1 Samuel 31

Umbundu Bible (Embimbiliya - Bíblia Sagrada em Umbundu)

← Chapter 30 Jump to:

1Va Filisiti va kala loku yaka la va Isareli. Va Isareli va tila va Filisiti. Va kupukila vomunda ya Giliboa olongambu.

2Va Filisiti va landula Saulu lomala vaye kuenje va va sanga. Va Filisiti va ipaya Yonatão la Avinadava kuenda Milikisua, omãla va Saulu.

3Ocilunga caco ca sakalaisa enene Saulu. Vakualohonji vo sanga kuenje eye wa lemehiwa calua la vakualohonji.

4Oco Saulu wa sapuila ukuenje wambayata ovimaleho viaye hati, Somola osipata yove, nome layo sanga oviyamba viaco viya, vi noma ha vi ndalula. Ukuenje puãi ka tavele momo wa kala lusumba valua. Oco Saulu wa kuata osipata yaye eye muẽle, kuenje wa litoma.

5Eci ukuenje ukuavimaleho a mola okuti Saulu wa fa oco layevo wa litomavo losipata yaye kuenje wa fila kumue laye.

6Oco Saulu kuenda omala vaye valume vatatu lukuenje ukuavimaleho viaye kumue lalume vaye vosi, vosi muẽle va fila pamosi eteke liongongo.

7Alume va va Isareli, vana va kaile konele yikuavo yocimbota, lava va kala kesinya lia Yordão, eci va limbuka okuti va Isareli va tila kuenda Saulu lomãla vaye va fa oco va tunda vovaimbo avo kuenje va tila. Va Filisiti veya, va piñalamo.

8Hẽla eci va Filisiti veya oku sũlũla ava va fa oco va sanga Saulu lomãla vaye valume vatatu va fila vomunda ya Giliboa.

9Vo teta utue, kuenje vo sũlũla ovimaleho viaye. Va tuma olomunga kuosi vofeka ya va Filisiti oku sapula oluiya luaco luwa volonjo vioviteka viavo kuenda pokati komanu vavo

10Va kapa ovimaleho viaye vonembele ya Asitorete. Va valela etimba liaye kocimbaka ca Betesiane.

11Puãi eci va Yavesi Gileada va yeva eci va Filisiti va linga la Saulu

12oco alume vosi va pama va katuka, va enda uteke, vopa ocivimbi ca Saulu lovivimbi viomãla vaye vatatu kocimbaka ca Betesiane, kuenje veya ko Yavesi, va vi yoka.

13Akepa avo va a nolapo kuenje va a kenda vemi liulemba umue vo Yavesi. Kovaso yaco va likandangiya okulia oloneke epanduvali.

← Chapter 30 Jump to: