1 Timothy 4

Umbundu Bible (Embimbiliya - Bíblia Sagrada em Umbundu)

← Chapter 3 Jump to: Chapter 5 →

1Cilo Espiritu li popia longusu, halatatahãiko, liti, Kotembo yesulilo vamue va konyoha ketavo ha va yevelela kaspiritu uhembi lo kovilongua vieliapu.

2Ovilongua viaco vi longisiwa lomanu va popia ombambe luhembi, haivo ovitima viavo via momẽla, huti ño, via kakuiwa locivela ca sanya.

3Va lemela oku kuela. Va handeleka oku likandangiya ovilia evi Suku a lulika okuti vi liwa lolopandu lava va tava haivo va kũlĩha ondaka yocili.

4Momo oviluvo viosi via Suku viwa, kuenje lacimue ci lemeliwa nda ci tambuiwa lolopandu.

5Momo, nda oco, ci kolisua londaka ya Suku kuenda lolohutililo.

6Nda o sapula ovina evi ku vamanji o linga oñuatisi yocili ya Kristu Yesu, haiyo ya tekuiwa lolondaka viekolelo, kuenda lovilongua viocili vina o kuãi.

7Yuvula olosapo viaño, haivio ka via tundile ku Suku. Lipindisa oku tuwa nda Suku.

8Momo okupindisa etimba, ocili, ku silivila, puãi okutuwa nda Suku ku kuatisa kovina viosi, momo ku kuete ohuminyo yokomuenyo ulo, kuenda komuenyo wiyako.

9Ondaka eyi yocili kuenda ya posokela oku taviwa kuoha.

10Momo oco ocimãho tua loña, haico tu yakela, momo elavoko lietu li kasi ku Suku o kasi lomuenyo. Eye Upopeli womanu vosi, puãi, ca piãla, wava va kolela.

11Handeleka ovina evi kuenda vi longisa.

12Lomue ka ka ku lavisile utila wove, puãi, kondaka, lo kovilinga, lo kocisola, kuenda kekolelo, lo koku yela, eca ongangu ku vakuetavo.

13Kolisako oku tangela omanu ondaka ya Suku, loku kunda, loku longisa, toke njiya.

14Ku ka ekelele ocali ci li vokati kove, cina wa ihiwa lovitumasuku via popiwa eci akulu va ku kapa ovaka.

15Kolisako oku lingainga ovina evi. Litumbika muẽle kokuavio, oco vosi va mole okuamako kuove.

16Lilava ove muẽle. Lavavo okulongisa kuove. Pandikisa lovina evi, omo, nda o ci linga, o lipopela ove muẽle, o popelavo ava va ku yeva.

← Chapter 3 Jump to: Chapter 5 →