1 Timothy 3

Umbundu Bible (Embimbiliya - Bíblia Sagrada em Umbundu)

← Chapter 2 Jump to: Chapter 4 →

1Ondaka yimue ya kolelua yeyi, okuti, nda umue o livela omangu yosungu yekongelo o yongola upange uwa.

2Evi via sesamela u o linga osungu yekongelo, vievi: A pue eko, a linge ulume wukãi umuamue, a lipokuise, a lisuluvike, a linge ukuotate, a sole akombe, a loñolõhe oku longisa,

3ka ka kolue, ka ka yambule loku veta, a lungule puãi loku unjuka, ka ka hoye, ka ka sole olombongo,

4a songuile ciwa onjo yaye, a pokuise omãla vaye loku va longisa esumbilo.

5Momo omunu nda ka tẽla oku songuila onjo yaye, o lava ndati ekongelo lia Suku?

6U wa tava ndopo heyeko, sanga o lipanda kuenje o fa vepiso lieliapu.

7Kuenda vali wa sesamela uvangi uwa wava ka va tavele, sanga o pembuiwa kuenje o fa vonjanjo yeliapu.

8Oloñuatisi viekongelo laviovo vi kale omanu vakuotate, ka vi ka kale lalimi avali, ka vi ka nyue ovinyu via lua, ka vi ka sokolole enene ofeto.

9Elumbu liekolelo va li lave lutima u yela.

10Vi setekiwe tete. Noke, nda vi limbukiwa okuti via pua eko, oco vi linge upange woloñuatisi.

11Akãi lavovo, va linge vakuotate, ka va ka endise olombonde, ka va ka nyue, va kolelue lovina viosi.

12Oloñuatisi viekongelo vi linge alume vukãi umuamue, loku songuila ciwa omãla vavo lolonjo viavo.

13Momo ava va linga ciwa upange woloñuatisi viekongelo va limuisa omangu yi sumbiwa kuenje vamako vekolelo li kasi vu Kristu Yesu.

14Ndavoka oku iya ndopo kokuove, puãi ñasi loku ku sonehela ovina evi okuti,

15nda nda tumala osimbu, ove o kũlĩha ndeci ca sunguluka oku linga vonjo ya Suku, haiyo ekongelo lia Suku o kasi lomuenyo. Ekongelo liaco olio ongunji yi talamisa Ocili hailio onjaka yaco.

16Tua tava okuti, ocili muẽle, okulonga kuondaka yi kola yetavo li koka oku tuwa nda Suku, ku komohisa. Eye wa tukuluisua letimba. Wa tetuluiwa le Espiritu okuti ukuesunga. Wa muiwa lovangelo. Wa sapuiwa ku vakualofeka. Wa taviwa kilu lieve. Wa tambuiwa kilu kulamba.

← Chapter 2 Jump to: Chapter 4 →

Recommended Reading

Commentary 1 Timothy Commentaries → Devotional 1 Timothy Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →