Job 31

Umbundu Bible (Embimbiliya - Bíblia Sagrada em Umbundu)

← Chapter 30 Jump to: Chapter 32 →

1Nda lisila lovaso ange, oco mbanja ndati ufeko?

2Momo nda oco, Suku o kasi kilu nda wa ndinga nye? Pamue ocipiñalo ce nda nda tambula ku Tõlo?

3Ohali he ka yiya ku vakuakandu? Longongo he ka yiya ku vakuevĩho?

4Suku hẽ, ka lete eci ndinga? ka kũlĩha hẽ okuenda kuange kuosi?

5Nda ndaendaendaele luhembi, pamue nda nda yayoaile oku limbika,—

6Suku a mesalise lombalãsa yesunga, okuti o kulĩha esunguluko liange.—

7Nda nda yapukile vonjila, nda nda livelele cimue ca mõla ovaso, nda nda liñisile ovaka ange levĩho,

8oco, ci kale okuti ame njimba ombuto kuenje umue wiñi o liako, ci kalevo okuti ovikũlakũla viosi viovepia liange vi tukuĩwa.

9Nda utima wange wa tambiwile lukãi wamãle, pamue nda nda talamele puvelo wukuetu,

10oco ukãi wange a sulile umue wiñi, vakuavo vo petamẽle.

11Momo oco, nda ca linga ekandu lia piãla, nda ca linga ekandu lia sesamela oku yambuiwa lolonganji.

12Momo ekandu liaco nda lia linga ondalu yi nyõla cosi pe. Londalu yaco nda ya mala pe ovipako viange viosi.

13Nda nda lavisile ondaka yukuenje wange, pamue yufeko wange eci va mindika,

14ame hẽ cilo ndinga nye eci Suku a katuka? Eci eya oku pula ndu kumbulula ndati?

15Wa sowila ame vimo heyeko wo sovola eye? Homuamueko hẽ wa tu sovola vovaimo?

16Nda nda likalele eci ca yongola osuke, nda nda malele elavoko liocimbumba,

17nda nda lile lika liange okambu kange okuti sia ecele kamue kosiwe,—

18momo tunde kutila Suku wa nata ndonjali, tunde vimo lia mai wa songuila,—

19nda nda muĩle umue wa nyõlẽha omo a kamba uwalo, nda nda muĩle osuke ka yi kuete coku lisikĩlĩla,

20kuenje nda ka ya manduile, omo ndo sikĩlĩla lovipa violomeme viange,

21nda nda pindikile umue ka kuete eko momo nda kũlĩha okuti volusenje va ngamela,

22oco epepe li fuomohe kocitãi calio, lokuokuo ku soyokele vesokoluilo liakuo.

23Nda kaile lohele sanga Suku o nalisa ohali oco sia telele oku vi linga. Unene waye wa njokokisa.

24Nda nda kolelele ulu, okuti nda popele lulu siti, Vukolelo liange,

25nda nda yolelele omo ukuasi wange wa lua, lomo eka liange lia kuata ca lua,

26nda nda vanjele kekumbi eci lia tua, pamue kosãi eci yamako lulamba,

27kuenje nda utima wange wa tambiwile laco uyombeki, pamue nda nda vi fendelele loku sipula peka,

28eci lacovo nda ca linga ekandu lia sesamela oku yambuiwa lolonganji; omo nda ca lomboloka okuti nda lingila usuanji Suku o kasi kilu.

29Nda nda sanjukilile okunyõlẽha ku wa suvuka, pamue nda nda yolelele eci cĩvi co sanga,—

30Sia tavele okuti omẽla wange u linga ekandu lioku pingila omuenyo waye esiñalo.—

31Nda vakuambalaka yange ka va popele vati,

32kekutile ositu yaye?— Ukombe ka pekelele voluwa, nda yikuluila olongende apito ange.—

33Nda nda wundisile akandu ange vonete yange loku a sitika okuti omanu ka va a moli

34omo nda kuatela omanu usumba walua, kuenje epembe liapata lia njokokisa okuti ndoha, kuenje sia tundilile posamua…

35Nda nda kaile lumue o njevelela! Ekolelo liange lieli: Ukuonenewosi eye o netuluila! Nda nda kaile lukanda omu mua sonehiwa ondaka unyali wange a mindika layo!

36Nda nda kaile la wo nda ndo wambatela pocitai, nda ndo futa ndekolowa.

37Nda nda pitila ku Tõlo lomoko ndosoma, loku u sapuila cosi comuenyo wange.

38Nda osi nda lima ya mindikile loku misa, nda ovipanga viayo via lililile kumuamue,—

39nda nda lile ovaima ayo ocali, nda nda kokelele okufa vamuẽle yaco,

40oco ocambanda ci tunde, otiliku hayoko, lovimbuandu vi tunde, osevata hayoko. Olondaka via Yovi via sula.

← Chapter 30 Jump to: Chapter 32 →

Recommended Reading

Commentary Job Commentaries → Devotional Job Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →