Ecclesiastes 4

Umbundu Bible (Embimbiliya - Bíblia Sagrada em Umbundu)

← Chapter 3 Jump to: Chapter 5 →

1Nda mõlavo akangiso osi a kasi loku lingilua vemehi liekumbi. Kuenje tala, asuelẽla ava va kangisua ya, kuenje ka va kuete u o va lemba; vakuaku va kangisa va kasi lunene waco, puãi ovo muẽle ka va kuete u o va lemba.

2Oco nda linga siti, Ava va fa ale ovo va sumũluha ca velapo, ava va kasi lomuenyo ci sule;

3puãi u wa va velapo okuti vosi yavo va sule, yu ka citiwile handi okuti ka muĩle ovilinga vivi via lingilua vemẽhi liekumbi.

4Kuenje nda limbuka okuti upange wosi kuenda epondolo liosi liokupange li tunda kocipululu omunu a kuetele ukuavo. Eci lacovo esanda kuenda oku seteka oku kuata ofela.

5Eveke li kutika ovaka kuenje li likokela ekopo.

6Epupu limuamue kumue loku tula utima lia velapo, apupu avali kumue lupange kuenda asakalalo esanda a sule.

7Nda mõla esanda likuavo vemehi liekumbi lieli:

8omunu ka kuete ngandiaye ndaño omõla ndaño manjaye; haimo upange waye ka u pua pua, liso liaye ka li kuta kuta lipako, okuti lalimue eteke a lipula hati, Helie ñasi loku talavayela pamue helie ñasi loku likandangiyila asanju? Eci lacovo esanda, haico ka ci silivila.

9Vavali kumuamue va velapo, umosi lika liaye o sule, momo va mõla onima yupange wavo.

10Momo nda va kupuka ukuavo 0 pindula ukuavo, puãi ku o kasi ulika nda o kupuka kuenje ka kuete ukuavo u pindula ohali yaco ya kãla.

11Kuenda vali nda vavali va pekaila pamuamue va sanga owuya, puãi umosi o sanga ndati owuya?

12Ndaño omunu o yula ongendalika, vavali va tẽla oku u tamãlala; ukolo wa ketikiwa lutatu ko tepa lombili.

13Ukuenje osuke haeye ukualondunge eye wa velapo, osoma ya kuka haiyo ka yi kuete olondunge, kuenda ka ya kũlĩhile vali oku yeva elungulo, yi sule,

14ndaño wa tunda vokayike ha vialekiwa osoma, pamue wa citiwa osuke vofeka yavo.

15Nda mõla vosi va kasi lomuenyo vemehi liekumbi ndomo va ñuala ñuala. Nda molavo umalẽhe waco, u wa piñala omangu yaye.

16Omanu vaco ka va tendiwa. Leye wa va viala vosi. Haimo ava veya noke ka vo sanjukila. Ocili eci lacovo esanda, loku seteka oku kuata ofela.

← Chapter 3 Jump to: Chapter 5 →