyisile, Kambe vunene bya wena byi ndzi kurisile.

36U anamisile ndlela ehansi ka mikondzo ya mina, Kutani milenge ya mina a yi rhetemuki.

37Ndzi tsutsumele valala va mina, ndzi va kuma, Kutani a ndzi tlhelanga ndzi nga si va heta.

38Ndzi va kandziyela, va hluleka ku pfuka; Va wa ehansi ka mikondzo ya mina.

39U ndzi bohile hi vamba ra matimba ro huma nyimpi, U ndzi tsongahatela lava ndzi pfukelaka matimba.

40U rhendzelekisile mihlana ya valala va mina emahlweni ka mina, Kutani ndzi herisile lava ndzi vengeke.

41Va huwelela, kambe va pfumala mulweri; Va huwelele eka Yehovha, kambe a nga va hlamulanga.

42Ndzi va sirile kukota ntshuri lowu hungiwaka hi moya, Ndzi va cukumeta ekule kukota ndzhope wa mitsendzele.

43U ndzi lwerile eku kanetaneni ka tiko, Kambe u ndzi vekile hosi ya matiko; Tiko leri ingi ndzi nga ri tivi, ra ndzi tirhela.

44Loko va twa vito ra mina, va hatlisa, va yingisa, Vana va matiko i vayengi va mina;

45Vana va matiko va ni gome, Va rhurhumela loko va huma emakhokholweni ya vona.

46Yehovha wa hanya, a ku dzunisiwe ribye ra mina! A ku twarisiwe Xikwembu xa ku hlayiseka ka mina!

47Xikwembu lexi ndzi rihiselaka, Lexi ndzi tsongahatelaka matiko.

48Kambe u ndzi lwela eka valala va mina, U ndzi tlakurile ehenhla ka lava ngi va lwa na mina, U ndzi ponisile eka munhu wa vukari.

49Hikwalaho ndzi ta ku vonga exikarhi ka matiko, oho Yehovha! Ndzi ta yimbelela ku kwetsima ka vito ra wena.

50U ponisa hosi ya yena hi ku kutsula lokukulu, U endla hi tintswalo eka muhlawuriwa wa yena, Eka Davhida, ni ka rixaka ra yena hilaha ku nga heriki.

← Chapter 17 Jump to: Chapter 19 →