Haggai 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to:

1Kulima wavali wa Soma Dáriu keteke liakuĩ avali lamosi liosãi yepanduvali, oco ondaka ya Yehova yeya lomẽla wuprofeto Hagai, yiti,

2Popia la Seruvavele, omõla a Sialitiyele, onguvulu ya Yuda, kuenda la Yehosua, omõla a Yehocedeke, ocitunda cinene, kuenda lowiñi wosi womanu, huti,

3Pokati kene wa supipo ndeti helie wa muĩle onjo yilo ndomo ya kaile lulamba? Cilo vu yi lete ndati? Ka ya sokele hẽ ndocina caño?

4Haimo lumue, kolisako a Seruvavele. Oco ca popia Yehova. Lovevo, a Yehosua, omõla a Yehocedeke ocitunda, kolisako. Lene amanu vosi vakuafeka, kolisiko lenevo. Oco ca popia Yehova. Kuati kupange momo ame ñasi kumue lene. Oco ca popia Yehova Ukualohoka.

5Ndeci nda lisila lene eci wa tundi ke Egito, haico lopo Espiritu liange liu tãiyĩlĩli. Ko ka kali lusumba.

6Momo hasimbuko kuenje ndi tutumũla ovailu loluali lokalunga longongo. Oco ca popia Yehova Ukualohoka.

7Ndi tuñunya olofeka viosi okuti kuiya ovina via velapo vi tunda kolofeka viosi, lame njukisa onjo yilo lulamba. Oco ca popia Yehova Ukualohoka.

8Opalata, yange. Ulu lawovo, wange. Oco ca popia Yehova Ukualohoka.

9Ulamba wonjo eyi ndeti u piãla, una wonjo yatete u sule. Oco ca popia Yehova Ukualohoka. Kuenda vali, mũlo salalisamo. Oco ca popia Yehova Ukualohoka.

10Keteke liakũi avali lakũala liosãi yecea, kulima wavali wa Soma Dariu, ondaka ya Yehova yeya lomẽla wuprofeto Hagai, yiti,

11Ca popia Yehova Ukualohoka ceci, hati, Puli handi kovitunda ocihandeleko, hoti,

12Nda umue ambatela ponanga yaye ositu yi kola kuenje onanga yaye yi lamba kombolo pamue kolombi pamue kovinyu pamue kulela pamue kositu yaño ndoto, ovina viaco hẽ, vi kola, ale? Ovitunda yu via kumbulula viti, Lakamue, ka vi koli.

13Oco Hagai wa pula vali, hati, Nda he umue wa liñisua omo a lamba kocivimbi, noke wa lamba cimue covina evi, ocina caco a lamba hẽ, ci liña ale? Ovitunda via kumbulula, viti, Ci liña muẽle.

14Oco Hagai wa kumbulula, hati, Ca popia Yehova ceci, hati, Oco muẽle, haico ci kasi omanu ava la vakuafeka yilo, ndaño upange wosi wovaka avo, locilumba va lumba, cosi ci liña.

15Kaliye, ndu peyi siti, Sokololi ciwa ndomo ci kala tunde etaili. Osimbu ka wa fetikili oku yala ovawe onjo ya Yehova, ca kala ndati lene?

16Kotembo yaco nda umue iya kondunda yepungu ya tẽla olonjongo akũi avali o sanga lika ekũi. Nda iya kocikuata culela oku upamo olombenje akũi atãlo o sanga lika owu wa soka lakũi avali.

17Ndo yambuli lofela yehunguhungu kuenda lohume lociwe pokati kupange wosi wovaka ene, haimo ka wa tiukilili kokuange. Oco ca popia Yehova

18Oco sokololi ndomo ci kala tunde etaili okuti tunde keteke liakũi avali lakuãla liosãi yecea. Tunde keteke wa seveti ociseveto conjo ya Yehova, limbuki muẽle.

19Ombuto hẽ, yi vongela ño vosila? Uyuva lukuyu laromeira loliveira hẽ, vi kamba ño oku ima? Lakamue. Tunde opo ndu sumũlũisi.

20Kuenje ondaka ya Yehova yeya vali ku Hagai eteke liakũi avali lakũala liosãi, yiti,

21Popia la Seruvavele, onguvulu yoko Yuda, huti, Ndopo ndi tutumũla ovailu longongo.

22Ndi kupula ovialo viovosoma; ndopo nyõla unene wovoviali olofeka; nyõlãvo akãlu ovita lava va endelamo; kuenda otuvalu lava va endelako lavovo va kupuka; omunu o kupuiwa losipata yukuavo, omunu losipata yukuavo.

23Ca popia Yehova Ukualohoka, ceci, hati, Okuenje wange, a Seruvavele, omõla a Sialitiyele, eteke liaco hu nyañula, hu kolisa, omo nda ku nola hu lingi wange. Oco ca popia Yehova Ukualohoka.

← Chapter 1 Jump to: